၂၀၂၂ ဘဏ္ဍာရေးနှစ်အတွက် အမျိုးသား ကာကွယ်ရေး ခွင့်ပြုချက် အက်ဥပဒေမှာ ထည့်သွင်း ဖော်ပြဖို့ အရေးကြီးတဲ့ လုပ်ငန်းစဉ်ကို ပါတီ နှစ်ရပ်စလုံးရဲ့ ညွှန်ကြားချက်နဲ့အညီ ဒီနေ့၊ အထက်လွှတ်တော်မှာ အကောင်အထည် ဖော်ခွင့်ရတဲ့အတွက် အတိုင်းမသိ ဝမ်းသာမိပါတယ်။
မြန်မာ ပြည်သူတွေ အတွက်တော့ တည်ငြိမ်တဲ့ ဒီမိုကရေစီ စနစ်မျိုး ခိုင်မာ လုံခြုံအောင် ထိန်းသိမ်းထားဖို့ ဆိုတာက ရှည်လျားပြီး ခက်ခဲ ကြမ်းတမ်းလွန်းတဲ့ တိုက်ပွဲတစ်ခုလိုပါပဲ။ ဆယ်စုနှစ်တွေနဲ့ချီ ကြာမြင့်တဲ့ထိ ကျွန်တော်ဟာ မြန်မာနိုင်ငံက ဒီမိုကရေစီ အင်အားစုတွေ၊ အတိုက်အခံတွေအတွက် ပိုပြီး ခိုင်ခိုင်မာမာ ရပ်တည်ပေးဖို့၊ သူတို့အပေါ် ဖိနှိပ်နေသူတွေအပေါ် အရေးယူ ပိတ်ဆို့တာတွေ ဆောင်ရွက်ဖို့၊ ပြည်သူ့ သဘောဆန္ဒနဲ့ နိုင်ငံတကာ ဖိအားတွေကြောင့် ပြီးခဲ့တဲ့ စစ်အစိုးရ ကြီးစိုးမှု အဆုံးသတ်သွားချိန်မှာ လွှတ်တော် ကိုယ်စားလှယ် စနစ်နဲ့ တင်မြှောက်တဲ့ အစိုးရမျိုး တည်ဆောက်နိုင်ဖို့အတွက် အစိုးရ အဆက်ဆက်ကို ကျွန်တော် တိုက်တွန်းခဲ့ပါတယ်။ ဒီအတောအတွင်း သူတို့ရဲ့ လှုပ်ရှားမှုတွေမှာ ကျွန်တော့် မိတ်ဆွေကြီး ဒေါ်အောင်ဆန်းစုကြည်တို့လို ရဲရင့်တဲ့ ခေါင်းဆောင်တွေနဲ့အတူ ရပ်တည်ခွင့် ရခဲ့တဲ့ အတွက်လည်း ကျွန်တော် သိပ်ဂုဏ်ယူမိပါတယ်။
အခု လောလောဆယ်တော့ ကျွန်တော့်ရဲ့ မိတ်ဆွေတွေဟာ နောက်ထပ် ရက်စက် ကြမ်းကြုတ်တဲ့ စစ်အာဏာရှင် တစ်ယောက်ရဲ့ လက်အောက်မှာ ဘေးဒုက္ခတွေ ခါးစည်း ခံနေရတာ ၁၆ လမြောက်ထိ ကြာမြင့်လာခဲ့ပါပြီ။ ဩစတြေးလျ နိုင်ငံသား ရှောင်တာနဲလ်တို့လို နိုင်ငံခြားသားတွေ အပါအဝင် ထောင်နဲ့ချီ များပြားတဲ့ လူပုဂ္ဂိုလ်တွေဟာ တရားဥပဒေနဲ့ မညီညွတ်တဲ့ ဖမ်းဆီး ချုပ်နှောင်မှုတွေကြောင့် သူတို့ရဲ့ လွတ်လပ်ခွင့်တွေကို ဆုံးရှုံးလိုက်ရပါတယ်။ သူတို့ရဲ့ အနာဂတ် ဒီမိုကရေစီ လှုပ်ရှားမှုတွေရဲ့ အလားအလာဟာ အဲဒီလို ဥပဒေမဲ့ ပြုကျင့်မှုတွေကို ဘယ်လို ဖြေရှင်းနိုင်မလဲ ဆိုတဲ့အပေါ် မူတည်နေပါပြီ။
