Yağışla içimə yağan duyğular
AXCP Rəyasət Heyətinin üzvü Fuad Qəhrəmanlı
Yaxşı xatırlayıram, tələbəlik dövründən yağışlı tutqun havalarda evdən çıxmazdım. O zaman bunun səbəbini anlamırdım. Belə vaxtlarda sadəcə özümə qapanıb susqun birinə çevrilirdim. Bu anlarımda düşüncəmin də yağan yağış damlalarına qarışıb məndən ayrıldığını hiiss edirdim. Onlardan geriyə qalan yalnız hüdudsuz bir kədər olurdu. Özümü bu sonsuz kədər girdabında tərk edilmiş, atılmış bir körpə kimi aciz, gücsüz hiss edirdim. Niyə belə olur, məni dəyişən kənar güc nədir? Bu sual hər dəfə ağlıma gəlsə də, etiraf edim ki, kədərə təslim olmuş halımıla, düşüncələrin məni tərk etdiyi bu durumda, hər hansı cavab tapmaq iqtidarında deyildim.
Ancaq hər zaman içimdə payızın solğunluğuna, tutqun, boz havalara gizlin, özümə etiraf belə etmək istəmədiyim bir istək hiss edirdim. Bilirdim ki, bu əslində təhtəlşüuri olaraq özündən qaçmaq istəyidir .
İnsanlar adətətən yorğun olanda istirahətə, dincəlməyə səfalı yerlərə, maraqlı məkanlara getmək istəyirlər. Mən də ətrafdakılardan, özümdən yorulanda bu qapalı, susqun və kədər çölündə tərk edilmiş o halıma dönmək istəyirdim. Ancaq bu “istirahətə” getmək təkcə mənim istəyimdən asılı deyildi. Bunun üçün gərək payızın insanın içinə tənhalıq əsdirən soyuq nəfəsini, adamın ruhunu küsdürən boz tutqun havanın qüssəsini, günəşin həyat dolu şüalarının önünün qara buludlarla kəsilməsini görüb duyasan.
Sonralar mən bu halımın səbəbini öyrəndim. Həyatda elə şeylər var ki, biz onu ağılla dərk etmək iqtidarında deyilik. Bəzən ağlımıza sonsuz güvən üzündən çox lovğa görünürük. Ancaq bəzən elə həqiqətlər olur ki, biz onları yalnız ağlın yanında dəyərsizləşdirib küçümsədiyimiz duyğularla, hisslərlə dərk edə bilirik. Hisslərin dərk etməsi də, ağılın idrakından fərqlidir. Hisslər bizə həqiqəti yuxu kimi heç bir məntiqə söykənməyən, mücərrədliklərlə təqdim edir. Bu zaman biz bilmirik, yalnız həqiqəti hiss edirik. Kim deyə bilər ki, həqiqəti bilmək, onu hiss etməkdən daha üstündür. Biz nə qədər bilsək də, hiss etmədən o həqiqəti ruhumuza, içimizə hopdura bilmərik. Bu gün həqiqəti tapdalayıb boğanların əksəriyyəti onu tanıyırlar, ağılla qavrayırlar, ancaq o ayaq altında məhv etdikləri həqiqəti duya, hiss edə bilmədikləri üçün etdikləri əməllərin acısını da duymurlar. Ona görə də elə rahat ola bilirlər.
Hə, mən bax bu hisdiyatla yağışa, tutqun boz havalara olan daxili ehtiyacımın səbəbini sonrakı illərdə tapdım. Hiss etdim ki, hava üzünü asanda, buludlar qaşqabağını tökəndə, günəş küsüb bizdən üz çevirəndə təbiət kədərlənir və bu kədərlə mənim içimdəki hüzün, kədər arasında bir harmoniya, uyum yaranır. Sanki içimdəki duyğular bütün aləmə hakim olur, bu halımıla təbiətlə doğmalaşıb iç – içə ola bilirəm. Bizi burləşdirən, bir bütöv çevirən hüzün və kədər aradakı fərqi götürərək məni bu dünyaya, dünyanı da mənə çevirir. O zaman hiss edirsən ki, sən təbiəti duya, anlaya bildiyin kimi, təbiət də səni duyur, anlayır. Bu ekstaz halında artıq kimsəyə ehtiyac qalmır. Kədərin, hüznün əzəmətli böyüklüyündə dünya ilə eyniləşmə, özündən vaz keçib insan kimliyini təbiətin bir parçası kimi hiss etmə var. O zaman sən yağan yağış damlasının ayrıldığı buludlara duyduğu həsrətli nisgili, damla olub göylərdən yerə enmənin, olduğu yerdən aşağı düşmənin əzabını, yerə öz şüalarını saça bilməyən günəşin utancını, hər kəsə qaş qabağını sallamış qara buludların hikkəsini, heç nəyə məhəl qoymadan əsən küləyin hərdəm xəyal veyillənmələrini olduğu kimi hiss edə bilirsən. Mən bu kədəri, mənə bunları duyuran kədəri də bu üzdən sevirəm. Bu gün o kədər yenə yağış damlaları ilə içimə qonaq gəlmişdi.