ကလေးတွေမှာ မျောက်ကျောက် ကူးစက်မှုတွေ စတင်တွေ့ရှိကြောင်း အမေရိကန်ထုတ်ပြန်

ငယ်ရွယ်လွန်းတဲ့ ကလေးတွေမှာ မျောက်ကျောက်ရောဂါ ကူးစက်မှုတွေ ပထမဆုံးအကြိမ် အတည်ပြု တွေ့ရှိခဲ့ကြောင်း အမေရိကန် ကျန်းမာရေး အရာရှိတွေက ပြောကြားခဲ့ပါတယ်။

အမေရိကန် ရောဂါ တားဆီး ထိန်းချုပ်ရေးဌာန (CDC)က ဆက်နွှယ်မှု မရှိတဲ့ ကလေးငယ် ၂ ဦးမှာ မျောက်ကျောက် ရောဂါ ကူးစက်ထားကြောင်း ဆေးစစ် တွေ့ရှိခဲ့တယ်လို့ ထုတ်ပြန်ပါတယ်။ ပထမ ကလေးငယ်ဟာ ကယ်လီဖိုးနီးယားက လမ်းလျှောက်တတ်စ အရွယ်ဖြစ်ပြီး နောက်ထပ် တစ်ယောက်ကတော့ ဝါရှင်တန် ဒီစီကို ရောက်ရှိနေတဲ့ အမေရိကန် နိုင်ငံသား မဟုတ်တဲ့ မွေးကင်းစ ကလေးငယ်လို့ CDCက ပြောပါတယ်။

ပြီးတော့ ကလေးနှစ်ယောက်စလုံး ကျန်းမာရေး အခြေအနေ စိုးရိမ်စရာတော့ မရှိဘူးလို့ CDCရဲ့ ထုတ်ပြန်ချက်မှာ ဖော်ပြထားပါတယ်။ ဒါပေမဲ့ အသက် ၈ နှစ်အောက် ကလေးတွေမှာ မျောက်ကျောက် ကူးစက်ရင် ရောဂါလက္ခဏာတွေ ပြင်းထန်မှာ စိုးရိမ်ရကြောင်း ပညာရှင်တွေက သတိပေးထားပါတယ်။

မျောက်ကျောက်ဟာ ကိုဗစ်လိုမျိုး ကပ်ရောဂါ အဆင့်ထိ မဟုတ်ပေမယ့် ကမ္ဘာ့နိုင်ငံ တော်တော်များများကို စတင် ပျံ့နှံ့ ရောက်ရှိနေပြီ ဖြစ်ပါတယ်။ အမေရိကန်မှာတင် မျောက်ကျောက် လူနာပေါင်း ၂၅၀၀ ကျော်လောက် တွေ့ရှိထားပြီးပါပြီ။

ကျောက်ရောဂါ အနွယ်ဝင် ရောဂါတစ်ခုဖြစ်တဲ့ မျောက်ကျောက်ဟာ လူ့ခန္ဓာကိုယ်က ထွက်ရှိတဲ့ အရည်တွေကနေတဆင့် လူအချင်းချင်း အဓိက ကူးစက်ပါတယ်။ ဥရောပမှာ မျောက်ကျောက် ရောဂါ ကူးစက်မှု အစောပိုင်း ကာလတွေမှာ လူနာတွေဟာ အမျိုးသားချင်း လိင်ဆက်ဆံသူ အများစု ဖြစ်နေတာ တွေ့ခဲ့ရပါတယ်။ ဒါပေမဲ့ မျောက်ကျောက်ဟာ လိင်ကနေပဲ သီးသန့် ကူးစက်နိုင်တဲ့ ရောဂါမျိုးတော့ မဟုတ်ဘူးလို့ ဆိုပါတယ်။

ရောဂါ ဖြစ်တဲ့အခါ ခန္ဓာကိုယ်အနှံ့ အဖုအကျိတ်တွေ ထွက်ပေါ်လာပြီး အလွန်အမင်း ယားယံတာ၊ နာကျင်တာတွေ ခံစားရနိုင်ပါတယ်။ မျောက်ကျောက်ဟာ အရွယ်ရောက်ပြီးသူ အများစုမှာ အထူးတလည် ကုသဖို့၊ ဆေးရုံတင်ဖို့ မလိုဘဲ အချိန်တန်ရင် ပျောက်သွားနိုင်ပေမယ့် ကလေးတွေမှာ ဆိုရင်တော့ အသက်အန္တရာယ် စိုးရိမ်ရတဲ့ထိ ခြိမ်းခြောက်မှုမျိုး ရှိလာနိုင်ကြောင်း ကမ္ဘာ့ ကျန်းမာရေး အဖွဲ့ကြီး (WHO)က သတိပေးထားပါတယ်။

WHOရဲ့ အရာရှိတွေဟာ မျောက်ကျောက် ရောဂါကို နိုင်ငံတကာ ကျန်းမာရေး ပြဿနာကြီး အဆင့်ထိ သတ်မှတ် ကြေညာဖို့ သင့်မသင့် ဆိုတာကို အကျေအလည် ဆွေးနွေးနေကြကြောင်းလည်း သိရပါတယ်။