ဖားကန့်မြို့တွင် လာရောက်ပုန်းအောင်းနေသည့် စစ်ကိုင်းတိုင်းမှ ပျူစောထီးသုံးဦးကို စစ်ကိုင်းအခြေစိုက် ပြည်သူ့ကာကွယ်ရေးအဖွဲ့တစ်ဖွဲ့က လာရောက်သုတ်သင်ရှင်းလင်းသွားသည်ဟု ဒေသခံများက ပြောသည်။
ဖားကန့်မြို့တွင် ဒေသခံမဟုတ်သည့် အမျိုးသားသုံးဦး၏ ရုပ်အလောင်းများကို ဇွန်လ ၁၉ရက်ညကတွေ့ရှိခဲ့ပြီး စစ်ကိုင်းတိုင်းဘက်မှ လာရောက်တိမ်းရှောင်နေသည့် ပျူစောထီးသုံးဦးဟု အတည်ပြုနိုင်ကြောင်း ဒေသခံများက ပြောသည်။
မည်သည့်မြို့က ဖြစ်သည်ကို သက်ဆိုင်ရာမြို့နယ်မှ ပြည်သူ့ကာကွယ်ရေးတပ်ဖွဲ့က ထုတ်ပြန်မည်ဟု ဆိုသည်။
“စစ်ကိုင်းတိုင်းဘက်က ဒလန်နဲ့ပျုတွေ အရှင်းခံရတာ။ သူ့နယ်ကနေ လိုက်လာပြီးလာရှင်းတာလို့ သိရတယ်။ ဒီဘက်(ဖားကန့်)က ရှင်းတာတော့ မဟုတ်ဘူး”ဟု ဖားကန့် ပြည်သူ့ကာကွယ်ရေးတပ်ဖွဲ့နှင့် နီးစပ်သူတစ်ဦးက People’s Speingသို့ ပြောသည်။
သေနတ်ဖြင့် ပစ်ခတ်သုတ်သင်ရှင်းလင်းခံရသူသုံးဦး၏ ရုပ်အလောင်းကို ဖားကန့်မြို့ မှော်ဆီစာကျေးရွာနှင့် လုံးခင်းကျေးရွာအုပ်စုကြား ဆက်သွယ်ထားသော လမ်းဘေးတွင် ဒေသခံများက စတင်တွေ့ရှိခဲ့ခြင်း ဖြစ်သည်။
ကျောက်စိမ်းတူးသည့် လုပ်ငန်းနှင့်ပတ်သက်၍ စစ်ကိုင်းတိုင်းမှ လူအများစု လာရောက်အခြေချ နေထိုင်လေ့ရှိသည့် ဖားကန့်တွင် လက်ရှ်ိတော်လှန်ရေးအရှိန်မြင့်နေသည့် စစ်ကိုင်းတိုင်းမြို့နယ်အချို့မှ စစ်ကောင်စီသတင်းပေးနှင့် ပျူစောထီး အချို့ လာရောက်တိမ်းရှောင်လေ့ရှ်ိသည်။
ယခင်ကလည်း ယင်းကဲ့သို့ ထွက်ပြေးတိမ်းရှောင်နေသည့် ပျူးစောထီးနှင့် ဒလန်အချို့ကို သက်ဆိုင်ရာမြို့နယ်မှ ပြည်သူ့ကာကွယ်ရေးတပ်ဖွဲ့များက ဖားကန့်အထိလိုက်လာပြီး သုတ်သင်ရှင်းလင်းခဲ့ဖူးသည်။
“ပျူတွေ၊ ဒလန်တွေ ပေးတဲ့ ဒုက္ခကတော်တော်ဆိုးတယ်။ ဒါကြောင့်လည်း ရေဆုံးမြေဆုံး လိုက်ရှင်းလင်းတာ။ ကိုယ့်ဘာသာ ကိုယ်နေရင်းကနေ ဒလန်ကြောင့် ပျက်ရတဲ့ဘဝတွေ စစ်ကိုင်းမှာ လက်ညိုးထိုးမလွဲဘူး” ဟု ရေဦးမြို့နယ်မှ ပြည်သူ့ကာကွယ်ရေးရဲဘော်တစ်ဦးက ပြောသည်။
