Keçmiş siyasi məhbus Fuad Əhmədli Ədliyyə Nazirliyi Penitensiar Xidmətinin manyaklarını ifşa edir:
Bu araşdırma nəticələrimin bir hissəsi və həbsdə olduğum dövrdə uzunmüddətli məhkumlarla apardığım söhbətlər zamanı ortaya çıxan məlumatlardır.
Pentensiar Xidmətə tabe olan CÇM rəislərinin uzun illərdir bircə kəlimə “молодец!” sözünə görə daim siyasi məhbuslar üzərində müxtəlif təcrübələr keçdiyini yəqin ki, hamımız xatırlayırıq. Hətta mən, Asif Yusifli, Əfqan Muxtarlı və Məmməd İbrahim bəylər eyni vaxtda 16 saylı CÇM-də olduğumuz dönəmdə də rəis Şahin Həsənov (sonra Şəfahət Abbasov) eləcə də dəyişməz muavin Eminəliyev Eminin amansızlıqları, qanunsuz işgəncə və korrupsiya faktları haqqında mətbuata az xəbər göndərməmişdik.
Həmin bu Şakir Qəniyevin də haqqında həmin ərəfələrdə eşidirdik. Deməli həmin bu reket xislətli Qəniyev Pentensiar Xidmətin keçmiş rəisi Aydın Qasımovun komandasından olan və ən müstəsna oyunbazlıqlarıyla seçilən “vurulması məsləhət olmayan köhnələrdəndir”. Həmin komandada əsas aparıcı rəislər isə:
1.Nizami Quliyev və qohumları (ehtiyac olarsa, bu barədə ayrıca açıqlama yazacam) – Vərəmli Məhbusların mualicə müəssisəsinin keçmiş rəisi və uzun müddət bütün CÇM-lərdəki “sözə qulaq asmayan” məhbusların döyüldüyü hətta öldürüldüyü sallaqxana.
- Avtandil Ağayev – Qobustan Həbsxanasının rəisi.
- Fikrət Qafarov – Qobustan Həbsxanasının, 2 saylı Gücləndirilmiş rejimli CÇM-in keçmiş rəisi və 10 saylı CÇM-nin hazırki rəisi.
- Şakir Qəniyev – 15 saylı Ciddi rejimli CÇM-nin keçmiş rəisi, 2 saylı CÇM-də Fikrət Qafarovun muavini və hazırda 17 saylı CÇM-nin rəisi.
- Emin Həsənov – 1 saylı ciddi rejimli CÇM-in rəisi.
- Elnur İsmayılov -1 saylı (Kürdəxanı) BİT rəisi.
- Əli Əmirov – 6 saylı gücləndirilmiş CÇM-nin keçmiş rəisi, məhkum Ruhani İbrahimovun qatili.
- Məmməd Mahmudov – 16 saylı CÇM-nin keçmiş rəisi, 6 saylı CÇM-nin hazırki rəisi.
və digərləri. (siyahını uzatmaq mümkündür.)
Zamanla adlarını çəkdiyim şəxslər CÇM-lərinin birindən o birinə köçürülmələrinin əsas səbəbi isə ilk növbədə siyasi məhbusların və məhkum birliyinin, müəssisə daxilində maddi təminatı yaxşı olan məhkumların “sıxışdırılması”, onlardan yaxşıca pul qoparılması niyyəti güdüb. Məsələn,26 avqust 2016-cı ildə Fikrət Qafarovun Qobustan Həbsxanasından azad edilərək 2 saylı CÇM-ə gətirilməsində və Şakir Qəniyevin də ona muavin təyin edilməsində məqsəd Rəşad Ramazanlı, Qiyas İbrahimov və İlqar Məmmədov kimi tanınmış siyasi məhbuslara təzyiq məqsədi güdüb. Ayrıca, daha sonra 2019-cu ildə Şakir Qəniyevin 15, Fikrət Qafarovun isə 10 saylı CÇM-ə təyin olunmalarının səbəbi 15-ci kalonda dindar məhbuslara, xüsusilə Səid Dadaşbəyliyə və 10 cu kalonda saxlanılan Orxan Baxışlı ya təzyiq göstərmək olub. Təsadüfi deyil ki, Orxan bəy məhz Fikrət Qafarov təyinatının ilk günlərindəcə 15 sutkalıq əsassız yerə karsa bağlanmış, 2 saylı CÇM-də Qiyas İbrahimova, Rəşad Ramazanlıya və İlqar Məmmədova isə edilən təzyiqlər intensivləşmişdir.
Həmçinin ötən gün çoxlarımızın adını yenicə eşitdiyi Şakir Qəniyev də 17 saylı CÇM-nin keçmiş rəisi Vüsal Aslanovun siyasi məhbuslara qarşı xüsusilə amansız olmaması və siyasi məhbus Elzamin Salayevə siyasi təzyiqlərdə maraqlı olmaması səbəbindən “yuxarılarla” xüsusi razılaşma əsasında rəis təyin edilmiş və ilk gündən də tapşırılan yaramaz işin icrasına əl qoymuşdur.
Bu şəxslərə təsir imkanında olan ölkə prezidenti Ilham Aliyev , Azərbaycan Respublikası Ədliyyə Nazirliyi şəxsən Fikrət Məmmədov, eləcə də Pentensiar Xidmət rəisi Ceyhun Həsənovdur.
Əgər Əlizamin bəyin qoluzorlu Şakir Qəniyev tərəfindən 2 dəfə vəhşicəsinə döyülərək əsassız yerə cərimə otağına yerləşdirilməsinə susan rəhbər qurumlar susmağa davam edəcəklərsə, bu rəzalətin birbaşa tapşırıq və təlimatları əsasında həyata keçirdiklərini etiraf etmiş olacaqlar.
Şakir Qəniyev və onun kimi azğın rəislər ölkə rəhbərliyi üçün nə qədər sadiq və önəmli insanlar olsalar da, onları dövlətin nüfuzundan daha da üstün görmək birmənalı şəkildə bu ölkəyə xəyanətdir.
Şakir Qəniyev və özü kimi kolleqaları qısa zamanda həbsə, Əlizamin Salayev və digər siyasi məhbuslar isə azadlığa buraxılmalıdırlar …
(Xüsusən Şakir Qəniyevlə bağlı mövzunu davam etdirəcəm.)