စစ်ကိုင်းတိုင်း ပုလဲမြို့နယ်တွင် စစ်ကောင်စီစစ်ကြောင်း မိုင်းခွဲတိုက်ခိုက်ရာ ခုနစ်ဦးသေဆုံးပြီးနောက် ကျေးရွာတစ်ရွာကို စစ်ကောင်စီတပ်က မီးရှို့ဖျက်ဆီး သွားခဲ့သည်။
ယမန်နေ့(သြဂုတ် ၄ရက်)နံနက်က စစ်ကောင်စီတပ်ဖွဲ့ဝင်များ၊ ရဲများနှင့် ပျူစောထီးများပါဝင်သည့် စစ်ကြောင်းကို ပုလဲမြို့နယ် သာယာကုန်းနှင့် သပြေကုန်းရွာကြား၊နန်းစင်ကုန်းအနီးတွင် ပြည်သူ့ကာကွယ်ရေးမဟာ မိတ်တပ်ဖွဲ့များက မိုင်းခွဲတိုက်ခိုက်ခဲ့ခြင်းဖြစ်သည်။
“မိုင်းခြောက်လုံးခွဲတာ။စစ်ခွေးစစ်ကြောင်းမှာ ၇၀လောက်ပါပြီး ခုနစ်ယောက် သေတယ်။ သူတို့ပြန်ဆုတ်သွားတဲ့အပြန်လမ်းက သာယာကုန်းရွာကို မီးဝင်ရှို့သွားတယ်”ဟု ပုလဲမြို့နယ် ပြည်သူ့ကာကွယ်ရေးတပ်ဖွဲ့မှ တပ်ဖွဲ့ဝင်တစ်ဦးက ပြောသည်။
သာယာကုန်းကျေးရွာမှ နေအိမ် ၃၀ကျော်မီးလောင်ပျက်စီးသွားပြီး နွားတစ်ကောင်သေဆုံးခဲ့ သည်ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
ပုလဲမြို့နယ် ပြည်သူ့ကာကွယ်ရေးတပ်ဖွဲ့တပ်ရင်း- ၁(Royal Eagle) တပ်ခွဲ၊ ပုံတောင် Tiger တပ်ခွဲနှင့် တောင်ပေါ်ပုဏ္ဍက တပ်ခွဲတို့က ပူးပေါင်း တိုက်ခိုက်ခဲ့ခြင်း ဖြစ်သည်။
အထိနာသွားသည့် စစ်ကောင်စီစစ်ကြောင်းသည် မူလတပ်စွဲထားသည့် အင်မထီးကျေးရွာသို့ ပြန်ဆုတ်ခွာသွားခဲ့သည်။ အင်းမထီးရွာသည် ပျူစောထီးရွာဟု နာမည်ကြီးသည်။ ယမန်နေ့က မိုင်းဆွဲတိုက်ခိုက်ခံရမှုကြောင့် သေဆုံးသူများကို အင်းမထီးရွာတွင် စစ်ကောင်စီက သဂြိုလ်လိုက် သည်။
“အမိန့်ပြန်တမ်းပြန်တဲ့အသံတွေ၊ သေနတ်ပစ်ဖောက်သံတွေကြားတယ်။ ဒဏ်ရာရတဲ့သူလည်းများ တယ်လို့သိရတယ်”ဟု ပြည်သူ့ကာကွယ်ရေးရဲဘော် တစ်ဦးက ပြောသည်။
