İctimai fəal Bəxtiyar Hacıyev
Prezidentin köməkçisi Şahmar Mövsümov brifinqdə saxta COVİD pasportu, rüşvət verməklə belə pasport almaqla, əhalinin peyvəndə inamsızlığı ilə bağlı elə təəccüblə danışır ki, sanki 30 ildir Norveçdə çalışır, Azərbaycana bu həftə gəlib.
Şahmar müəllim, sizlər orta məktəblərdə müəllimləri saxtakarlığa cəlb edib, prezident və parlament seçkilərində saxtakarlıq edib, xalqın səsini oğurlayıb, saxta deputatlar düzəldirsiniz, sonra insanların COVID pasportunun saxtalaşdırılmasına təəccüblənirsiniz.
Şahmar müəllim, sizlər yüz milyonlarla, milyardlarla korrupsiya əməllərini törədənlərlə eyni binada oturub, sonra rüşvət verərək saxta COVID pasportu alanlara təəccüblənirsiniz, rüşvət verəni də, alanı da cinayətkar adlandırırsınız. Halbuki, oturduğunuz binada bu tərifə görə cinayətkar olmayan bəlkə də xadimələrdir ancaq.
Şahmar müəllim, insanlar elmə də inanırlar, statistikaya da, peyvəndə də. İnsanlar sadəcə özünüzün saxtakarlıq edib, saxta COVID pasportu görməyə təəccüblənməyinizi, milyardlıq korrupsiya əməlləri törətmiş adamlarla bir binada oturub, rüşvətlə COVID pasportu alanı cinayətkar adlandırmağınızı görüb, səmimi olmadığınızı görüb, məhz sizin təmsil olunduğunuz hakimiyyətə inanmırlar.
Bu cəmiyyət sizin idarəçiliyin məhsuludur.
Ona görə də nə çağırış edirsinizsə, insanlar şübhə ilə yanaşırlar. Hələ siz guya aralarında az-çox etibarı olan kadrlardansınız.