ကန့်ကွက် ဝေဖန်မှုတွေ ရှိနေပေမယ့် စင်ကာပူ အစိုးရဟာ မူးယစ်ဆေးဝါး မှောင်ခို ရောင်းဝယ်သူ နှစ်ဦးကို ကြိုးပေး ကွပ်မျက်လိုက်ကြောင်း သိရပါတယ်။
ဇူလိုင် ၆ ရက် ကွပ်မျက်မှုကြောင့် အရှေ့တောင်အာရှ ဒေသက မြို့ပြ နိုင်ငံငယ်မှာ အခုနှစ်အတွင်း သေဒဏ်စီရင် ခံရသူ ၄ ဦးထိ ရှိလာခဲ့ပြီ ဖြစ်ပါတယ်။ စင်ကာပူ အစိုးရ အနေနဲ့ သေဒဏ် ချမှတ်မှုတွေကို စွန့်လွှတ်ဖို့ လူ့အခွင့်အရေး အဖွဲ့တွေက အရှိန်မြှင့် တောင်းဆိုနေချိန်မှာပဲ အခုလို နောက်ထပ် ၂ ယောက်ကို ကွပ်မျက်လိုက်တာပါ။
မလေးရှား နိုင်ငံသား ကယ်လ်ဝမ့်ဆင်းနဲ့ စင်ကာပူ နိုင်ငံသား နိုရာရှာရီဂူးစ်တို့ နှစ်ဦးရဲ့ နောက်ဆုံးလက်ကျန် ပိုင်ဆိုင်မှုတွေနဲ့ သေဆုံးကြောင်း အတည်ပြု လက်မှတ်တွေကို အကျဉ်း ဦးစီးဌာန အာဏာပိုင်တွေက မိသားစုဝင်တွေဆီ လက်လွှဲ ပေးအပ်ခဲ့ကြောင်း လူ့အခွင့်အရေး လှုပ်ရှားသူတွေက ဆိုပါတယ်။
နိုင်ငံတကာ လွတ်ငြိမ်းချမ်းသာခွင့်အဖွဲ့၊ လူ့အခွင့်အရေး စောင့်ကြည့်အဖွဲ့နဲ့ တခြား သေဒဏ် ဆန့်ကျင်ရေး လှုပ်ရှားသူတွေက စင်ကာပူရဲ့ သေဒဏ် စီရင်ချက်ဟာ နိုင်ငံတကာ လူ့အခွင့်အရေး စံနှုန်းတွေကို ပြောင်ပြောင်တင်းတင်း မျက်ကွယ် ပြုလိုက်တာလို့ ဝေဖန်ပါတယ်။
နိုင်ငံတကာ လွတ်ငြိမ်း ချမ်းသာခွင့်အဖွဲ့ရဲ့ စင်ကာပူ ဌာနခွဲက မကြာသေးခင် နှစ်ပိုင်းတွေအတွင်း မူးယစ်ဆေးဝါးမှုအတွက် သေဒဏ် စီရင်တဲ့ နိုင်ငံ ၄ ခုလောက်သာ ရှိခဲ့ပြီး စင်ကာပူလည်း ပါဝင်နေကြောင်း ပြောပါတယ်။ သေဒဏ် ဆိုတာက ပြဿနာတွေအတွက် မှန်ကန်တဲ့ ဖြေရှင်းမှု ဘယ်တုန်းကမှ မဟုတ်ခဲ့သလို အတိအလင်း ဆန့်ကျင် ကန့်ကွက်ရမှာ ဖြစ်ကြောင်း နိုင်ငံတကာ လွတ်ငြိမ်း ချမ်းသာခွင့် အဖွဲ့ရဲ့ ဒေသဆိုင်ရာ သုတေသနဌာန ဒုတိယ ဒါရိုက်တာ အမ်မာလင်ဂီလ်က ဆိုပါတယ်။
ဆင်းဟာ ၂၀၁၆ တုန်းက စင်ကာပူမှာ ဘိန်းဖြူ လက်ဝယ် တွေ့ရှိမှုနဲ့ အဖမ်းခံခဲ့ရတာဖြစ်ပြီး ၃ လအတွင်း ဒုတိယမြောက် ကွပ်မျက်ခံရတဲ့ မလေးရှား နိုင်ငံသား ဖြစ်လာပါတယ်။ စင်ကာပူမှာ မလေးရှား နိုင်ငံသား ၂ ဦး အပါအဝင် နောက်ထပ် ၄ ဦးကိုလည်း သေဒဏ် စီရင်ဖို့ အမိန့်ချထားပေမယ့် ဥပဒေကြောင်းအရ စိန်ခေါ်မှုတွေကြောင့် ပြစ်ဒဏ်ကို ဆိုင်းငံ့ထားကြောင်း သိရပါတယ်။
