Şübhəsiz ki, verdiyimiz bu ad nazirin xoşuna gəlməyəcək. Amma fərq etməz, arada insanları öz adıyla çağırmaq lazımdır ki, kimliyini xatırlasın. Xatırlasın ki, bu adı necə və hansı xidmətlərinə görə qazanıb. Karyerası boyunca hardan hara yol gəlib, kimə hansı pislikləri edib. Naxçıvanda kim idi, Bakıda kim olub. İndiki məqamı üçün neçə günahsızın quyusunu qazıb, neçəsinin evini yıxıb. Güc strukturlarında çalışmaq əliyalın xalqı qanına qəltan etmək haqqımı verir kiməsə? Reketlik, özbaşınalıq, qoçuluq haqqımı verir? Güc nazirinin missiyası dəyənəyi götürüb əliyalın insanlara qol gücü göstərməkmi, yoxsa onların asayişini qorumaqmı? Qanunsuz əmrləri yerinə yetirmək nə vaxtdan dövlətçilik missiyası olub? Diktatoru qorumaq nə vaxtdan qanunçuluq olub? 19 oktyabrda törətdiyi cinayətlərin qara siyahısını təzələyən Vilayət Eyvazov “İlin qulduru” adını haqq edir, ya yox? Meydanda müxalifət liderlərini qanundankənar qoçularına sürütdürən, onları orta əsr işgəncə üsulları ilə döydürüb qanına qəltan edən adama nazir deyilir, yoxsa quldur? Hakimiyyəti zorla ələ keçirmiş birinin özbaşınalıqlarına şərik çıxan adama nazir deyilir, yoxsa cinayətkar?
Bəli, bu ad nazirin xoşuna gəlməyə bilər. Amma gəlsə də, gəlməsə də, həqiqət budur. Eyvazovun hansı əməlin sahibi olduğu hər kəsə bəlli. Naxçıvanda reketlik fəaliyyətindən bu vəzifəsinə qədər ən qaranlıq yollardan keçib. Şərlədiyi, tutdurduğu, evini yıxdığı adamların sayı-hesabı yox. Xalq onu 2003-cü il qanlı meydan hadisələrindən tanıyıb. Meydandakı əlitapançalı şəklini unutmuş olmazsınız. Amma adamın o vaxta qədər etdiyi pisliklər də bir kitaba sığmaz. Nə əməllərin sahibi olduğunu Naxçıvanda hər kəs bilir. Adamın “bandotdel” rəisi vəzifəsinədək dosyesi də xeyli qalındır. Bənzər işlərinə görə dəfələrlə beynəlxalq təşkilatların “işgəncələr kralı” adını qazanıb. 19 oktyabr aksiyasındakı “performansı” ilə də nazirlik diplomunun prezentasiyasını etmiş oldu. Necə etdiyini də gördünüz. Öz ağalarının qarşısında reytinqini qaldırdığını düşünərkən, xalqın gözündə onu daha da sıfırladı. Eyvazov nazir kimi öz siftəsini çox iyrənc şəkildə etdi, türklər demiş, “ lap üz-gözünə bulaşdırdı.” Həm də anlamadan xalqın nifrətini Əliyevlərin üstünə yönəltdi. İndi masada onun özünün istefaya göndərilməsi məsələsi var. Arxalandığı böyüklərinin onu ortada buraxacaqları günə az qalır. O gün yəqin ki, Eyvazov g eri dönüb keçdiyi yola bir daha boylanacaq. Geridə qaranlıq keçmişdən başqa nə var ki? Vilayət Eyvazov tam da layiq olduğu adı alıb. Bəlkə də, ömrü boyu onun adına bu qədər yaraşan mükafatı olmayıb.