တပ်မတော် အာဏာသိမ်းမှု စတင်ချိန် ကတည်းက ဘိုင်ဒန်ရဲ့ အစိုးရက ဒီအခြေအနေကို တွန်းလှန်ဖို့ အမေရိကန်ရဲ့ တာဝန် ဝတ္တရားအပေါ် အသိအမှတ်ပြုဖို့ ကျွန်တော် တိုက်တွန်းခဲ့ပါတယ်။
ဒါပေမဲ့ မြန်မာနိုင်ငံဟာ ဒီမိုကရေစီအတွက် အားထုတ် ရုန်းကန်နေရပြီး ကျွန်တော်တို့ရဲ့ ကူညီပံ့ပိုးမှု အခန်းကဏ္ဍက အရေးပါတဲ့ အချိုးအကွေ့မျိုးဆီ ရောက်လာပါပြီ။ ဒီနေ့မှာတော့ ကျွန်တော်နဲ့ လုပ်ဖော်ကိုင်ဖက်တွေဟာ မြန်မာပြည်သူတွေကို ပိုပြီး ကူညီနိုင်ဖို့ ဘယ်လိုတွေ ပြင်ဆင်ထားသလဲ ဆိုတာကို အစိုးရရဲ့ ကိုယ်စားလှယ်တွေဆီကနေ ကြားသိရဖို့ မျှော်လင့်မိပါတယ်။
လောလောလတ်လတ် အနေနဲ့ ကျွန်တော်ဟာ မြန်မာ့ အမျိုးသား ညီညွတ်ရေး အစိုးရ (NUG)ရဲ့ နိုင်ငံခြားရေး ဝန်ကြီးနဲ့ တွေ့ဆုံဖြစ်ခဲ့ပါတယ်။ ဒီမိုကရေစီ အောင်ပွဲခံနိုင်ဖို့အတွက် ဒီလှုပ်ရှားမှုက ဘာတွေ လိုသလဲ ဆိုတာကို သူက ရှင်းပြခဲ့ပါတယ်။ ဒီနေ့မှာတော့ အစိုးရဖက်က ဘယ်လိုဘယ်ပုံ ဆောင်ရွက်ဖို့ လိုလားသလဲ ဆိုတာကို ကျွန်တော်တို့ ကြားခွင့်ရမှာ ဖြစ်ပါတယ်။
အနှစ်ချုပ်လိုက်ရင်တော့ NUGရဲ့ တောင်းဆိုမှုတွေက အဓိကကျတဲ့ ဧရိယာ ၃ ခုကို ရည်ရွယ်ပါတယ်။ စစ်အာဏာရှင်ကို ဆန့်ကျင်ရပ်တည်ဖို့ ပေါ်ပေါက်လာတဲ့ လွှတ်တော် ကိုယ်စားလှယ်တွေနဲ့ စုဖွဲ့ထားတဲ့ အစိုးရ အဖွဲ့ရဲ့ တရားဝင်မှုကို မြှင့်တင်ပေးဖို့၊ တပ်မတော်ကို ထောက်ပံ့ပေးနေတဲ့ စနစ်တစ်ခုလုံးကို အကိုင်း၊ အခက်အလက်ပါမကျန် အရေးယူ ပိတ်ဆို့မှုတွေ လုပ်ဆောင်ဖို့၊ မြန်မာ ပြည်သူတွေအတွက် ပိုပြီး အားကောင်းထိရောက်တဲ့ တိုက်ရိုက် ကူညီပံ့ပိုးမှုတွေ တိုးမြှင့်ဖို့ ဆိုတာတွေ ဖြစ်ကြပါတယ်။
ဘိုင်ဒန် အစိုးရဟာ ဒီရည်မှန်းချက်တွေနဲ့ ပတ်သက်လို့ ဘယ်လိုဘယ်ပုံ အလေးထား ဆောင်ရွက်မယ်၊ ရည်မှန်းချက်တွေ အထမြောက်စေဖို့ ဘယ်လို နည်းဗျူဟာတွေကို ရွေးချယ်သင့်တယ် ဆိုတာတွေကို ဒီနေ့၊ ဒီနေရာမှာ ရှိနေတဲ့ ကိုယ်စားလှယ်တွေက ပါဝင် ဆွေးနွေးကြဖို့လည်း ကျွန်တော် မျှော်လင့်ပါတယ်။
