Gültəkin Hacıbəyli
Milli Şura Koordinasiya Mərkəzinin üzvü
Belə anladım ki, camaatımız bu 28 ildə Şuşadan çox XII Qızıl Ordunun – Rusiyanın xiffətini çəkib. Çünki Şuşanın işğaldan azad olunması Bakı küçələrində bir-neçə saat bayram edildi, ancaq Xocalı soyqırımını, 20 yanvarı törədənlərin varislərinin 28 ildən sonra ölkəmizə qayıdıb suverenliyimizi təhdid etməsi münasibətilə təşkil edilən guppa-gup dünən gecə saatlarından bəri dayanmır.
Separatçı rejimin başçısı Araik Harutyunyan etiraf edib ki, Azərbaycan Ordusu Xankəndinin 2-3 km-dən geri qayıdıb, atəşkəs olmasaydı, bütün torpaqları itirəcəkdilər.
Nikol Paşinyan etiraf edib ki, erməni ordusu tükənmişdi, dayanmaq, nəfəs dərmək, toparlanmaq üçün vaxt istəyirdi.
Xankəndindən 2-3 km məsafədə olan qəhrəman Azərbaycan Ordusu niyə müzəffər yürüşünü yarımçıq saxlayıb geri döndü?!
Niyə Əbülfəz Elçibəyin böyük əziyyətlər, hətta hakimiyyətini itirmək hesabına ölkəmizdən çıxardığı, Qarabağın işğalında Ermənistandan daha çox “xidməti” olan rus ordusu yenidən ölkəmizə qayıtmalı idi?!
Axı İlham Əliyev özü dəfələrlə bölgəyə sülhməramlıların gəlməsinə ehtiyac olmadığını vurğulayıb.
Axı rus ordusunun “sülh məramına” Xocalıdan, 20 yanvardan, Krımdan, Abxaziya və Cənubi Osetiyadan, Dnestyanından yaxşı bələdik.
Axı erməniləri torpaqlarımızdan çıxarmağın rusları çıxarmaqdan daha asan olduğunu hamımız bilirik!
Və buyurun, artıq “sülhməramlıların” əsl məramı üzə çıxıb!
Putinin partiyasından olan deputat, Rusiya Dövlət Dumasının vitse-spikeri Pyotr Tolstoy bu gün artıq Azərbaycanı hədələyib də!
O bildirib: “Qarabağda sülhməramlılarımızın başından bir tük əksik olarsa, Sakaaşvilinin yuxusunda görmədiyi hadisələr olacaq. O vaxt Tiflisi götürmədik, amma bu dəfə her şey başqa cür olacaq”.
Gecə ilə, Azərbaycan xalqının, hətta Milli Məclisin xəbəri və razılığı olmadan, Azərbaycan Respublikası Konstitusiyasına zidd bir şəkildə, sanki yanğından mal qaçırırmışlar kimi Rus Ordusunun Azərbaycan ərazisinə daxil olmasının nəticəsi başqa cür ola da bilməzdi!
Mən indi bütün qəlbimlə Paşinyanın bir müddət hakimiyyətdə qalmasını arzulayıram, çünki əks halda, yeni hakimiyyətin Kəlbəcər, Ağdam və Laçından da çıxacağına əmin deyiləm.
Ruslar gələndən sonra Azərbaycan Qarabağda bütün suveren hüquqlarını itirdi.
Bütün bunları bayram etmək mümkünsə, lazımsa, gəlin birlikdə 40 gün gecə-gündüz şənlik edək. Ancaq mən özümü aldada bilmirəm…
“Allah sizə rəhmət eləsin, dirilər!”.