ကချင်ပြည်နယ်အစိုးရအဖွဲ့ လီဆူတိုင်းရင်းသားရေးရာဝန်ကြီး ဦးအားတီယောဟန်၏ မြစ်ကြီးနားမြို့ရှိနေအိမ်ကို အကြမ်းဖက်စစ်ကောင်စီက ယနေ့ ချိပ်ပိတ်သွားကြောင်း မြို့ခံများက ပြောသည်။
အမျိုးသားဒီမိုကရေစီအဖွဲ့ချုပ်ပါတီ(NLD)ကိုယ်စားပြုရွေးကောက်ပွဲအနိုင်ရပြီး လီဆူတိုင်းရင်းသားရေးရာဝန်ကြီးတာဝန်ထမ်းဆောင်နေသော ဦးအားတီယောဟန်ကို စစ်ကောင်စီက ဖမ်းဆီးထားပြီးနောက် ယနေ့ (ဇူလိုင်၈ရက်)တွင် နေအိမ်အား ချိတ်ပိတ်ခြင်းဖြစ်သည်။
“သူများအိမ်တွေကိုချိပ်လိုက်ပိတ်နေရတာကို သာယာနေကြတဲ့ အာဏာရှင်ဒေါက်တိုင်တွေကို မြင်ရတာ ကျက်သ ရေမဲ့တယ်။ အချိန်တန်ရင် စစ်ကောင်စီ ဆင်းသွားရမှာကို သိသိကြီးနဲ့ လိုက်လုပ်နေကြတာ”ဟု မြစ်ကြီးနားမြို့ခံတစ်ဦးက ပြောသည်။
စစ်ကောင်စီသည် ဖားကန့်မြို့နယ် ပြည်သူ့လွှတ်တော်ကိုယ်စားလှယ် ဦးအောင်ဟိန်းမင်း၏ မိဖများပိုင်ဆိုင်သောအိမ်ကိုလည်း ဇွန်လ ၂၉ရက်တွင် ချိတ်ပိတ်ပြီးနောက် ဖြိုချဖျက်ဆီးပစ်ခဲ့သည်။
” ရန်သူက ရန်သူ့အလုပ် လုပ်နေသလို ကျွန်တော်တို့ဘက်ကလည်း လုပ်စရာရှိတာ ဆက်လုပ်နေမှာပါပဲ။ ဆက်တော်လှန်နေမှာပဲ။ အိမ်ဆိုတာလောက်က ကျွန်တော်တို့ နိုင်ရင် ပြန်ရနိုင်တဲ့အရာပါ။ အဆုံးအရှုံးများထားတဲ့ ကျွန်တော်တို့ ရဲဘော်ရဲဘက်တွေ ပြည်သူတွေနဲ့ ယှဉ်လိုက်ရင် ဘာမှ မဟုတ်ပါဘူး။ ဘာပဲဖြစ်ဖြစ် ကျွန်တော်တို့ အဆုံးထိသွားကြမယ်။ အရေးတော်ပုံကြီး အောင်မြင်တဲ့အထိ တော်လှန်ကြမယ်”ဟု ဦးအောင်ဟိန်းမင်းက သူ၏ လူမှုကွန်ရက်တွင် ရေးသားဖော်ပြခဲ့သည်။
စစ်ကောင်စီက နိုင်ငံတော်အာဏာသိမ်းခဲ့သည့်အချိန်မှစ၍ ၂၀၂၂ ဇူလိုင် ၁ရက်အထိ အမျိုးသားဒီမိုကရေစီအဖွဲ့ချုပ်ပါတီမှ လွှတ်တော်ကိုယ်စားလှယ် ၁၁၉ ဦး၊ ပါတီဝင်၂၂၄ ဦး၏ နေအိမ်များချိတ်ပိတ် သိမ်းဆည်းခံထားရကြောင်း NLD ပါတီက ဇူလိုင် ၅ ရက်တွင် ထုတ်ပြန်ထားသည်။
