လူထုတော်လှန်ရေးကို ပြည်သူလူထုက အထင်လွှဲမှားစေရန် ဓာတ်ငွေ့ပိုက်လိုင်း နှင့် ဓာတ်အား လိုင်းများကို ပြည်သူ့ကာကွယ်ရေးတပ်(PDF)က မိုင်းခွဲဖျက်ဆီးခဲ့ သည်ဟု စစ်ကောင်စီက စနစ်တကျ ဝါဒဖြန့်နေခြင်းသာဖြစ်ကြောင်း စစ်ကောင်စီလက်အောက်ခံ လျှပ်စစ်နှင့်စွမ်းအင် ဝန်ကြီးဌာနက အကြီးတန်း အရာရှိတစ်ဦးက People’s Springသို့ ပြောကြားသည်။
စစ်ကောင်စီလက်အောက်ခံ လျှပ်စစ်စွမ်းအားဝန်ကြီးဌာနက ဇောတိက ဓာတ်ငွေ့ပိုက်လိုင်းကို ဇူလိုင် ၂၄ ရက်တွင်လည်းကောင်း၊ ရွှေစာရံ-တံခွန်တိုင် ၁၃၂ ကေဗီ ဓာတ်အားလိုင်း တာဝါကို မူလီများဖြုတ်၍ ပြိုလဲအောင် လည်းကောင်း PDFများဆောင်ရွက်နေသည်ဟု ထုတ်ပြန်ချက်အပေါ် အဆိုပါ အရာရှိက မှတ်ချက်ပေးခြင်းဖြစ်သည်။
စစ်ကောင်စီ၏ ဝါဒဖြန့်ချီရာတွင် ဇောတိက ဓာတ်ငွေ့ပိုက်လိုင်း ဖောက်ခွဲခံရ ခြင်းကြောင့် ဓာတ်အားထုတ်လုပ်မှု မဂ္ဂါဝပ် ၂၀၀ လျော့ကျခဲ့ရပြီး ဓာတ်အားလိုင်းများပြတ်တောက်ခြင်းကြောင့် မဂ္ဂါဝပ် ၁၁၂၀လျော့ခဲ့ရသည်ဟု ဆိုသည်။
“ဝန်ကြီးဌာနက ထုတ်ပြန်တဲ့ ပုံတွေက PDFကြောင့်ဖြစ်တဲ့ပုံတွေ မဟုတ်ဘူးဗျ၊ ဝါဒဖြန့်ဖို့ သက်သက် လုပ်ထားတဲ့ ပုံတွေ”ဟု အဆိုပါအရာရှိက ပြောသည်။
စစ်ကောင်စီဝန်ကြီးဌာနက ထုတ်ပြန်ထားသည့် ပုံများတွင် လက်ရှိကာလတွင် ဖြစ်ပွားခဲ့သည့် ပုံများ မဟုတ်ကြောင်းကိုလည်း ဓာတ်ပုံများကို ကြည့်၍ ခန့်မှန်းနိုင်သည်ဟုလည်း ၎င်းကဆိုသည်။
စစ်ကောင်စီက ဝါဒဖြန့်ရာတွင် ဓာတ်အားလိုင်းပျက်စီးသည့် တာဝါတိုင် ၂ တိုင်ပုံနှင့် ဓာတ်ငွေ့ပိုက် လိုင်းဖောက်ခံခွဲရသည်ဟူသော ဓာတ်ပုံများလည်း ပါဝင်နေသည်။
“မိုင်းပေါက်ကွဲတဲ့အချိန်ကို အမိအရ ဓာတ်ပုံရိုက်ထားတာ၊ ဒါကမျိုးက အချိန်ကိုက်ရိုက်ရတာကို ဓာတ်ပုံရိုက်သူတိုင်းသိပါတယ်။ မိုင်းခွဲမယ်အချိန်နဲ့ ဓာတ်ပုံရိုက်ချိန် ချိန်သားကိုက်မှ ဒီလိုမျိုးပုံရတာ”ဟု ဝါရင့် ဓာတ်ပုံဆရာတစ်ဦး က မှတ်ချက်ပေးသည်။
စစ်တပ်အာဏာသိမ်းပြီးနောက် နိုင်ငံအနှံ့ လျှပ်စစ်ဓာတ်အားပြတ်တောက်မှု ပိုမိုများပြားလာပြီး လျှပ်စစ်ဓာတ်အားထုတ်လုပ်မှုများလည်း ကျဆင်းလာသည်။ အရပ်သားအစိုးရလက်ထက်က ဆောင်ရွက်ခဲ့သည့် နွေရာသီမီးလင်းရေး LNG(သဘာဝဓာတ်ငွေ့ရည်) သုံး ဓာတ်အားပေးစက်ရုံများ နှင့်နေရောင်ခြည် သုံးဓာတ်အားပေး စက်ရုံများလည်း ရပ်တန်ကုန်သည်။
ပြည်သူလူထုက စစ်အာဏာသိမ်းမှုကို ဆန့်ကျင်သည့်အနေဖြင့် လျှပ်စစ်မီတာခများ မပေးဆောင်ဘဲ ဆန့်ကျင်သပိတ်မှောက်ခဲ့ကြသည်။
ဂျပန်သတင်းဌာနတစ်ခုဖြစ်သည့် Nikkei Asia၏ ရေးသားချက်အရ လျှပ်စစ်မီတာခရရန် ဒေါ်လာ တစ်ဘီလီယံအကြွေးရှိနေသည်ဟု ဖော်ပြထား သည်။
