ကရင်နီ(ကယား)ပြည်နယ်၊ဖရူဆိုမြို့နယ် ထားလဲနဲ့ နန်းဖဲ ကျေးရွာတိုက်ပွဲတွင် စစ်ကောင်စီတပ်မှ သေဆုံးသူများ ပြားပြီး စစ်ကားနှစ်စီးအပါအဝင် လက်နက်ခဲယမ်းများ သိမ်းဆည်းရမိကြောင်း ကရင်နီသတင်းရင်းမြစ်များက People’s Springသို့ ပြောသည်။
ယနေ့(ဇွန် ၂ ရက်)တွင် စစ်ကောင်စီတပ်ယာဥ်တန်းကို ကရင်နီအမျိုးသားများကာကွယ်ရေးတပ်(KNDF)နှင့် ကရင်နီတပ်မတော် (KA) တို့ပူးပေါင်း၍ တိုက်ခိုက်ခဲ့ပြီးတိုက်ပွဲမှာ ပြင်းထန်ခဲ့ကာ စစ်ကောင်စီက လေကြောင်းပစ်ကူရယူခဲ့ရသည်ဟု ဆိုသည်။
![ဖရူဆိုမြို့နယ်တိုက်ပွဲ စစ်ကောင်စီတပ် အကျအဆုံးများပြီး စစ်ကားနှစ်စီးနှင့် လက်နက်ခဲယမ်းများပါ သိမ်းဆည်းရမိ](https://i0.wp.com/www.ludunwayoo.com/wp-content/uploads/2022/06/285654309_394334579422667_7304896930516921687_n.jpg?resize=880%2C587&ssl=1)
“မနေ့ကထဲက ထားလဲမှာ တစ်နေကုန် တိုက်ပွဲဖြစ်တာ။အဲဒီကနေ ရန်သူက ဘောလခဲ နန်းဖဲဘက်ကို ဆက်တိုးလာတဲ့အချိန် ဒီနေ့ တိုက်ပွဲက ပိုပြင်းထန်ခဲ့တာ။ညနေ ၄ နာရီလောက်မှာ လေယာဥ်နဲ့ ဗုံးလာကြဲတယ်”ဟု KNDF တပ်ဖွဲ့ဝင်တစ်ဦးက ရှင်းပြသည်။
![](https://i0.wp.com/www.ludunwayoo.com/wp-content/uploads/2022/01/PSA_inside_Story_Jan22-03.jpg?resize=880%2C229&ssl=1)
တိုက်ပွဲအတွင်း စစ်ကောင်စီဘက်က ထိခိုက်သေဆုံးမှုကို သက်ဆိုင်ရာတပ်ရင်းများက ထုတ်ပြန်မည်ဟုလည်း ၎င်းက ဆိုသည်။
ယခင်လ (မေ ၇ ရက်)ကလည်း ဖရူဆိုမြို့နယ် လောကျေခူ ကျေးရွာတွင် စစ်ကောင်စီယာဥ်တန်းကို KNDF တပ်ရင်း (၄)အပါအဝင် ကရင်နီတပ်မတော်မှ ပူးပေါင်းတိုက်ခိုက်ခဲ့ရာ စစ်ကောင်စီကားငါးစီးထက်မနည်းပျက်စီးပြီး သေဆုံးသူ ၄၀ ခန့်ရှိခဲ့သည်။
![ဖရူဆိုမြို့နယ်တိုက်ပွဲ စစ်ကောင်စီတပ် အကျအဆုံးများပြီး စစ်ကားနှစ်စီးနှင့် လက်နက်ခဲယမ်းများပါ သိမ်းဆည်းရမိ](https://i0.wp.com/www.ludunwayoo.com/wp-content/uploads/2022/06/285728942_394334606089331_6487636786815593763_n.jpg?resize=880%2C587&ssl=1)
ကရင်နီပြည်နယ်တွင် စစ်ကောင်စီက အင်အားတိုးချဲ့ကာ စစ်ကြောင်းထိုးနေ၍ နေ့စဥ်တိုက်ပွဲများဖြစ်ပွားလျက်ရှိသည်။
ယနေ့ နံနက်ပိုင်းကပင် လွိုင်ကော်မြို့ အရှေ့ခြမ်းတွင် ခလရ (၅၃၀)မှ အင်အား ၁၀၀ကျော်ဖြင့် စစ်ကြောင်းထိုးဝင်ရောက်လာကြောင်း ကရင်နီအမျိုးသားများကာ ကွယ်ရေးတပ် KNDF B – 14 က ထုတ်ပြန်ထားသည်။
ကရင်နီပြည်နယ်တွင် မေလနောက်ဆုံးပတ်အတွင်း ထိတွေ့တိုက်ပွဲ ခုနှစ်ကြိမ်ထက်မနည်းဖြစ်ပွားခဲ့ပြီး စစ်ကောင်စီတပ်သား ၁၇ ဦးထက်မနည်းသေဆုံးကာ KNDF ရဲဘော်တစ်ဦးနှင့် (၁၀၀၈)ခြေလျင်တပ်ရင်း ရဲဘော်တစ်ဦးကျဆုံးခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)