Hərdən adama elə gəlir ki, brakonyerlər ölkəni girov götürüb. Hər yerdə qanunsuzluq və özbaşınalıq var. Cəmiyyətin problemlərindən dönə-dönə yazırıq. Amma ölkədə təbiətin başına gətirilən bəlalar da heç kitablara sığan deyil. İnsanlar gündəlik problemlərin əlində elə əsir olub ki, ölkədəki təbii fəlakətlərin fərqində deyillər. Hələ sosial şəbəkələrdə ərəb turistlərin qoruq zonalarından paylaşdığı qalmaqallı ov fotosessiyaları olmasaydı, kimsənin gözü açılan da deyildi. Yaxşı ki, sosial şəbəkə fəalları kampaniya başladıb, nadir heyvan və quşları ovlayan qanunsuz turistlərin cəzalandırılmasını tələb etdilər. Həmin hadisədən sonra da Ekologiya və Təbii Sərvətlər nazirliyi hərəkətə gəlib, ölkədə qanunsuz ov edən xeyli ərəb turistin cəzalandırıldığı xəbərini yaydı. Amma qanunsuz ovçuluq sahəsində hələ də dəyişən bir şey yox. Ekspert rəylərinə görə, ölkədə bütün nadir canlı növlərinin sayında azalma müşahidə olunur. Xəzərdə “Qırmızı kitab”a düşmüş balıqlar, qoruqlarda quşlar, meşələrdə nadir heyvan növləri tükənib gedir. “İlin ovçusu” adını nazir Muxtar Babayevə ona görə verdik ki, onun vaxtında qanunsuz ovçuluq faktlarının sayı artıb ki, azalmayıb. Nazir də bu fəlakətin qarşısını almaqda acizdirsə, çarəni harda axtaraq? Bu problemi vaxtaşırı qabartmaqda heç bir qərəzimiz yox. Biz ailədən biri olan Leyla Əliyevanın heyvanların mühafizəsi ilə bağlı layihələrini belə alqışlayırıq. Babayevin nazirliyin başına yeni keçməsi faktını da nəzərə alırıq. Amma onun problemin ciddiliyini gözardı etməsi, həqiqətən, böyük narahatlıq yaradır. İnanın, yeni ildə ovçuluğa müəyyən müddətlik moratorium qoyulmasa, gələcək nəsillər çox canlıların adını yalnız kitablardan oxuya biləcəklər.
Hər il nazirlik tərəfindən keçirilən reydlər zamanı qanunsuz ovçuluqla bağlı çox sayda akt və protokol tərtib edilir. Qanun pozucuları böyük məbləğdə inzibati qaydada cərimə olunur. Məsələn, keçən il İsmayıllı rayonunun Basqal ərazisində adı “Qırmızı kitab”a düşmüş qonur ayının ovlandığı məlum olmuşdu. Sosial şəbəkələrdə qalxan o qədər hay-küydən sonra yenə yaxın zamanlarda Mahmudçala Ovçuluq Təsərrüfatında ov qaydalarını pozan ərəblər saxlanılaraq 2000 manat cərimə edilib. Faktların sayını xeyli artırmaq olar. Amma bu nəyi dəyişir ki? Əgər nazirlik illərdir davam edən brakonyerliyin qarşısını ala bilmirsə, onun fəaliyyəti kimə və nəyə lazımdır? Bu qanunsuz ovçuların. Xüsusilə, turistlərin qoruqlarımıza soxulmasına kim icazə verir? Bunların qarşısını kim almalıdır? Nazir Muxtar Babayev nə düşünür? Ekologiya və Təbii Sərvətlər nazirliyi son illər canlı təbiətin qorunması məqsədilə hansı proqramları həyata keçirib? Ötən yazılarımızda qeyd etmişdik və bir daha vurğulayırıq. Ölkədə nəsli kəsilməkdə olan canlıları qorumaq və brakonyerliyin qarşısını almaq üçün ovçuluğa ən azı beş illik moratorium qoyulmalıdır. Əks halda, gözümüzü açıb görəcəyik ki, təbiətdə canlı adına heç nə qalmayıb, lələ köçüb, yurdu qalıb.