Milli Şuranın sədri, professor Cəmil Həsənli
Baş Prokurorluq bugünkü açıqlamasında bildirir ki, 2021-ci ilin birinci yarısında Azərbaycanda 322 nəfər intihar edib. Bu hər günə 1.78 nəfər Azərbaycan vətəndaşının özünü öldürməsi deməkdir. Deməli orta hesabla hər günə ölkəmizdə 1-2 intihar hadisəsi düşür, hər günə. Əgər nəzərə alsaq ki, ölkə əhalisinin 30-35 faizi respublikadan kənarda yaşayır, ölkədə bu qədər intihar hadisəsinin baş verməsi həyəcan doğuran bir faktdır.
Lakin prokurorluğun açıqlamasında bunun səbəbləri açıqlanmayıb, intiharı doğuran səbəblər, sosial, iqtisadi və psixoloji təsirlər təhlil edilməyib. Eyni zamanda açıqlamada ötən ilin və ya illərin müvafiq dövləri ilə müqayisədə intihar hadisəsinin kəskin artmasını doğuran amillər, statistik göstəricilər müqayisəli təhlili, intihar edənlərin cinsi nisbəti və yaş həddi qeyd edilməyib.
Ən başlıcası isə cəmiyyətimizdə artıq gündəlik xarakter alan intihar hadisələrinin qarşısını almaq üçün hansı dövlət tədbirlərinin görüldüyü, önləyici addımların atılması məsələsinə də açıqlamada toxunulmur. Bu ağır sosial sarsıntının aradan qaldırılması ilə bağlı hakimiyyət orqanları hansı tədbirləri həyata keçirmək istəyir? Bütün bu sual da açıqlamada cavabsız qalır.
Hətta bizim bəyənmədiyimiz sovet dövründə intiharlarla bağlı respublika prokurorluğu çox detallı təhlillər aparırdı. Məsələn, nümunə üçün birini deyim: Respublika Prokurorluğunun 1962-ci ildə və 1963-cü ilin 1-ci kvartalında intihar və özünə qəsd halları ilə bağlı hazırladığı arayışda göstərilirdi ki, 1962-ci ildə respublikada 281, 1963-cü ilin 1-ci rübündə isə 58 intihar və özünə qəsd hadisəsi baş vermişdir. 1962-ci ildə intihar edənlərin 101 nəfəri kişi, 180 nəfəri qadın, 1963-cü ilin birinci rübündə intihar edənlərin 38 nəfəri kişi, 20 nəfəri isə qadın idi. Bütövlükdə intihar edənlərin 65 faizi 40 yaşına qədər olan insanlar idi. Onların 83 nəfəri fəhlə, 44 nəfəri xidmətçi, 30 nəfəri kolxozçu, 24 nəfəri tələbə və şagird, 40 nəfəri evdar qadın, 12 nəfəri pensiyaçı və 2 nəfəri hərbi xidmətçi idi. Qeyd edilən dövrdə Bakıda 200, Kirovabadda (Gəncədə) 16, Quba rayonunda 10, Qasım İsmayılovda 17, Füzuli rayonunda 7, Göyçay rayonunda 6, Qazax rayonunda 6, Bərdə rayonunda 4, Sumqayıt şəhərində 3, Xanlar, Qusar və Kürdəmir rayonlarının hər birində 2 intihar hadisəsi olmuşdu. Qeyd edilən statiska ilə yanaşı intihar hallarını doğuran sosial, iqtisadi, mənəvi və mental səbəblər arayışda geniş təhlil edilirdi.