ထောင်ဒဏ် ၁၁ နှစ်ချထားတဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ထိန်းသိမ်းထားရာနေကနေ နေပြည်တော်အချုပ်ထောင်ဆီပို့ဆောင်ထားတယ်လို့ စစ်ကောင်စီဘက်က အတည်ပြုထုတ်ပြန်လာပါတယ်။
မတရားဖမ်းဆီးခံထားရတဲ့ ဒေါ်အောင်ဆန်းစုကြည်ကို ပြစ်မှုဆိုင်ရာဥပဒေတွေအရ ထောင်ကို ပို့ခဲ့တာလို့ အာဏာသိမ်းစစ်ကောင်စီက သတင်းထုတ်ပါတယ်။
နေပြည်တော်အချုပ်ထောင်မှာ ဒေါ်အောင်ဆန်းစုကြည်ကို “သီးခြားကောင်းမွန်စွာ ထားရှိထားပါသည်” လို့စစ်ကောင်စီရဲ့သတင်းထုတ်ပြန်ချက်မှာတွေ့ရပါတယ်။
သတင်းတွေအရ နေပြည်တော်အချုပ်ထောင်မှာ သမ္မတ ဦးဝင်းမြင့်နဲ့ ဒေါ်အောင်ဆန်းစုကြည်တို့ကို ထားရှိဖို့ သီးခြားအဆောက်အဦး ၂ လုံးကို ဆောက်လုပ်ထားပြီးပြီလို့သိရပါတယ်။
ဒေါ်အောင်ဆန်းစုကြည် ကိုတော့မနေ့က နေ့လယ်ပိုင်း ၂ နာရီလောက်မှာ နေပြည်တော်အချုပ်ထောင် ကိုပြောင်းရွှေ့ခဲ့တာလို့ NLD ပါတီအသိုင်းအဝိုင်းကနေသိထားရပါတယ်။
ထောင်ကိုပြောင်းရွှေ့လိုက်ပြီးနောက် ဒေါ်အောင်ဆန်းစုကြည်ကို အစိုးရ လျှို့ဝှက်အက်ဥပဒေနဲ့ စွဲဆိုထားတဲ့အမှုကို ဒီနေ့မှာ ထောင်တွင်းတရားရုံးမှာ ပထမဆုံး ရုံးထုတ်စစ်ဆေးလိုက်ပါတယ်။
တရားရုံးနဲ့နီးစပ်တဲ့အသိုင်းအဝိုင်းဆီကသိရတာတော့ ဒီနေ့ရုံးချိန်းမှာ အမှုတွဲထဲပါဝင်သူ NLD စီးပွားရေးအကြံပေး သြစတြေးလျနိုင်ငံသား ရှောင်တာနယ် ၊ NLD စီးပွားရေးဝန်ကြီး ဦးစိုးဝင်း ၊ ဒုဝန်ကြီးဦးဆက်အောင် ၊ ဝန်ကြီးဟောင်း ဦးကျော်ဝင်းတို့ကို ဒေါ်အောင်ဆန်းစုကြည်နဲ့အတူ ရုံးထုတ်စစ်ဆေးခဲ့တယ်လို့သိရပါတယ်။
