ယောဒေသ ပြည်သူ့ကာကွယ်ရေးတပ်(YPDF) အနေဖြင့် မဟာမိတ်များနှင့်ပူးပေါင်း စစ်အာဏာရှင် အမြစ်ဖြတ်တိုက်ထုတ်ရေး စစ်ဆင်ရေးများကို လုပ်ဆောင်တော့မည်ဖြစ်ကြောင်း YPDFက ယနေ့ သတိပေးချက် ထုတ်ပြန်သည်။
ထို့ကြောင့် အကြမ်းဖက်စစ်ကောင်စီတပ်များရှိရာ တပ်စခန်းများ၊ ကင်းစခန်းများ၊ စစ်ဆေးရေးဂိတ်များ၊ စစ်ကောင်စီဒေါက်တိုင်ရုံးများအနီး နေထိုင်ကြသည့် ပြည်သူများအနေဖြင့် ဘေးလွတ်ရာနေရာများသို့ အမြန်ဆုံးခေတ္တ တိမ်းရှောင်နေထိုင်ကြရန် အသိပေးကြေညာအပ်သည်ဟု ဖော်ပြထားသည်။
သတိပေးချက်မလိုက်နာ၍ မလိုလားအပ်သော ထိခိုက်နစ်နာ ဆုံးရှုံးမှုများဖြစ်ပေါ်လာပါက မလိုက်နာသူများ၏ တာဝန်သာ ဖြစ်ကြောင်း အသိပေးထားသည်။
စစ်ကောင်စီတပ်ကို ရရာလက်နက်ကိုင်စွဲကာ တွန်းလှန်တိုက်ထုတ်နေကြသော တော်လှန်ရေးအဖွဲ့အစည်းများကို ရိက္ခာ၊ ငွေကြေးက အစ စီးပွားရေး ခက်ခဲနေသည့်ကြားက ကူညီထောက်ပံ့ပေးနေကြသည့်အတွက်လည်း တော်လှန်ရေးတပ်ဖွဲ့များ ကိုယ်စားကျေးဇူးအထူး တင်ရှိကြောင်း YPDFက ထုတ်ပြန်ခဲ့သည်။
စစ်အာဏာရှင် အမြစ်ဖြတ်တိုက်ထုတ်ရေး၌ တက်နိုင်သည့် နေရာများက ဆက်လက်ပါဝင်ပေးကြရန် တိုက်တွန်းကြောင်း ဖော်ပြထားသည်။
