ကရင်အမျိုးသားအစည်းအရုံး(KNU) တပ်မဟာ(၁)နယ်မြေ သထုံခရိုင် သထုံမြို့နယ်တွင် အကြမ်းဖက်စစ်ကောင်စီတပ်က လက်နက်ကြီးဖြင့် ပစ်ခတ်၍ အရပ်သားပြည်သူ တစ်ဦး သေဆုံးပြီး နှစ်ဦး ဒဏ်ရာရခဲ့ကြောင်း KNUက ထုတ်ပြန်သည်။
ဇူလိုင်၂၉ရက် နံနက် ၇ နာရီခွဲခန့်က စစ်ကောင်စီ ၏ ပိန္နဲတောတပ်စခန်းမှ လက်နက်ကြီး ၇လုံးပစ် ခတ်ခဲ့ရာ သထုံမြို့နယ် မင်းလွင်ကျေးနယ်၊ ထီးညာလူကျေးရွာ အတွင်းသို့ နှစ်လုံးကျရောက်ပေါက်ပွဲပြီး အသက် (၄၈)နှစ်အရွယ် အမျိုးသမီး တစ်ဦး အသက်ဆုံးရှုံးခဲ့ရသည်ဟု ဆိုသည်။
ထို့ပြင် အသက်ဆုံးရှုံးခဲ့ရသည့် နော်ကပေါ်ထူး ၏ သမီးဖြစ်သူ နော်ထွေးထွေးအေးနှင့် ထီးညာလူရွာသား တီးအောင်ဇေယျတို့မှာလည်း လက်နက်ကြီး ထိမှန်ဒဏ်ရာရခဲ့ကြောင်း ဖော်ပြထားသည်။
နော်ထွေးထွေးအေးမှာ အသက် (၁၅)နှစ်သာရှိသေးပြီး ဘယ်ခြေနှင့် ဘယ်လက်တို့အား လက်နက်ကြီးစထိမှန်ခဲ့ကာ အသက် ၆၆ နှစ်အရွယ် တီးအောင်ဇေယျ မှာလည်း လက်နက်ကြီးစထိမှန်ခဲ့၍ အသက်အန္တရာယ်စိုးရိမ်ရကြောင်း ထုတ်ပြန်သည်။
စစ်ကောင်စီတပ်သည် ဇွန်လ ၂၅ရက်ကလည်းအဆိုပါဒေသရှိ ထုံးဘိုလေးကျေးရွာအား မီးရှို့ဖျတ်ဆီး ခြင်း၊ လက်နက်ကြီးများဖြင့် ရမ်းသမ်း ပစ် ခတ်ခြင်းများကြောင့် ထုံးဘိုလေးရွာနှင့် အနီးတစ်ဝိုက်ရှိ ဒေသခံတစ်သောင်းကျော် ထွက်ပြေးတိမ်းရှောင်ခဲ့ရသည်ဟု ဆိုသည်။
