Krım platforması
Elnur Sadıqov
Azərbaycanın “Krım platforması”na qatılmaması Ukraynayla münasibətlərə kölgə salmayacaq. Əvvəlki illərdə də AŞPA və BMT çərçivəsində Azərbaycan Rusiyanı qıcıqlandıracaq davranışlardan çəkinib, müttəfiqləri Gürcüstan və Ukraynaya başqa formada və daha real məzmun kəsb edən dəstək verib. Hər iki ölkə Azərbaycanı anlayışla qarşılayıblar.
Amma söhbət ölkələrin ictimai rəyindən gedəndə məsələ daha mürəkkəb xarakter alır. Hər iki ölkənin ictimai rəyində Azərbaycan müttəfiqə vəfasızlıqda ittiham edilir. Bu vəziyyətin yaranmasının da səbəbi Əliyev rejiminin avtoritarlığı və seçki saxtakarlığıdır.
Seçkilər saxtalaşdırılmasaydı, parlamentdə real müxalifət olsaydı və həmin parlamentin rəhbərliyində də müxalifət nümayəndəsi təmsil olunsaydı rahatlıqla sabah işə başlayan “Krım platforması”na Azərbaycan müxalifətdən olan vitse-spiker səviyyəsində qatıla bilərdi. Amma sabah Əliyev Kiyevə Fəzail İbrahimlini göndərə bilməyəcək. Ona görə ki, Rusiya rəhbərliyi bilir ki, Fəzail İbrahimli müxalifətin yox, Əliyevin nümayəndəsidir.
Odur ki, indiki saxta parlament buraxılmalıdır. Yeni parlamentə Milli Şura / AXCP – nin gəlməsinə maneələr yaradılmamalıdır. Real müxalifətin təmsil olunduğu güclü parlament formalaşdırılmalıdır. Dövlətin “Krım platforması” kimi məsələlərin həllində çevik davranışı üçün güclü parlamentə ehtiyacı var. Eləcə də gələcəkdə sülhməramlıların statusu kimi məsələlərdə ehtimal olunan təzyiqlərə duruş gətirə bilmək üçün real müxalifətin təmsil olunduğu güclü parlament lazım olacaq.