31 Dekabr xalq hərəkətə keçməlidir!
Azərbaycan xalq etirazlarının yeni mərhələsinə daxil olur. Bu ilin 19 yanvarından başlanan etiraz dalğası ölkəni zəlzələ effekti ilə silkələyib. 8 oktyabr və 19 oktyabrla davam edən aksiyalar fəal etirazçıların sayını birə beş artırıb. Bir daha diqqət edin, biz indi hardayıq və bura necə gəlmişik? Biz illər boyu “Məhsul”da keçirilən 7-11 minlik mitinqlərdən 16-17 mitinqlərə qədər yol gəlmişik. Biz ilin əvvəlindən bəri davam edən 7 aylıq mitinq qadağası müddətində hakimiyyətlə əsəb müharibəsi aparıb, virtual mübarizədə on minlərlə tərəfdar toplamağı bacarmışıq. Biz inadlı mübarizəmizlə 8 oktyabrda şəhərin mərkəzində razılaşdırılmış aksiya keçirə bilmişik. Biz o uğurlu aksiya ilə paytaxtın ölü sükutunu pozub, insanlarda növbəti etirazlara inam yarada bilmişik. Biz 19 oktyabrda ölkə konstitusiyasını pozan hakimiyyətin inadını qırıb razılaşdırılmamış aksiyaya minlərlə insanı səfərbər etməyi bacarmışıq. Görünməmiş təzyiqlərə, yüzlərlə insanın saxlanılmasına, onlarla təşkilatçı fəalın həbsinə baxmayaraq, etiraz ruhunun daha da güclənməsinə nail olmuşuq. Aparıcı müxalifət liderlərinin işgəncə görməsinə baxmayaraq, geri doğru bir addım da atmamışıq. Sonrakı mərhələdə gözlənən ağır qınaqları öz üzərimizə çəkib, hakimiyyətin planladığı təxribatları və qanlı planları önləməyi bacarmışıq.
İndi bu yerdən yeni bir mərhələ başlayır. Gəlib çıxdığımız bu yerdən necə irəli getməliyik? Meydana yüz min olaraq çıxmaq üçün daha nələr etməyik? Prosesə qoşulun, təşkilatçı olun, təkliflərinizi verin. Mübarizənin bundan sonrakı uğuru səndən asılıdır, Azərbaycan xalqı! Minlərlə insanı sosial şəbəkələrdə fəalların başlatdığı 1+10 aksiyasına qoşun, meydana çıxan etirazçı sayının on dəfə artmasına yardımçı olun. Özünüzə inanın, sizin virtualda, razılaşdırılmış aksiyalarda artan etiraz səsiniz hökumətə qorxu yaradıb. Sizin razılaşdırılmamış aksiyada minlər olaraq küçəyə çıxmağınız qüvvələr nisbətində yeni situasiya yaradıb. Sizin mitinq qadağası şəraitində, bu qədər basqıdan qorxub-çəkinmədən səfərbər olub küçələrə çıxmağınız hökumətdə çaşqınlıq yaradıb. Ölkədə etiraz səfərbərliyi üçün bir-birinizə yardım edin, etiraz aksiyalarına daha çox insanların cəlb olunması üçün iş aparın. Hər kəs özünə sual versin-bunun üçün nələr edə bilərəm? Bu işə necə töhfə verə bilərəm? Biz bacaracağıq, Azərbaycan insanı! Yetər ki, özünə və mübarizənin qalibiyyətinə inan! Vaxtı çatmış ideyaların qarşısını heç bir qüvvə ala bilməz. Bu tarixin sınağından çıxmış bir həqiqətdir. Meydanlarda 100 minlər olmağımıza çox az qalır! Hərəkət zamanıdır, Azərbaycan xalqı!