Bəxtiyar Hacıyev
Danışırıq, deyirik, gülürük, lağlağı edirik, ancaq ölkə doğrudan da çox pis istiqamətdə sürətlə üzüaşağı gedir. Prezidentin SOCAR, Azərenerji və AZAL-ı tənqid etməsi, yeni yaradılan Azərbaycan İnvestisiya Holdinqinin nizamnaməsindəki “səmərəliliyi artırmaq, sağlamlaşdırmaq” kimi bəzəkli və cazibədar sözlərdən istifadə edilməsi hələ islahat, vətəndaşların və dövlətin maraqlarını qorumaq demək deyil.
Az-çox bu hökumətə bələd olan adam kimi deyə bilərəm ki, belə sənədlərdə nə qədər bəzəkli sözlər olsa da, atılan addımların bir marağı var – dövlət büdcəsindən maksimum çox əmmək. Məscid tikintilərinə belə ayrılmış pulları yeyib, hektarlarla bağ evi, villalar tikib, içində əylənən komandadan xalqın və dövlətin maraqlarını qorumağı gözləmək əbəsdir.
İlk baxışdan səmərəsiz işləyən dövlət şirkətlərinin özəlləşməsi xoş görünsə də, normal idarəçilik olan ölkələrdə bunu səmərəli addım kimi qəbul etmək olsa da, Azərbaycanda hətta ən böyük özəl holdinqlərin belə dövlət büdcəsindən dolayı yollarla bəsləndiyini unutmadan demək olar ki, özəlləşmə səmərəli olmayacaq.
Dövlət büdcəsindən o holdinqlərə təzyiqlə maliyyə pompalanır, bir nəfər iş görən varsa, 5 nəfər də müftəxor maaş alır, monopoliya yaradılır, bütün bunlara baxmayaraq, dayanıqlı biznes modeli işləmir. Məmur vəzifədən çıxan kimi, bizneslər çökür. Bunun misalları çoxdur. ZQAN, Qarant, ATA Holdinq və s. Bu gün Gilan və Paşa da daxil olmaqla, heç bir böyük holdinq sırf biznes prinsiplərinə görə ayaqda deyil. Üzərlərindən siyasi dəstək götürüldüyü 1 ayda çökərlər.
Əgər əvvəl AZAL-a dövlətdən dotasiya edilirdi, milyonlarla dollara təyyarələr alınırdı, heç olmasa, o zaman etiraz edirdik ki, hər şeyinizi dövlət verir, niyə baha uçurursunuz vətəndaşları? İndi dövlət büdcəsindən yenə daha böyük vəsaitlər pompalanacaq özəl holdinqlərə, onlar da AİH-ə, oradan da özəlləşdirəcəklər məsələn AZAL-ı. Sonra köhnə monopoliya qalacaq, Gürcüstanda təkcə Kutaisidə təkcə bir havayolu şirkətinin bir gündə 39 Avropa şəhərinə 30-35 avroya uçuşları olduğu halda, ÖZƏL AZAL istədiyi qiyməti qoyacaq və tənqid edəndə də “özəl şirkətik, istədiyimiz qiyməti qoyuruq” deyib, yola verəcəklər.
Təcrübə göstərir ki, dünya reytinqində ilk sıralarda olmaq üçün heç də özəlləşdirmə vacib deyil. Məsələn, Qatar Airways, Emirates, Etihad kimi 100% dövlət havayolları şirkətləri heç də səmərəsiz işləmirlər, dünya reytinqində ilk sıralardadır. Nə də Azərbaycanda AirFrance, Lufthansa, AirCanada kimi özəlləşdirmə prosesi gözləmək olmaz ki, dövlət və özəl investorlar, vətəndaşlar AZAL-ın səhmlərini alsınlar, qərarvermə prosesində Paşa Holdinqə söz desinlər.
Ona görə də düşünürəm ki, cəmiyyət bu özəlləşdirmə söhbətlərinə çox ciddi reaksiya verməlidir və ölkədə olan-qalan son şirkətlərin də, dövlət şirkətlərinin də bir ələ keçməsinə etiraz etməlidir.