ပထမအဆင့် အနေနဲ့ ကျွန်တော့် အမြင်မှာတော့ အမေရိကန်ရော၊ မိတ်ဖက် နိုင်ငံတွေ အနေနဲ့ပါ မြန်မာ့ အရပ်သား ဒီမိုကရေစီ ခေါင်းဆောင်တွေရဲ့ အားထုတ်မှုတွေနဲ့ ပတ်သက်ပြီး သူတို့ရဲ့ တရားဝင်မှုကို မြှင့်တင်ဖို့ ပိုပြီး လုပ်ဆောင်နိုင်သလို လုပ်လည်း လုပ်သင့်ပါတယ်။ တပ်မတော်ကို ဆန့်ကျင် တွန်းလှန်ဖို့အတွက် မြန်မာ ပြည်သူတွေက မယုံနိုင်စရာ ကောင်းလောက်အောင် တသားတည်း ညီညွတ်နေတဲ့ အချိန်မှာ စစ်တပ် အုပ်စိုးမှုနဲ့ အမြင်သာဆုံး ခွဲထွက်နေတဲ့ အပေါ်မှာ လွတ်လပ်တဲ့ ကမ္ဘာကြီးက ထောက်ခံ အတည်ပြုပေးဖို့ သိပ်အရေးကြီးပါတယ်။ NUG၊ ပြီးတော့ အမျိုးသား ညီညွတ်ရေး အတိုင်ပင်ခံ ကောင်စီ (NUCC)နဲ့ ပြည်သူ့ ကာကွယ်ရေးတပ် (PDF)တို့လို အစုအဖွဲ့တွေကို ထိတွေ့ ဆက်ဆံဖို့၊ ပံ့ပိုးဖို့၊ တရားဝင် အသိအမှတ်ပြုဖို့ အမေရိကန် အစိုးရက ဘယ်လို ခြေလှမ်းတွေများ ပြင်ဆင်ထားပါသလဲ။
နောက်ပြီးတော့ အမေရိကန် အနေနဲ့ မတရား အုပ်ချုပ်နေတဲ့ စစ်အစိုးရရဲ့ လမ်းကြောင်းတွေကို ပိတ်ဆို့ပြီး ဖိအားတွေ ဆက်တိုက် ပေးနေဖို့လည်း သိပ်အရေးကြီးပါတယ်။ ဒါပေမဲ့ စစ်အစိုးရ ခေါင်းဆောင်ပိုင်းလောက်ကို တိုက်ရိုက် အရေးယူ ပိတ်ဆို့တာတွေ လုပ်ရုံနဲ့တော့ မလုံလောက်နိုင်ဘူး ဆိုတာကို ကျွန်တော်တို့အားလုံး သိထားပြီးသားပါ။ အမေရိကန် အစိုးရ အနေနဲ့ မြန်မာ့ ရေနံနဲ့ သဘာဝဓာတ်ငွေ့ လုပ်ငန်း (MOGE)တို့လိုမျိုး တပ်မတော်ရဲ့ နိုင်ငံတကာနဲ့ ချိတ်ဆက်နေတဲ့ လုပ်ငန်းကြီးတွေနဲ့ ဆက်စပ်လုပ်ငန်းတွေကိုပါ အမေရိကန် အစိုးရက ပစ်မှတ်ထားပေးဖို့ မြန်မာနိုင်ငံက ဒီမိုကရေစီ လှုပ်ရှားသူတွေနဲ့ ခေါင်းဆောင်တွေက လိုလား မျှော်လင့်နေကြပါတယ်။
နောက်ဆုံးအချက်ကတော့ မြန်မာပြည်သူတွေအတွက် တိုက်ရိုက် အကူအညီ ဖြစ်စေမယ့် အထောက်အပံ့တွေ ပေးပို့နိုင်ဖို့ အမေရိကန်ဟာ ပိုမို ထိရောက်တဲ့ နည်းလမ်းတွေ ရှာဖွေဖို့ လိုပါတယ်။ ဒီအတွက် မြန်မာရဲ့ အိမ်နီးချင်း နိုင်ငံတွေနဲ့ လွတ်လပ်တဲ့ ကမ္ဘာကြီး တစ်ခုလုံးနဲ့ လက်တွဲ လုပ်ဆောင်ဖို့လည်း လိုပါတယ်။ မြန်မာနဲ့ ဆက်စပ်တဲ့ ဒေသတွင်းမှာ မလေးရှားလို အိမ်နီးချင်း နိုင်ငံတွေက NUGနဲ့အတူ ရပ်တည်ကြောင်း သဘောထား ပြသထားပြီးပါပြီ။ အိန္ဒိယနဲ့ ထိုင်းတို့လို နိုင်ငံတွေ ဆိုရင်လည်း နယ်စပ်ဖြတ်ကျော် ထောက်ပံ့ ကူညီမှုတွေနဲ့ ပတ်သက်လို့ ဒီထက်ပိုပြီး ထိရောက်အောင် ဆောင်ရွက်ပေးနိုင်ခြေ ရှိနေပါတယ်။ နောက်ပြီး စင်ကာပူလို နိုင်ငံမျိုးတွေကလည်း တပ်မတော်အပေါ် စီးပွားရေး၊ သံတမန်ရေးအရ အတော်ကြီး ထောက်ကန်ပေးနိုင်တဲ့ သဘောရှိပြီး ဒီအချက်ကို လက်တွေ့ အသုံးချဖို့ တိုက်တွန်းသင့်ပါတယ်။
ဘိုင်ဒန်ရဲ့ အစိုးရ အနေနဲ့ ကိုဗစ် ကာကွယ်ဆေးတွေ အပါအဝင် ပိုပြီး တိုက်ရိုက်ကျတဲ့ ကူညီပံ့ပိုးမှုတွေအတွက် ဘယ်လိုများ ရည်ရွယ်ထားပါသလဲ။ ရန်လို တိုက်ခိုက်မှုတွေ ကြောက်ခမန်းလိလိ မြင့်တက်လာနေတဲ့ အနေအထားမှာ အရပ်သား အစိုးရ ခေါင်းဆောင်တွေနဲ့ တိုင်းရင်းသား လက်နက်ကိုင် အဖွဲ့အစည်းတွေကြားက သိမ်မွေ့လှတဲ့ ဟန်ချက်မျိုးကို ဘယ်လို ကူညီ လမ်းပြပေးမလဲ။ စစ်အာဏာရှင်ရဲ့ ရာဇဝတ်မှုတွေကို မှတ်တမ်းပြုစုဖို့၊ ထိခိုက် ခံစားခဲ့ရတဲ့ သူတွေကို နယ်စပ်ဖြတ်ကျော်ပြီး လူသားချင်း စာနာမှုဆိုင်ရာ အထောက်အပံ့တွေ ပေးပို့နိုင်ဖို့ ဘယ်လို ကူညီပေးမလဲ။ မြန်မာနိုင်ငံရဲ့ ဒီမိုကရေစီ စနစ်ကို ဖိနှိပ်ချိုးနှိမ်ဖို့ တရုတ်နဲ့ ရုရှားတို့ရဲ့ နှစ်ရှည်လများ စိတ်ဝင်စားနေမှုတွေကို ဘယ်လို တန်ပြန်မလဲ။
မြန်မာပြည်သူတွေ ရင်ဆိုင်နေရတဲ့ စိန်ခေါ်မှုတွေက ရှုပ်ထွေးပါတယ်။ ဒါပေမဲ့ အမေရိကန် အစိုးရဆီ ရည်စူးထားတဲ့ အဆိုပြုချက်ကတော့ ရိုးရှင်းပါတယ်။ နောက်ဆုံးမှာတော့ ဒီမိုကရေစီ ရရှိရေးအတွက် သူတို့ကိုယ်တိုင် စိတ်ပိုင်းဖြတ်ထားတဲ့ ပြည်သူလူထု တစ်ရပ်ကို ကူညီပေးဖို့ ကျွန်တော်တို့မှာ ဆန္ဒရှိ လားဆိုတာပါပဲ။
သူတို့ရဲ့ တောင်းဆိုမှုတွေနဲ့ ပတ်သက်လို့ ဘိုင်ဒန်ရဲ့ အစိုးရက ဘယ်လို စီမံထားသလဲ ဆိုတာကို ကျွန်တော် စောင့်မျှော် နားစွင့်နေပါတယ်။
