أكتب عن 25يناير في تدوينة ..ازاي يعني ؟!!
قعدت اسبوع افكر ممكن اكتب ايه لما صديق طلب مني اكتب عن ثورة يناير وتغييرها في حياتي .. وازاي هقدر اكتب 7 سنين في تدوينه !
هكتب عن تفكيري اللي اتغير بشكل كامل ؟ عن الانفتاح الثقافي ؟ عن الحنين للهتاف والجري في المظاهرات ؟ عن نزولي الميدان بدون علم أهلي ؟
طيب اكتب عن تفكيري في المعتقلين اللي لا زالوا معتقلين بعد 7 سنين من الثورة وإحساسي بالعجز طول الوقت تجاههم ؟
انا بخاف من أكام الناس علي الكتابات الشخصيه بشكل عام .. بخاف يتحسب عليا الكلام ويتحل بشكل غير مقصود .
ده مش مقال .. دي مجرد تدوينه مش عارفه اكتب فيها ايه .
ممكن عن احلامي .. هتافي بأعلي صوت وسط المظاهرات وكإن عقلي الباطن مقتنع بإن كل ما كان صوتي أعلي كل مالتغيير هيبقي أكبر وأقوي .
بعد الثورة بقيت مقتنعه ان كل فرد قادر علي التغيير سواء بشكل فردي أو وسط مجموعه .
لسه بعيط لما بسمع اغاني الثورة .. فلان اللي مطلعش جوه البرامج وكان بس صوته في قلب الهتاف . فعلا ؟!
لما كنت بمشي في وسط البلد كنت بدور في وشوش الناس .. ده في حركة ايه؟؟ ده في حزب ايه؟؟ والبنت د اكيد كانت في الميدان في يوم من الايام .
سؤال شاغل بالي طول الوقت .. هنعمل تغيير ؟ هنقدر ؟ معتقدش .. او اعتقد عادي .
بعد 7 سنين من الثورة عندي وعي سياسي بشكل ما .. الناس بقت عارفه ان فيه مظاهرات وشهداء ومعتقلين وملحدين وسجون ومثليين وترانس جندر وأقليات ونسوية وحقوق شخصية .
لسه حاسه بصلة دم رابطاني بكل شخص شارك في الثوره او عاصرها او لمح مشهد منها او ليه صاحب كان مشارك في الثورة او ليه قريب معتقل او يعرف حد مات في الثورة .
انا بكتب ده ولسه عندي أمل في التغيير ومقتنعه بوجوب الكتابه علينا .. توعية الناس .. محاولة الشرح .. مفيش اختيارات تانيه قدامنا . مجبرين نكتب عن كل حاجه وفي كل وقت .. مش يمكن نقدر ننشر الوعي لفردين اتنين حتي ؟
دي اصعب تدوينة كتبتها في حياتي ..
تدوينة عن ثورة 25 يناير في كام سطر .. فعلا !!!
