İctimai fəal Bəxtiyar Hacıyev
Azərbaycanda vətəndaşların həyatlarının məhv edilmə prosesi davam edir. Fotoda gördüyünüz şəxs Niyaməddin Əhmədovdur. Heç bir cinayət törətmədiyi halda “terroru maliyyələşdirmə” və digər maddələrdə ittiham olunur, dövlət ittihamçısı bu gün ona 15 il həbs cəzası verilməsini istəyib.
Soruşa bilərsiniz ki, necə ola bilər ki, Qarabağ uğrunda döyüşlər zamanı Azərbaycan əsgərlərinə qarşı güllə atmış, bir çox müharibə cinayətlərində iştirak etmiş real terrorçuları normal şəkildə mühakimə edib, sonra buraxırlar, amma Azərbaycan vətəndaşı cinayət etmədiyi halda 15 il həbsə göndərmək istəyirlər? Səbəb sadədir – Niyaməddin Əhmədov müxalif AXCP sədri Əli Kərimlinin mühafizəçisi olub, onu həbs edərək Əli Kərimli əleyhinə ifadə verməsi üçün işgəncəyə məruz qoyublar, o isə başqasına, öz dəstəklədiyi siyasətçiyə böhtan atmaqdan imtina edib.
Bir müddətdir başqa bir AXCP üzvü Elzamin Salayevin də həbsdə qeyri-insani rəftar, işgəncə görməsi ilə bağlı həyəcanlı xəbərlər yayılır.
Azərbaycan hakimiyyəti elə bilir ki, belə qeyri-insani rəftarla, işgəncələrlə öz gücünü göstərir. Ancaq reallıqda bu kənardan Əliyevin AXCP-dən nə qədər qorxduğunu, bu quruma qarşı nə qədər kin bəslədiyini, hakimiyyətin acizliyini göstərir. Özünə, tutduğu yolun doğruluğuna inanan heç bir güclü siyasi lider rəqiblərinə qarşı bu qədər insanlıq çərçivəsinə sığmayan şərləmə, təzyiq, işgəncəyə əl atmaz. Tarixdə bu yolu seçənlərin acı, faciəli sonlarını çox görmüşük, bu dəfə də belə olacağına şübhə yoxdur.
Heç kim “AXCP-dən mənə nə? Nə Niyaməddin tanımıram, nə Elzamin, bunun mənə nə aidiyyatı?” deməsin, bu gün başqa insanların şərlənməsinə cəmiyyət olaraq susduqca, sabah sıra bizə də, sizə də, ailələrimizə, qohumlarımıza, dostlarımıza gələcək.
Bundan əlavə bu şəxslər Azərbaycan vətəndaşları, insandırlar. Onların da anaları, ataları, əzizləri, övladları var və insan faciələrinə qarşı səssiz qalmaq insani dəyərlərə ziddir.
Prinsip sadə olmalıdır: Heç kim cinayət törətmədiyi halda şərlənərək həbs edilməməli, işgəncə görməməlidir və cəmiyyət olaraq şərlənərək həbs edilmiş bütün siyasi məhbusların azadlığını uca səslə tələb etməliyik.
Bütün siyasi məhbuslara azadlıq tələb edirik!