ကလေးမြို့နယ်၊ ကင်းမွန်းခြုံကျေးရွာ အရှေ့ဘက် ဘုရားတောင်ကုန်းအနီးတွင် စစ်ကောင်စီတပ်နှင့် ဒေသခံကာကွယ်ရေးတပ်များ ယမန့်နေ့က တနေ့ကုန် တိုက်ပွဲဖြစ်ပွားပြီး စစ်ကောင်စီတပ်မှ၁၅ ဦးသေဆုံးခဲ့ကြောင်း PDF(ကလေး)က သတင်းထုတ်ပြန်သည်။
အဆိုပါသေဆုံးမှုများတွင် ဒေသခံကာကွယ်ရေးတပ်များ၏ မိုင်းဆွဲတိုက်ခိုက် ခြင်းနှင့် တနေ့တာ ပစ်ခတ်တိုက်ခိုက်မှုများကြောင့်ဖြစ်ပြီး ဒဏ်ရာရရှိသူများ လည်း အများအပြားရှိသည်ဟု PDF(ကလေး)က ထုတ်ပြန်ထားသည်။
![ကင်းမွန်းခြုံရွာအနီးတိုက်ပွဲ စစ်ကောင်စီတပ် ၁၅ ဦးသေဟု PDF(ကလေး) ထုတ်ပြန်](https://i0.wp.com/www.ludunwayoo.com/wp-content/uploads/2022/07/294349930_428758912646900_3860356451975313193_n.png?resize=724%2C1024&ssl=1)
စစ်ကောင်စီတပ်သည် ဇူလိုင် ၁၈ ရက်ကတည်းက အင်အား၁၀၀ကျော်ဖြင့် ကလေး-ကလေးဝကြား ကျောက္ကာကျေးရွာမှ မြစ်သာမြစ်ကို ကူး၍ အရှေ့ဘက်တောင်ကြောများအတိုင်း စစ်ကြောင်း ထိုးလာခြင်းဖြစ်သည်။ ထိုစစ်ကြောင်းနှင့် ဒေသခံကာကွယ်ရေးတပ်တို့ကြား ယမန့်(ဇူလိုင် ၂၁ရက်) နံနက် ၈နာရီတွင် ဘုရားတောင်ကုန်းအနီးတွင် တိုက်ပွဲဖြစ်ပွားခြင်းဖြစ်သည်ဟု PDF(ကလေး)က ဆိုသည်။
![Public Service Announcement](https://i0.wp.com/www.ludunwayoo.com/wp-content/uploads/2022/01/PSA_inside_Story_Jan22-03.jpg?resize=880%2C229&ssl=1)
PDF(ကလေး)၏ထုတ်ပြန်ချက်များအရ တိုက်ပွဲအတွင်း မြစ်သာမြစ် အနောက်ဘက်ခြမ်း ကံပုလဲရွာဘက်မှ စစ်ကောင်စီတပ်များက လက်နက်ကြီးများဖြင့် ရမ်းသမ်းပစ်ခတ်ခဲ့သည်။ ညနေ ၄နာရီခန့်တွင် စစ်ကောင်စီတပ်များက ကင်းမွန်းခြုံရွာအတွင်းရှိ နေအိမ် ၇လုံးကို မီးရှို့ဖျက်ဆီးခဲ့သည်။ ထို့နောက် ည ၉နာရီခန့်တွင် ကလေးမြို့အရှေ့ဘက် ပြင်သာရွာမှ စက်လှေနှစ်စင်းဖြင့် စစ်ကောင်စီတပ်သား အလောင်းများနှင့် ဒဏ်ရာရသူများကို လာရောက်တင်ဆောင်သွားပြီး ကင်းမွန်းခြုံရွာမှ ကလေးမြို့ကို ပြန်လည်ဆုတ်ခွာသွားသည်ဟု PDF(ကလေး)က ဖော်ပြထားသည်။
ထို့အပြင် စစ်ကောင်စီတပ်သားများ မြှပ်နှံခဲ့သည့် မိုင်းများကြောင့် PDF(ကလေး)မှ တပ်သားတစ်ဦး ထိခိုက်ဒဏ်ရာရရှိခဲ့သည်ဟု ထပ်မံအသိပေးထားသည်။
” ရဲဘော်တစ်ဦး ဒဏ်ရာရသွားတယ်။ စခတွေ ထောင်ခဲ့တဲ့ မိုင်းထိတာ။ခြေထောက်တစ်ဖက် ထိသွားတာ။ ဆေးကုသလို့ရတဲ့နေရာကို ခေါ်လာနေတုန်းပဲ။ သွေးထွက်လွန်မှာတော့ စိုးရိမ်ရတယ် “ဟု PDF(ကလေး)မှ ရဲဘော်တစ်ဦးက ပြောသည်။
အဆိုပါတိုက်ပွဲကို PDF(ကလေး) တပ်ရင်း (၁ ၊ ၂ ၊ ၅ ၊ ၆ ၊ ၇) ၊ ပကဖ (ကလေး) ၊ CNDF Vakok ၊ CDF-KKGနှင့် RKDFတို့က ပူးပေါင်းတိုက်ခိုက်ခဲ့ခြင်းဖြစ်သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)