●အာဆီယံကိုလည်း ငြင်းပယ်ရန် မလေးရှားနိုင်ငံခြားရေးဝန်ကြီးတိုက်တွန်း
စစ်ကောင်စီပြုလုပ်မည့် ရွေးကောက်ပွဲကို လက်ခံမည်မဟုတ်ဘဲ အာဆီယံကလည်း လက်မခံ သင့်ကြောင်း မလေးရှားနိုင်ငံခြားရေးဝန်ကြီးက တိုက်တွန်းလိုက်သည်။
ယမန်နေ့တွင်ပြုလုပ်သော ကျဆုံးသူရဲကောင်းလေးဦးနှင့် မြန်မာ့တော်လှန်ရေးကို ဂုဏ်ပြုအား ပေးထောက်ခံပွဲ၌ မလေးရှားနိုင်ငံခြားရေးဝန်ကြီး Saifuddin Abdullah က တိုက်တွန်းပြော ကြားခဲ့ခြင်းဖြစ်သည်။
သက်ဆိုင်သူအားလုံးသဘောတူသည့် ဖွဲ့စည်းပုံအခြေခံဥပဒေပြန်လည်ရေးဆွဲရေး၊ လွတ်လပ်ပြီး တရားမျှတသည့် ရွေးကောက်ပွဲကျင်းပရေးအပါအဝင် အသွင်ကူးပြောင်းရေးအစီအစဉ်၊ အပစ်အခတ်ရပ်စဲရေး၊ တည်ငြိမ်ရေး၊ အမှန်စစ်စစ်အသွင်ကူးပြောင်းရေးတို့ကို မဖြစ်မနေလုပ်ဆောင် ရမည်ဟုလည်း Saifuddin Abdullah က ပြောသည်။
“အဆုံးသတ်တိုက်ပွဲမေးခွန်းအတွက် မြန်မာပြည်သူတွေလိုချင်တဲ့ အဆုံးသတ်တိုက်ပွဲဆိုတာ ဖွဲ့စည်းပုံအခြေခံဥပဒေအရ အရပ်ဘက်နဲ့ နိုင်ငံရေးအခွင့်အရေးတွေကို အာမခံပြီး ဒီမိုကရေစီနည်းကျ၊ အားလုံးပါသော၊ တရားမျှတသော၊ ငြိမ်းချမ်းသော၊ ညီညွတ်သော၊ သာယာ၀ပြောသော နိုင်ငံ ဖြစ်ထွန်းရေးပါပဲ” ဟု မလေးရှားနိုင်ငံခြားရေးဝန်ကြီးက ဆိုသည်။
လာမည့် အာဆီယံနိုင်ငံခြားရေးဝန်ကြီးများအစည်းအဝေးတွင် မလေးရှားအနေဖြင့် အာဆီယံဝန်ကြီးများအဆင့်အစည်းအဝေးများအားလုံးတွင် မြန်မာနိုင်ငံမှ နိုင်ငံရေးဆိုင်ရာကိုယ်စားလှယ်ကို တက်ရောက်ခွင့်မပေးရေးနှင့် အာဆီယံ ဘုံဆုံးဖြတ်ချက် ၅ ရပ်ကို အကောင်အထည်ဖော်ရေး မူဘောင်အတွက် ကြိုးပမ်းသွားမည်ဟု Saifuddin Abdullah က ပြောသည်။
အာဆီယံသည် မြန်မာနိုင်ငံ၏ အခြေအနေအမှန်ကို တိကျစွာ အချိန်နှင့်တပြေးညီသတင်းအချက်အလက်များသိရှိရန်လိုအပ်ပြီး အဓိကပါဝင်ပတ်သက်သူများအကြား အားလုံးပါဝင်သော၊ မျှ တသော အကြံပြုချက်များအရ မျှတသော၊ ပွင့်လင်းမြင်သာသော လူသားချင်းစာနာမှုအကူအညီ များကို ပေးရမည်ဟု ၎င်းက တိုက်တွန်းသည်။
