Milli Şuranın sədri, professor Cəmil Həsənli
Bugün milli lider Əbülfəz Elçibəyin anım günüdür. Onun vəfatından 21 il ötür. Bu 21 il ərzində ona qarşı aparılan qaralama, böhtan, gözdənsalma kampaniyasına baxmayaraq millətin Elçibəy sevgisi heç azalmadı. Biz bunun əksini müşahidə etdik. Bu bir az da Rəsulzadənin taleyinə bənzəyir. Ata-oğul Əliyev rejiminin Rəsulzadənin və Elçibəyin kölgəsi ilə vuruşması bu böyük şəxsiyyətlər fonunda sığınacaqları bir kölgənin, bir dəyərin olmaması ilə bağlıdır.
Əbülfəz bəylə tanışlığımın haradasa 50 illik bir tarixi var. Bu tarixin yaddaqalan səhifələrini vərəqlədikcə maraqlı məqamlar göz önünə gəlir. 1970-ci ildə Universitetin tarix fakültəsinin birinci kursuna daxil olanda məni Əbülfəz bəylə həmin fakültənin beşinci kursunda oxuyan həmyerlim Mirheydər Mirzəyev tanış etmişdi. Mirheydər çox istedadlı bir tələbə idi və universiteti qurtaran kimi qədim dövr üzrə ixtisaslaşmaq üçün fakültədə müəllim kimi saxlanıldı. Az sonra Leninqarad Şərqşünaslıq İnstitutunda qədim dilləri və tarixi öyrənmək üçün ezam edildi. Gözəl mütəxəssis kimi formalaşdı. Və sonralar da biz onunla birlikdə Əbülfəz bəylə tez-tez görüşürdük. Görüşlərimiz daha çox Azərnəşrin arxasındakı çayxanada olurdu. Bəzən Goburnat bağındakı qala divarına bitişik çayxanada da söhbətlərimiz olurdu.
1971-ci ildə Əbülfəz müəllim bizə dərs dedi. O, tələbələrinin qəlbini ovsunlamağı bacarırdı. Doğrusu onun dərslərini səbirsizliklə gözləyirdik. Vətən, millət, milli hökumət, Atatürk, Rəsulzadə, Osmanlı irsi və Türkiyə haqqında yasaq söhbətləri biz ilk dəfə onun dilindən eşitdik. Elə buna görə də Əbülfəz bəyi 1975-ci ilin yanvarında DTK həbs etdi. Universitetin tarix və şərqşünaslıq fakültəsindən çoxlu müəllim və tələbələr istintaqa cəlb edildi. Mirheydər müəllim də onların arasında idi. Əbülfəz bəyə qarşı Sovet quruluşuna qarşı yönəlmiş millətçi-cinayətkar təbliğat ittihamı irəli sürülmüşdü. Bu ittihamı “sübuta” yetirmək üçün təzyiq, şantaj, qorxutma üsullarından istifadə edib bəzilərindən “gərəkli” ifadələri ala bilmişdilər. Qəribə də olsa müəllimlər arasında sınanların sayı, tələbələr arasında sınanların sayından çox idi. Bəzi tələblər isə məhkəmə prosesində ifadələrin onlardan təzyiq altında alındığını açıqca dedilər.
Biz artıq həmin il 5-ci kurs tələbələri olduğumuzdan bir az sərbəstliyimiz var idi. Mən bir neçə dəfə Əbülfəz bəyin Ali Məhkəmənin iclas zalında keçirilən məhkəməsində iştirak edə bildim. Proses çox maraqlı idi. Xüsusi ilə məhkəmə prosesində onun özünü kifayət qədər sərbəst aparması çoxlarına heyrətamiz gəlirdi. Bu bir siyasi proses idi və bu açıq siyasi prosesdə o, ittiham olunandan ittiham edən obrazını yarada bildi. Sözün tam mənasında Əbülfəz bəy bu məhkəmə prosesində hələ ki Allahın adının kiçik həriflə, KGB adının isə böyük hərflə yazıldığı bir cəmiyyətdə təhlükəsizlik orqanlarının çoxlarına qorxunc görsənən xofunu qıra bildi. Bu onun DTK üzərində ilk böyük mənəvi qələbəsi idi.
Əbülfəz bəy ona verilmiş cəza müddətini Qaradağ həbsxanasında başa vurduqdan sonra DTK-nin təqdimatı üzrə ona nəinki universitetdə, ümumiyyətlə ali məktəblərdə işləmək, tələbə auditoriyasına girmək qadağan edilmişdi. Üzərində nəzarət olmaq şərti ilə ona Əlyazmalar İnstitutunda elmi işçi “vəzifəsi” vermişdilər və bu zaman mən artıq rayonda işləyirdim. Ara-sıra Bakıya gələndə onun Elmlər Akademiyasının birinci mərtəbəsində yerləşən “elmi işçi” masasının ətrafında bəzi görüşlərimiz olmuşdu.
Çox şeylər oldu keçdi. Əbülfəz bəy Kələkiyə gedəndə onun yanına ilk gedənlərdən biri mən oldum. Bəri başdan deyim ki, bir çoxları kimi mən də həmin gecə prezident aparatında gecələməyimə baxmayaraq Əbülfəz bəyin Bakını tərk etməsindən və hara getməsindən xəbərsiz idim. Həmin axşam şəhərin müxtəlif yerlərindən ara-sıra atəş səsləri gəlirdi. Lakin bütün bunlar paytaxtı tərk etmək üçün yetərli deyildi. Vətəndaş müharibəsini önləmək dəlili məsələnin tam izahı deyil. Görünür bizim bilmədiyimiz ayrı təhlükəli məqamlar varmış. Mən onda da bu fikirdə indim və indi də bu fikirdəyəm ki, qiyamı vurmaq lazım idi və buna imkan var idi. Bunu prezidentin tapşırığı ilə onun adından hazırladığım xalqa müraciətdə də ifadə etmişdim. Lakin hadisələr çox dramatik formada cərəyan edirdi. Soyuq müharibədə böyük təcrübə toplamış Rusiya kəşfiyyat və əks kəşfiyyat orqanları tam gücü ilə psixoloji təzyiq vasitələrindən istifadə edirdi. İran da qiyamçılara öz “dəstəyini” əsirgəmirdi.
