စစ်ကိုင်းတိုင်း၊ ဆားလင်းကြီးမြို့နယ်တွင် စစ်ကောင်စီတပ်က ၃ရက်အတွင်း ကျေးရွာငါးရွာထက်မနည်း မီးရှို့ဖျက်ဆီးခဲ့ကြောင်း ဒေသတွင်းသတင်းရင်းမြစ်များက ပြောသည်။
စစ်ကောင်စီတပ်သည် ဇန်နဝါရီ ၅ရက်က ဆားလင်းကြီးမြို့နယ်အတွင်းသို့ ဝင်ရောက်စစ်ကြောင်းထိုးခဲ့ပြီး ဇန်နဝါရီ ၆ ရက် နံနက်ပိုင်းမှစတင်ကာ ဘင်္ကားကျေးရွာ၊ ဖောင်းကတာရွာ၊ ကျောက်ဖြူတိုင်ကျေးရွာများကို မီးရှို့ဖျက်ဆီးခဲ့သည်။
![စစ်ကောင်စီတပ်က မီးရှို့ဖျက်ဆီးသွားသည့် ဆားလင်းကြီးမြို့နယ်အတွင်းရှိ ကျေးရွာအချ်ု့ကနေအိမ်များ၊ ဓာတ်ပုံ - Cj](https://i0.wp.com/www.ludunwayoo.com/wp-content/uploads/2023/01/322598783_747079953057206_2746257140232909107_n.jpg?resize=720%2C324&ssl=1)
ဘင်္ကားရွာမှ ပြည်သူ့နေအိမ် နှစ်လုံး၊ ကျောက်ဖြူတိုင်ကျေးရွာမှ နေအိမ် ၁၀၀ ကျော်၊ ဖောင်းကတာကျေးရွာမှ နေအိမ်၆၅ လုံးထက်မနည်း မီးလောင်ကျွမ်းပျက်စီးခဲ့ကြောင်း ဆားလင်းကြီးမြို့နယ် သတင်းမှန်ပြန်ကြားရေးအဖွဲ့က ပြောသည်။
ယမန်နေ့(ဇန်နဝါရီ ၇ ရက်) ညပိုင်းကလည်း စစ်ကောင်စီတပ်စစ်ကြောင်းထိုးလာ၍ ဆားလင်းကြီးမြို့နယ်ရှိ ဒေသခံပြည်သူ ၁,၀၀၀နီးပါးသည် ညအချိန်မတော် ထွက်ပြေးတိမ်းရှောင်ခဲ့ရကြောင်း ဒေသခံများက ပြောသည်။
![စစ်ကောင်စီတပ်က မီးရှို့ဖျက်ဆီးသွားသည့် ဆားလင်းကြီးမြို့နယ်အတွင်းရှိ ကျေးရွာအချ်ု့ကနေအိမ်များ၊ ဓာတ်ပုံ - Cj](https://i0.wp.com/www.ludunwayoo.com/wp-content/uploads/2023/01/323701013_726599395706937_4955927593357037539_n.jpg?resize=720%2C324&ssl=1)
“ရွာတွေကို တိုက်ပွဲမရှိဘဲမီးရှို့တာ။ ဒီနေ့ကောထပ်ရှို့တာ။ ကျွန်တော်တို့ စစ်ရှောင်ပြည်သူတွေလည်း အရမ်းခက်ခဲနေတယ်။”ဟု ဒေသခံတစ်ဦးက ပြောသည်။
ယနေ့ (ဇန်နဝါရီ ၈ရက်) နံနက်ပိုင်းတွင်လည်း ဆားလင်းကြီးမြို့နယ် မိုးကြိုးပြင်(မြောက်)ရွာနှင့် ကိုင်းကျေးရွာကို စစ်ကောင်စီတပ်က ဝင်ရောက် မီးရှို့ဖျက်ဆီးနေကြောင်း ဆားလင်းကြီးမြို့နယ်သတင်းမှန်ပြန်ကြားရေးအဖွဲ့က ပြောသည်။
![စစ်ကောင်စီတပ်က မီးရှို့ဖျက်ဆီးသွားသည့် ဆားလင်းကြီးမြို့နယ်အတွင်းရှိ ကျေးရွာအချ်ု့ကနေအိမ်များ၊ ဓာတ်ပုံ - Cj](https://i0.wp.com/www.ludunwayoo.com/wp-content/uploads/2023/01/324474200_1341748479918819_7831363390602047727_n.jpg?resize=720%2C324&ssl=1)
ဆားလင်းကြီးနယ်တွင် စစ်ကောင်စီတပ်၏ စစ်ကြောင်းထိုးမီးရှို့ဖျက်ဆီးမှုကြောင့် ပြည်သူထောင်ချီထွက်ပြေးတိမ်းရှောင်နေရပြီး ရာသီဥတုအေးလွန်းနေ၍ အခက်အခဲများကြုံတွေ့နေရကြောင်း သိရသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)