AXCP Rəyasət Heyətinin üzvü Fuad Qəhrəmanlı
44 günlük müharibənin nəticəsi olaraq, deyildiyi kimi, münaqişə nəinki bitmədi, indi əlavə olaraq Rusiya ilə yaranan gərginlik Qarabağ münaqişəsinin siyasi qarşıdurma xəttini genişləndirərək, problemin miqyasını daha da böyüdüb. Bu gün bir daha təsdiq olunur ki, Ermənistanın müttəfiqi Rusiyanın qoşunlarının “sülhməramlı” adı altında Qarabağa gətirilməsi Azərbaycanın döyüşlərdə əldə etdiyi üstünlüyü bloklayaraq, problemin sonrakı mərhələsində hərbi uğurumuzdan düşmənə təzyiq vasitəsi kimi istifadə etməyimizi əngəlləyir. Hələ bu azmış kimi, Lavrovun Bakı səfərindən sonra Rusiyanın təlimatı ilə Ermənistanla sərhəddə idarə olunan gərginliyin yaranmasında iştirak edib, Moskvanın Azərbaycan-Ermənistan sərhəddini nəzarətə götürməsinə də yardımçı olduq. Bu səhvlərin yanı sıra, onu da xatırlasaq ki, 44 günlük müharibə bitən kimi Rusiya Azərbaycan iqtidarının əli ilə Türkiyənin bərabər əsasla sülhməramlı missiyada iştirakının qarşısını alıb, o zaman bugünkü uğursuz vəziyyətin “hər şeyi bilən adamın” buraxdığı diplomatik-strateji səhvlərin nəticəsi olduğu da aydın olar.
Nəinki Qarabağda, bütövlükdə Cənubi Qafqazda hərbi strateji nəzarəti ələ alan Rusiya Qarabağda aldığı güzəşt və imtiyazlarla kifayətlənməyərək, regionda hərbi balansı işğalçı Ermənistanın xeyrinə dəyişməyə çalışır. Həm də diqqəti çəkən odur ki, Rusiya dunu gizli deyl, Azərbaycana nümayiş etdirməklə açıq şəkildə həyata keçirir. Bu iş təkcə hərbi sahədə deyil, həm də Qarabağdakı separatçı rejimi gücləndirməklə və legitimləşdirməklə, himayə etməklə paralel şəkildə həyata keçirilir. Rusiya MN-nin “Qarabağ silahlı birləşmələri” ifadəsi işlətməsi, Şuşa şəhəri ətrafında pozulan atəşkəsə görə Azərbaycanın ittiham edilməsi bütün diplomatik çərçivələri kənara qoyaraq, Moskvanın Qarabağ məsələsində ikinci Ermənistan kimi davranmas deməkdir. Demək, bu bir tərəfdən Cənubi Qafqazda hərbi-strateji balansı Rusiyanın özü ilə bərabər, həm də Ermənistanın xeyrinə dəyişmək üçündürsə, digər tərəfdən də Azərbaycana təzyiq məqsədi daşıyır.
Qısacaq olaraq bu təzyiqin məqsədini aşağıdakı ardıcıllıqla müəyyən etmək olar:
- Azərbaycanın KTMT-ə daxil olması.
- Qarabağdakı sülhməramlı qüvvələrin statusu haqda müqavilənin imzalanması.
- Azərbaycanın Avrasiya İttifaqına daxil olması.
- AB ilə imzalanması gözlənilən sazişdən imtina olunması.
- Mahiyyətdə Rusiyaya xərac vermək olan, dəyəri milyardlarla ölçülən məhsulların alınması.
- Rusiyanın Qarabağdakı fəaliyyətinin xərclərinin Azərbaycan tərəfindən ödənilməsi.
Ona görə də Moskva getdikcə daha aqressiv ton seçməklə, Azərbaycana açıq təzyiq yolunu tutub. İlham Əliyevin Moskvanın Ermənistanı silahlandırması ilə bağlı ehtiyyatlı etirazına Rusiya XİN sözçüsü səviyyəsində “bu bizim suveren hüququmuzdur, Cənubi Qafqazda hərbi strateji balansın bərabərləşməsni istəyirik” deməklə, açıq və birmənalı şəkidə Azərbaycanın etirazlarına məhəl qoymamaq, Ermənistanı revanşa hazırlamaq, onun yeni təcavüz planlarına dəstək verməkdir.
