▪︎လက်နက် ၇လက်နှင့် ကျည်၊ ခဲယမ်းများတမူးPDFရရှိ
စစ်ကိုင်းတိုင်း တမူးခရိုင်အထက်ပိုင်း မြို့သစ်မြို့နယ် အတွင်း၌ စစ်ကောင်စီလက်အောက်ခံများနှင့် တိုက်ပွဲဖြစ်ပွားခဲ့ရာ စစ်ကောင်စီ၏ စစ်ဘက်ရေးရာလုံခြုံရေးတပ်ဖွဲ့(စရဖ)မှ အရာရှိ အပါအဝင် စစ်ကောင်စီ လက်ပါးစေ ၇ဦးကို သုတ်သင်ရှင်းလင်းနိုင်ခဲ့ပြီး ၎င်းတို့၏ လက်နက်များကို ရရှိခဲ့ကြောင်း တမူးပြည်သူ့ကာကွယ်ရေးတပ်(PDF) တပ်ရင်း(၁)မှ တာဝန်ရှိသူကပြောသည်။
တမူး PDF တပ်ရင်း(၁) ၊KNA(Burma)နှင့်KCNDF မဟာမိတ် ပူးပေါင်းတပ်ဖွဲ့ဝင်များသည် မြို့သစ်မြို့နယ်အတွင်း၌ နယ်မြေရှင်းလင်းရေးလုပ်ငန်းများ ဆောင်ရွက်နေစဉ် ဒီဇင်ဘာ ၂၈ရက် နံနက်ပိုင်း၌ စစ်ကောင်စီလက်အောက်ခံ SNAနှင့် ပျူစောထီးအဖွဲ့ဝင်(၇)ဦး မောင်းနှင်လိုက်ပါလာသည့် ကားတစ်စီးနှင့်ထိပ်တိုက်တွေ့ဆုံကာ ရင်ဆိုင်တိုက်ပွဲဖြစ်ခဲ့ခြင်းဖြစ်သည်။
အဆိုပါကားကို မိုင်းတစ်လုံးဆွဲပြီး အနီးကပ် ဝင်ပစ်ကြခြင်းဖြစ်သည်ဟု တမူး-PDFတပ်ရင်း-၁ တာဝန်ရှိသူကပြောသည်။
“စကစနဲ့လက်အောက်ခံတွေကို ကိုယ့်ဘက်ကအထိအခိုက်မရှိ ရှင်းလင်းနိုင်တဲ့အပြင် လက်နက်တွေပါသိမ်းနိုင်ခဲ့လို့ပျော်တာပေါ့ဗျာ။စကစနဲ့ပူးပေါင်းသူမှန်သမျှကို ပြတ်ပြတ်သားသားတိုက်ခိုက်ရှင်းသွားမယ်”ဟု တမူး-တပ်ရင်း-၁ တာဝန်ရှိသူကပြောသည်။
အဆိုပါတိုက်ပွဲတွင်စရဖ အရာရှိ မောင်ဇော်(ခ)မုတ်ဆိတ်၊SNA တပ်သားစုဆောင်းရေးနှင့် ဘဏ္ဍာရေးတာဝန်ခံ ဝင်းအောင်၊SNAဗိုလ် သက်စိုးနိုင်(ခ)သိန်းစိုးနိုင်၊ပျူစောထီးခေါင်းဆောင် ငြိမ်းမောင်မောင်၊ကျော်ထူး၊မျိုးသူနှင့်ပျူအဖွဲ့ဝင်တစ်ဦး စုစုပေါင်း ၇ဦးကို သုတ်သင်နိုင်ခဲ့ကြောင်းသိရသည်။
ထို့အပြင် (၄၀)မမ(၁)လက်နှင့် ၄၀မမ ဗုံးသီး(၁၄)လုံး၊M4-16(၁)လက်၊AK-47(၁)လက်၊M-92(၁)၊81 (၁)လက်၊9mm ပစ္စတို(၁)လက်၊380 ပစ္စတို(၁)လက်၊ ကျည်အိမ်(၆)ခု၊ 7.62mmကျည်(၉၅)တောင့်၊ 9mmကျည်(၄)တောင့်၊380ကျည်(၄)တောင့်နှင့်ဆက်သွယ်ရေးစကားပြောစက်(၁)လုံးတို့ကို သိမ်းဆည်းရရှိခဲ့ကြောင်း ဓာတ်ပုံနှင့်အတူ ဖော်ပြထားသည်။
အဆိုပါတိုက်ပွဲ၌ ပူးပေါင်းတပ်ဖွဲ့ဝင်များ ထိခိုက်မှုမရှိဘဲ အောင်မြင်စွာ ဆုတ်ခွာနိုင်ခဲ့သည်ဟု အသိပေးထားသည်။
နောင်တွင်လည်း မဟာမိတ်များ ပူးပေါင်း၍ စစ်အာဏာရှင်စနစ်ချုပ်ငြိမ်းရေးအတွက် ဆက်လက်တိုက်ပွဲဝင်သွားမည်ဟု ထုတ်ပြန်ကြေညာခဲ့သည်။
ပြီးခဲ့သည့် ဒီဇင်ဘာ ၂၇ရက် ညနေပိုင်းကလည်း တမူးမြို့ မြို့မ (၁၂)ရပ်ကွက်မှ ပျူစောထီး အဖွဲ့ဝင် ဇော်ဝင်းမြင့် ကို ဆိုင်ကယ်စီးလာသူ ၂ဦးက ပစ်ခတ်ရှင်းလင်းခဲ့သည်။ အဆိုပါ ဖြစ်စဉ်အပြီး ယမန်နေ့ ဒီဇင်ဘာ ၃၀ရက်တွင် တမူးမြို့ နမ့်ဖာလုံစျေး ရှိ လက်ဖက်ရည်ဆိုင်ပိုင်ရှင် ကိုချစ်စမ်းမောင်နှင့် ဇနီးကို မြို့မ (၁၂) ရပ်ကွက်မှ ပျူစောထီးခေါင်းဆောင် ပန်းချီချမ်းမြေ့ ခေါင်းဆောင်သည့် ပျူစောထီးအဖွဲ့က ပစ်ခတ်သတ်ဖြတ်ခဲ့သည်ဟု တမူး PDF တာဝန်ရှိသူ တစ်ဦးက ပြောသည်။
