နိုင်ငံတော်အာဏာကို မတရားလုယူသည့် အကြမ်းဖက်စစ်အုပ်စု၏ လူမဆန်၊ရက်စက် ကြမ်းကြုတ် သည့်လုပ်ရပ်အပေါ် ပြည်ထောင်စုဖွားတိုင်းရင်းသား လူမျိုးများအားလုံးနှင့် နိုင်ငံတကာရောက် မြန်မာပြည်သူများအနေဖြင့် အရှိန်အဟုန်မြင့်၍ ဖက်စစ်စစ်အုပ်စုအား မိမိတို့တတ်နိုင်သည့်ဘက်မှ ဆန့်ကျင်တော်လှန်တိုက်ပွဲဝင်ကြရန် ချင်းအမျိုးသားအဖွဲ့ချုပ်/ချင်းအမျိုးသား များကာကွယ်ရေး တပ်(CNO/CNDF)က ယနေ့ ထုတ်ပြန်သည်။
ထို့ပြင် နိုင်ငံတကာအသိုက်အဝန်းအနေဖြင့်လည်း ဒီမိုကရေစီစနစ် ထိန်းသိမ်းကာကွယ်နိုင်ရန် မြန်မာပြည်သူလူထုဘက်မှ အားပေး ထောက်ခံပြီးပံ့ပိုးကူညီပေးရန် အလေးအနက် တိုက်တွန်း ကြောင်းလည်း ဖော်ပြထားသည်။
ကိုဂျင်မီ၊ကိုဖြိုးဇေယျာသော်၊ ကိုလှမျိုးအောင်နှင့် ကိုအောင်သူရဇော်တို့အား စစ်ကောင်စီက မတရား သေဒဏ်စီရင်မှုအပေါ်CNO/CNDFက သဘော ထားထုတ်ပြန်ရာ၌ ယင်းသို့ဖော်ပြခဲ့ခြင်း ဖြစ်သည်။
၎င်းတို့လေးဦးအား အကြမ်းဖက်စစ်အုပ်စုက မတရားသေဒဏ်စီရင်လိုက်ပြီ ဖြစ်ကြောင်း ထုတ်ပြန်သည့် သတင်းကြောင့် များစွာတုန်လှုပ်ခြောက်ခြား မိသည့်အပြင် ၎င်းတို့၏မိသားစုများ နှင့်အတူ ဝမ်းနည်းကြေကွဲရပါကြောင်း CNO/CNDFက ထုတ်ပြန်သည်။
ဤကဲ့သို့ မတရားသေဒဏ်ချမှတ်ခံရသည့် ပြစ်ဒဏ်စီရင်ခြင်းအပေါ် ချင်းအမျိုးသားအဖွဲ့ချုပ်/ ချင်းအမျိုးသားကာကွယ်ရေးတပ်ဖွဲ့အနေဖြင့် အပြင်းအထန် ကန့်ကွက်ရှုတ်ချကြောင်း နှင့် ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်နှင့် ကိုအောင်သူရဇော်တို့အပါအဝင် တိုင်းပြည်နှင့် လူမျိုးအတွက် အသက်ပေးလှူသွားကြသည့် အာဇာနည်သူရဲကောင်းများ အားလုံးဦးညွှတ် အလေးနီပြုကြောင်း ဖော်ပြခဲ့သည်။
“ကျန်ရစ်သူမိသားစုများအပေါ် လူတို့ကြံစည်၍မမှီနိုင်သော ဘုရားသခင် ထံတော်မှ လာသည့် ငြိမ်သက်ခြင်း ရှိပါစေ။”ဟုလည်း CNO/CNDFက ထုတ်ပြန်ချက်၌ ဖော်ပြထားသည်။
