▪️အမျိုးသမီးတစ်ဦးနှင့် ကလေးငယ်တစ်ဦးလည်း ပစ်ခတ်ခံထားရ
စစ်ကိုင်းတိုင်း၊ ဒီပဲယင်းမြို့နယ် အရှေ့ခြမ်းတွင် အကြမ်းဖက်စစ်ကောင်စီတပ်က လေကြောင်းမှ ပစ်ခတ်နေ၍ ဒေသခံပြည်သူများထွက်ပြေးတိမ်းရှောင်နေရပြီး အမျိုးသမီးတစ်ဦးနှင့် ကလေးငယ်တစ်ဦး ပစ်ခတ်ခံထားရကြောင်း ဒေသတွင်းသတင်းရင်းမြစ်များက ပြော သည်။
ယနေ့(ဇူလိုင် ၁၄ရက်)မွန်းလွဲပိုင်းတွင် စစ်ကောင်စီတပ် သည် ဒီပဲယင်းမြို့နယ်အရှေ့ခြမ်းအား ရဟတ်ယာဥ်ဖြင့် ပစ်ခတ်ပြီး စစ်ကောင်စီတပ်များကို ချထားခဲ့ကြောင်း၊ ဝေဟင်ပစ်ခတ်မှုကြောင့် နများကျေးရွာနေ အမျိုးသမီးတစ်ဦးပေါင်ထိမှန်ထားပြီး ကလေးငယ်တစ်ဦး လဲကျနေကြောင်း ဒီပဲယင်းမြို့နယ်ညီနောင်များအဖွဲ့က ပြော သည်။
နများရွာ အရှေ့ဘက်နားမှ တစ်စီးကာပစ်ပေးပြီး တစ်စီးက ထိုးဆင်းလာကာ စစ်ကောင်စီတပ်သားများချခဲ့ကြောင်း၊ စစ်ကောင်စီတပ်သည် နများကျေးရွာကို ဝင်ရောက်နေပြီဖြစ်ပြီး နောက်ဆက်တွဲ အခြေအနေများ မသိရသေးကြောင်း ဒေသခံများက ပြောသည်။
ဒီပဲယင်းမြို့နယ် ယဉ်ကျေးရွာ၊ညောင်လှကျေးရွာ၊ သရက်တောရွာနှင့် မရကန်ကျေးရွာများပေါ်တွင်လည်း ရဟတ်ယာဉ်တစ်စီးဝဲကာ ပစ်ခတ်ခဲ့ကြောင်း ဒေသခံများက ပြောသည်။
နံနက် ၁၁နာရီမိနစ်၄၀ ခန့်ကလည်း ဒီပဲယင်းအရှေ့ခြမ်း တနယ်ရွာတွင်တပ်စွဲထားသော စစ်ကောင်စီတပ်သားများသည် တနယ်ရွာသစ်ရွာကို မီးတင်ရှို့ခဲ့ကြောင်း ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။
စစ်တပ်သည် ဒီပဲယင်းမြို့နယ်အတွင်း ဇူလိုင်လ ၄ ရက်ကတည်းက ရဟတ်ယာဥ်ဖြင့်ရောက်လာခဲ့ပြီး ကျေးရွာများအတွင်းရှိ ပစ္စည်းများကိုမွှေနှောက်ယူဆောင် ဖျက်ဆီး၍ နေအိမ်တချို့ကို မီးရှို့ခဲ့ပြီး နေအိမ်၃၀ထက်မနည်း မီးရှို့ဖျက်ဆီးထားသည်။
ဒီပဲယင်းမြို့နယ်တွင် စစ်ကောင်စီတပ်များမီးရှို့ဖျက်ဆီးမှုကြောင့် ၂၀၂၁ ဖေဖော်ဝါရီမှ ၂၀၂၂ ဇူလိုင် ၁၁ရက်အထိကျေးရွာ ၂၆ရွာမှ နေအိမ် ၅၆၂လုံး မီးလောင်ပြာကျခဲ့သည်။
