အကြမ်းဖက်စစ်ကောင်စီ၏ ပေါ်တာဆွဲခေါ်ဆောင်ခံရပြီးနောက် တိုက်ပွဲအတွင်း သေဆုံးခဲ့ရသည့် CUSS အတွင်းရေးမှူးအဖွဲ့ဝင် စိုင်းစံလှနှင့် ရှမ်းလူငယ်တစ်ဦးအတွက် ဝမ်းနည်းကြေကွဲရကြောင်း မူဆယ်ပြည်သူ့ကာကွယ်ရေးတပ်ဖွဲ့(PSDA)က ယနေ့ ထုတ်ပြန်သည်။
မူဆယ်ပြည်သူ့ကာကွယ်ရေးတပ်ဖွဲ့ (PSDA)နှင့် တအာင်းအမျိုးသားလွတ်မြောက်ရေးတပ်မတော်(TNLA)ပူးပေါင်းအဖွဲ့သည် ရှမ်းပြည်နယ်မြောက်ပိုင်း မူဆယ်မြို့နယ် မော့တောင်းရွာတွင် မေလ ၄ရက်က အကြမ်းဖက်စစ်ကောင်စီနှင့်တိုက်ပွဲအပြင်းအထန်ဖြစ်ခဲ့သည်။ ယင်းတိုက်ပွဲတွင် စစ်ကောင်စီတပ်ဖွဲ့ ခမရ (၂၄၁)မှ တပ်ဖွဲ့ဝင် ၁၆ဦးအပြင် စစ်ကောင်စီက ပေါ်တာဆွဲခေါ်လာသည့် ရှမ်းပြည်ညီညွတ်ရေးကော်မတီ(CUSS) အတွင်းရေးမှူးအဖွဲ့ဝင် စိုင်းစံလှနှင့် ရှမ်းလူငယ်တစ်ဦးလည်း သေဆုံးခဲ့သည်။
စစ်ကောင်စီတပ်ဖွဲ့က လူ့အခွင့်အရေးချိုးဖောက်ကာ အဓမ္မပေါ်တာဆွဲမှုကြောင့် အတွင်းရေးမှူးအဖွဲ့ဝင်(CUSS)၊ ဦးဆောင်ကော်မတီဝင်(TYN) ကျောက်မဲမြို့နေ စိုင်းစံလှ နှင့် ရှမ်းလူငယ်တစ်ဦး တို့ အသက်ဆုံးပါးခဲ့ရသည့်အပေါ် မိမိတို့တပ်ဖွဲ့အနေဖြင့် ကျန်ရစ်သူမိသားစု နှင့်ထပ်တူထပ်မျှ ဝမ်းနည်းကြေကွဲရပါသည်ဟု PSDA က ထုတ်ပြန်သည်။
မေလ ၄ရက် ညနေက စိုင်းစံလှနှင့်အခြားအမျိုးသားတစ်ဦးစီးလာသည့်ကားကို မော့တောင်းရွာအနီးတွင် အကြမ်းဖက်စစ်ကောင်စီက ပေါ်တာဆွဲသွားပြီးနောက် မကြာမီ တိုက်ပွဲဖြစ်ခဲ့ခြင်းဟု ဒေသခံများက ပြောသည်။
စိုင်းစံလှသည် ရှမ်းလူငယ်ကွန်ရက်(Tai Youth Network -TYN)၏ ဦးဆောင်ကော်မတီဝင်လည်းဖြစ်သည်။ စိုင်းစံလှသေဆုံးခြင်းသည် TYNအတွက် ကြီးမားသည့်ဆုံးရှုံးမှုဟုရှမ်းတိုင်းရင်းသားလူငယ်အချို့က ပြောသည်။
စိုင်းစံလှ ကွယ်လွန်ခဲ့သည့် ဖြစ်ရပ်အတွက် မိသားစုဝင်များ၊ လုပ်ဖော်ကိုင်ဖက်ရဲဘော်များအားလုံးနှင့်ထပ်တူ ဝမ်းနည်းကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ်(SNLD) ဗဟိုအလုပ်အမှုဆောင်ကော်မတီက သဝဏ်လွှာပေးပို့ခဲ့သည်။
တိုက်ပွဲနယ်မြေတွင် အရပ်သားအားပေါ်တာဆွဲခဲ့သည့်လုပ်ရပ်အတွက် တိုင်းရင်းသားအရေးလှုပ်ရှားသူများက စစ်ကောင်စီကို ပြစ်တင်ဝေဖန်ကြသည်။ ၎င်းတို့ကြောင့် လူငယ်နှစ်ဦး သေဆုံးခဲ့သည့်အပေါ် စစ်ကောင်စီက ရေငုံနှုတ်ပိတ် နေသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)