Qiyam başlayanda prezidentin göstərişi ilə xalqa müraciətin mətnini mən hazırlamışdım. Əbülfəz bəy onu redaktə etdikdən sonra müraciət prezident aparatının mətbəsində böyük tirajla çap edilib komplektləşdirildi. Lakin Heydər Əliyevin planı üzrə İmam Mustafayev prezidendən bir dəstə adamla Gəncəyə göndərilməsi xahihişi ilə Əbülfəz bəyin qəbuluna gələndən sonra müraciətin yayılması dayandırıldı və yüzminlərlə nüsxə müraciət prezident aparatının zirzəmisində qaldı.
Kənddə günlərlə, həftələrlə yox, aylarla maraqlı söhbətlərimiz oldu Əbülfəz bəylə. 1993-cü ilin payızında Heydər Əliyevin göndərdiyi heyət Kələkiyə gələndə mən də orada idim. Əsasən alimlərdən ibarət olan bu heyətə akademik Eldar Salayev rəhbərlik edirdi. Onlar Əbülfəz bəydən istefa ərizəsini almaq üçün gəlmişdilər. Heyətin üzvlərinin əksəriyyəti mənimlə təkbətək görüşdə yerinə yetirdikləri “missiyadan” narazı olduqlarını ifadə edirdilər. Heyətin tərkibində Bəkir Nəbiyev, Cahangir Qəhrəmanov, Fərəməz Maqsudov, Ağamusa Axundov, Ramiz Rizayev, Kamal Abdullayev və ümumilikdə 20 nəfərə yaxın tanınmış alimlər var idi. Kənddə yerləşən Geologiya idarəsinin binasında heyətlə geniş görüş keçirildi və Əbülfəz bəy istefa verməyəcəyini açıq şəkildə ifadə etdi. Bir nəfər istisna olmaqla onlar geri döndükdən sonra Milli Məclisdə hesabat verdilər ki, guya Əbülfəz bəy istefa vermək istəyirdi, Cəmil Həsənli buna imkan vermədi. Halbuki bu tamamilə yalan idi. Məhz, buna görə 1995-ci ilin mart ayında OMON hadisəsi baş verəndə saxta bir ittihamla məni də həbs etmək istəyirdilər və prokurorluq evimdə axtarış aparmışdı.
Sonralar Kələkiyə getmək çətinləşdi. Naxçıvandan ta kəndin girəcəyinə qədər postlar qoymuşdular. Bəzən biz böyük çətinliklə UAZ maşınlarda dağ yolları ilə kəndə getməli olurduq. AXC-nin AXCP-yə çevrilməsi ilə bağlı məsələləri belə çətin şəraitdə biz bəylə Kələkidə müzakirə etməli olduq. Orada öz doğum günündə hər il iyun ayının 24-də Əbülfəz bəyin ad günündə Kələkiyə gələn Nəcəf Nəcəfov, Əkrəm Əylisli, Rüstəm Behrudi, Türkiyədən və Azərbaycanın müxtəlif yerlərindən gələn insanlarla (məsələn Qara Tofiq), hətta sonradan dönük çıxan bir sıra insanlarla maraqlı və yaddaqalan görüşlərimiz olub.
Qiyam nəticəsində devrilən milli liderlərin öz kəndinə “mühacirət” etməsi Şərqdə birinci hadisə deyildi. 1953-cü ilin avqust qiyamından sonra İranın millətçi baş naziri Məhəmməd Müsəddiq də xarici güclərin əli ilə eyni yolla, eyni üsulla hakimiyyətdən devrilmiş və ömrünün qalan hissəsini (1967-ci ilə qədər) doğma Əhmədabad kəndində keçirməli olmuşdu. Müsəddiq maraqlı və cəsarətli siyasətçi idi və o, İran məclisinin yeganə deputatı idi ki, Məhəmməd Reza şah məclisə gələndə ayağa durmurdu. O, bir növ XX əsrin ikinci yarsında İran gəncləri üçün milli lider obrazı idi. Sonradan məlum oldu ki, onun devrilməsi üçün Mərkəzi Kəşfiyyat İdarəsi 1 milyon dollar pul buraxıbmış. Bu pulların bir hissəsi bəzi ictimai təşkilatlara verilmişdi ki, onlar Tehran küçələrində Tudəçi “adı” ilə Müsəddiqi müdafiə “mitinqləri” keçirsinlər, millətin gözündə onun kommunistlərə “yaxınlığının” görüntüsünü yaratsınlar.
Eyni şeylər 40 il sonra Azərbaycanda da təkrar olundu. Əbülfəz Elçibəyin devrilməsinə qonşu dövlətlər nə qədər pul buraxmışdı, daxili “vəsaitlərdən” qanuni hakimiyyəti devirmək üçün necə istifadə edilmişdi? Bunun daxilə aid olan hissəsini bir dəfə Əbülfəz özü açıqladı. Yəqin xaricə aid olan hissəsi də gələcəkdə aydınlaşacaq.