أنت الحلم
مع كل فتره عمريه بنعيشها بيبقي لينا حلم بيمثل لينا حلم العمر ، العجله ام جدون ، مسطره كانت حلم عمرنا واحنا عيال ، واننا نقفل الامتحان في ابتدائي حلم عمر ، او انن نطلع دكاتره ومهندسين زي ما كنا بنقول طول الوقت واحنا عيال ، انا اما هكبر هبقي دكتوره واصدق حلمي ، واحط يافطه علي باب الاوضه مكتوب عليها الدكتوره اميره ٤ ماحيستير و٣ دكتوراه ،كبرنا شويه وبقي حلم عمرنا نخلص ثانويه عامه وندخل كليه ، وطبعا نظام تنسيق مبيخليش حد يدرس اللي يحبه معروفه طبعا ،ولا بنشتغل اللي نحبه ، بس اقولكم علي سر كل اللي فات ده مش حلم العمر ولا نيله ، حلم العمر بجد هو حلم اني الاقي نفسي واكون نفسي بجد ، عارفين انا مره سمعت بنت بتقول انها حلم عمر امها ، بتخططلها حياتها بالملي ومستيه تجوزها عشان تكون حققت حلم عمرها هي ، طب بالنسبه للبنت دي فين حلمها ، ااحلام هي الامل اللي بنعيش بيه من غير الحلم عمرنا ما هنملك المشاعر الكافيه اللي تخلينا نكمل عمرنا ، لو هعرف الحلم فبالنسبالي هو الامل ، اما لو هعرف حلم العمر ، هو اني اقدر الاقي نفسي بجد وسط الميت شخصيه اللي مضطره اعيش بيهم ، عشان ارضي الجميع ، احنا بنعيش بشخصيات كتير بتقلبنا مسوخ عشان نحقق رضا لناس تانيه ، بنعيش طبقا لمجتمع بنذم فيه عشان التخلف والجهل أفه بترعي فيه ، وبنعيش بشخصيات شبيهه بأهلنا عشان رضا الوالدين ، وبنعيش بشخصيه غير عشان الشغل لازم يمشي ،وشخصيه غير قدام الناس علي مواقع التواصل ، وشخصيه غير فالواقع وسط صحابنا ، وكل شخصيه من دول بحلم مختلف يناسب للي بتمثله من افكار ، ازاى بقي احدد حلم العمر لكل الشخصيات اللي ملتحمه في كيان واحد مليان صراعات
لو هتسالني عن حلم عمرى بجد ،اني اكون حد واحد متجرد من كل افكار ، زي طفل بيتولد، بيشكل قناعاته طبقا لفطرته هو وبس ، مش طبقا لبذور زرعها غيره ، حلم عمرى هو اني معيشش .علي اني مجرد اداه لحلم مزيف ، والاكيد انه مش حلمي اصلا اني الاقي نفسي بجد ، واتصالح معاها بشيطانيتها و ملائكيتها ، هو الحلم اللي هحيا بيه العمر