Buyurun, bu da “Rusiya bizim mütəfiqimizdir” bəyənatlarının, hər fürsətdə Putinə təşəkkür etmələrin, “sülhməramlı” adı altında rus qoşunlarının Qarabağa gətirilməsinin qarşılığında Moskvanın cavabı.
Demək ki, Azərbaycan öz xarici siyasətində kordinal dəyişikliklər etməklə Rusiyaya cavab verməlidir. Yoxsa ki, bu iş arada bir, İlham Əliyevin müsahibələrdə dilə gətirdiyi narazılıqlar səviyyəsində olacaqsa, heç bir nəticə hasil omaz. Rusiyanın açıq şəkildə Ermənistanı dəstəkləmək siyasətinə cavab olaraq Azərbaycan iqtidarına aşağıdakı istiqamətdə addımlar atmağı təklif edirik:
🔸Türkiyə ilə imzalanmış Şuşa Bəyannaməsinin birgə hərbi müdafiə müddəasının həyata keçirilməsi üçün iki ölkə arasında bu məqsədi gerçəkləşdirəcək icra mexanizmlərini nəzərdə tutan hərbi müqavilələr imzalamaq və işğaldan azad edilmiş ərazilərdəki təmas xətti yaxınlığında Türkiyə hərbi bazalarını yerləşdirmək.
🔸Azərbaycan Parlamenti Rusiyanın neytrallıq mövqeyini pozmasını və sülhməramlı missiyanı yerinə yetirməməsini əsas gətirərək rus hərbi hissələrinin Qarabağdan çıxarılması barədə qərar qəbul etməlidir.
🔸 Bundan əvvəl Gürcüstanda keçirildiyi kimi, Azərbaycan ərazisində də Gürcüstan, Türkiyə də daxil olmaqla, birgə NATO təlimləri keçirmək.
🔸Hər hansı nəticə əldə etmək üçün deyil, məhz Rusiyamın Qarabağ üzərindəki hərbi və siyasi dominantlığını aradan qaldırmaqdan ötrü ATƏT Minsk Qrupu müzakirələr üçün alternativ beynəlxalq platforma kimin qəbul edilməli, eyni zamanda Minsk Qrupunun konfransını çağrıb həməsədrilik indtitunda dəyişiklik edilməsinə çalışılmalıdır.
🔸Parlamentdə Laçın dəhlizinin humanitar statusunu təsbit edən qanun qəbul edilməli və bu dəhlizin eni məsələsinə yenidən baxılmalı, dəhlizin girişində Azərbaycan dövlət orqanlarının sərhəd buraxılış məntəqəsinin fəaliyyəti hüquqi baxımdan təsbit olunmalıdır.
🔸Azərbaycan dövləti Qarabağ probleminin hazırkı durumu və öz həll təklifləri ilə bağlı beynəlxalq sülh konfransı çağırmalı, rus hərbçilərinin BMT mandatı ilə regiona gələcək beynəlxalq sülhməramlı kontingentlə əvəzlənməsini gündəmə gətirilməlidir.
🔸Rusiyanın Jirinovskinin dili ilə ifadə olunan hədə və təzyiqlərinə rəğmən, ölkə daxilində Qarabağ masası yaradılmalı, digər məsələlərdə fikir ayrılıqlarına rəğmən Qarabağ mövzusunda siyasi müxalifət və vətəndaş cəmiyyəti təmsilçiləri ilə məsləhətləşmə və dialoq qurulmalı, xarici təzyiqlərə qarşı milli birlik platforması yaradılmalıdır.
🔸 Paşinyanın İlham Əliyevlə birbaşa, vasitəçisiz görüş təklifi qəbul edilməli, Rusiyanın iştirakı və xəbəri olmadan problemin həlli istiqamətində müzakirələr aparılmalıdır. Bu həm də Azərbaycanın beynəlxalq səviyyədə sülhpərvər imicini möhkəmləndirər.