Milli Şuranın sədri, professor Cəmil Həsənli
Deməli bu ilin 7 ayı ərzində ölkəyə ərzaq idaxalı 1 milyardı ötüb. Yəni Azərbaycanın idxal ərzaqdan asılılığı daha 14 faiz artıb. Bəs Ilham Əliyev deyirdi ki, bu il k/t-da 12 faiz inkişaf olub. Əgər 12 faiz inkişaf olubsa ərzaq idxalından asılılıq niyə 14 faiz artıb? Ötən illə müqayisədə taxıl idxalı da artmaqda davam edir. Bu ilin 5 ayında Azərbaycan xaricdən 99 milyon 808 min dollar dəyərində 392 min 213 ton buğda idxal edib. Dövlət Gömrük Komitəsinin aylıq hesabatına baxsaq görərik ki, idxal olunan buğdanın dəyəri 33,7%, həcmi isə 14,7% artıb. Bu da Sizin üçün ağıllı kənd.
2008-ci ildə İlham Əliyev ölkənin ərzaq təminatı haqqında qərar qəbul edəndə qeyd edirdi ki, 2015-ci ilə qədər Azərbaycan idxal ərzaq yükündən azad olacaq. Amma regionların “inkişafına” milyardlarla dollar xərcləndikdən sonra biz ərzaq idxalından asılılığın daha da artdığının şahidi oluruq. Çünki ərzaq idxalı həm də korrupsiya idxalı, korrupsiya bazarının çiçəklənməsi deməkdir.
Ağıllı kənd demişkən bu “ağıllı ideyalarla” ölkəni dəli yığıncağına çeviriblər. Bir vaxtlar nəqliyyatın intellektual (yəni ağıllı) idarəetmə sisteminin təkmilləşdirilməsi adı altında yeni korrupsiya mənbəyi əldə etdilər. Sonra məlum oldu ki, Qobustan qayaüstü rəsmlərdə hərəkətin istiqamətləri daha anlaşılan göstərilib, nəinki bizin nəqliyyatı intellektual idarəetmə mərkəzinin “ağıllı” istiqamət işarələrində.
İndi də bir tərəfdən İlham Əliyev Zəngilanda “ağıllı kəndin konturlarını cızır, hökumətin qərarı ilə Azərbaycanda abonentlərin ağıllı sayğaclarla təchiz edilməsini nəzərdə tutan qanun təsdiqlənir, digər tərəfdən isə, “Azəriqaz” bir neçə il əvvəl quraşdırılmış ağıllı sayğacları yararsız hesab edib, onları böyük sürətlə mexaniki sayğaclarla əvəz etmə əməliyyatına başlayıb. Hər ikisinin arxasında vətəndaşı soymaq, xalqın cibinə girmək, yeni korrupsiya yerləri aşkarlamaq niyyətləri dayanır.