အမျိုးသားညီညွတ်ရေးအစိုးရ ယာယီသမ္မတ ဒူဝါလရှိးလ အနေဖြင့် ပြည်သူလူထုထံ နိုင်ငံတော်အခြေပြ မိန့်ခွန်းပြောကြားခြင်းကို မနက်ဖြန် ၂၀၂၃ ဇန်နဝါရီ ၁ရက် နံနက် ၇နာရီတွင် ပြောကြားသွားမည်ဖြစ်ကြောင်း အသိပေးကြေညာထားသည်။
ယာယီသမ္မတအနေဖြင့် ပြီးခဲ့သည့် ရက်ပိုင်း ဒီဇင်ဘာ ၂၇ရက်ကကျင်းပခဲ့သည့် အစည်းအဝေးတွင် လာမည့် ၂၀၂၃အတွင်း ပီပီပြင်ပြင် ပြတ်ပြတ် သားသားဖြစ်မည့် နိုင်ငံရေးရလဒ်တစ်ခု ထပ်မံပေါ်ထွက်လာအောင် ကြိုးစားရမည်ဖြစ်ကြောင်း ပြောကြားထားသကဲ့သို့ စစ်ရေးတွင်လည်း စစ်ကောင်စီ၏ ပင်မအရင်းကို တူးဖြိုပစ်ရမည့် အချိန်ရောက်ပြီဖြစ်ကြောင်း ပြောကြားထားသည်။
လာမည့်နှစ်သစ်တွင် စစ်အာဏာရှင် အမြစ်ဖြတ် ချေမှုန်းရေးအတွက် တော်လှန်ရေးကိုအရှိန်မြင့်ဆောင်ရွက်သွားမည်ဖြစ်ကြောင်း အမျိုးသားညီညွတ်ရေးအစိုးရက အသိပေးထားသည်။
လာမည့်နှစ်ကို တော်လှန်ရေးအဆုံးအဖြတ် နှစ်အဖြစ် သတ်မှတ်ကာ စစ်ကောင်စီကို စစ်ရေး၊ နိုင်ငံရေး အပါအဝင် ဘက်ပေါင်းစုံက ထိုးစစ်ဆင်သွားမည်ဖြစ်ကြောင်း အမျိုးသားညီညွတ်ရေးအစိုးရက ကြေညာထားသည်။