စစ်ကိုင်းတိုင်း၊ ဒီပဲယင်းမြို့နယ်တွင် အကြမ်းဖက်စစ်ကောင်စီတပ်က ပျံကျ(အေးသာယာ)ရွာအား ဖျက်ဆီးမီးရှို့၍ နေအိမ် ၃၀နီးပါး မီးလောင်ပျက်စီး ဆုံးရှုံးခဲ့ကြောင်း ဒေသတွင်းသတင်းရင်းမြစ်များက ပြောသည်။
ယနေ့ (ဇူလိုင် ၈ ရက်)နံနက်ပိုင်းက ဒီပဲယင်းမြို့နယ် အနောက်ခြမ်း အေးသာယာ(ပျံကျ)ကျေးရွာကို မုံရွာအနောက်မြောက်တိုင်းစစ်ဌာနချုပ်(နမခ)မှ ရဟတ်ယာဥ်ဖြင့်လာပို့သွားသော စစ်ကောင်စီတပ်သားများက မီးရှို့ဖျက်ဆီးသွားခြင်းဖြစ်ကြောင်း ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။
အဆိုပါမီးရှို့မှုကြောင့် ဒေသခံပြည်သူများ၏ နေအိမ် ၂၇အိမ် ဝန်းကျင် မီးလောင်ဆုံးရှုံးခဲ့ရပြီး နေအိမ်မီးရှို့ခံသူများမှာ ဘေးလွတ်ရာ တိမ်းရှောင်နေရ၍ အရေးပေါ်အကူအညီများ လိုအပ်လျက်ရှိကြောင်း ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။
“ဒီကနေ့မနက် ၇ နာရီလောက်က ရှို့တာ။ နှစ်မေရာခွဲပြီး ရှို့သွားတာ။”ဟု ဒီပဲယင်းနယ်ခံတစ်ဦးက ပြောသည်။
စစ်ကောင်စီ စစ်ကြောင်းသည် ပျံကျကျေးရွာအား မီးရှို့ပြီး ကြခတ်ကျေးရွာတွင် ဝင်ရောက်တပ်စွဲနေသည်ဟု သိရသည်။
ဒီပဲယင်းမြို့နယ်တွင် ယမန်နေ့ညနေပိုင်းက အကြမ်းဖက်စစ်တပ်နှင့် ဒေသတွင်း PDF အဖွဲ့များ တိုက်ပွဲဖြစ်ပွားရာ အကြမ်းဖက်စစ်သား ၁၀ဦးခန့်သေဆုံးနိုင်ကြောင်း Freedom Revolution Force(FRF) အဖွဲ့က သတင်းထုတ်ပြန်သည်။
ယမန်နေ့ (ဇူလိုင် ၇ရက်)ညနေ ၆နာရီခွဲက ဒီပဲယင်းမြို့နှင့် ၂ မိုင်ခန့်အကွာ မဲသည်ရွာနှင့် ဝဘာကျေးရွာအနီး၌ စစ်ကောင်စီတပ်သား ၄၀ခန့်နှင့် ဒေသတွင်း ပြည်သူ့ကာကွယ်ရေးအဖွဲ့များ တိုက်ပွဲဖြစ်ပွားခဲ့ကြသည်။
အဆိုပါ တိုက်ပွဲတွင် စစ်ကောင်စီဘက်က ၁၀ဦးခန့်သေဆုံးကာ အများအပြားဒဏ်ရာရရှိခဲ့ကြောင်း Freedom Revolution Force(FRF)အဖွဲ့က ထုတ်ပြန်အသိပေးထားသည်။
စစ်ကောင်စီတပ်က ၎င်းတို့အာဏာသိမ်းကာလ ၂၀၂၁ ဖေဖော်ဝါရီမှ ၂၀၂၂မေလအထိကာလအတွင်း စစ်ကိုင်းတိုင်းအတွင်းရှိ နေအိမ် ၁၃,၈၄၀ခန့် မီးရှို့ဖျက် ဆီးထားကြောင်း Data For Myanmarက ထုတ်ပြန်ထားသည်။
