စစ်ကိုင်းတိုင်း၊ ဒီပဲယင်းမြို့နယ်တွင် စစ်ကောင်စီတပ်က တစ်ပတ်အတွင်း ကျေးရွာ ၁၁ရွာ မီးရှို့ဖျက်ဆီးပြီး အသက်(၈၀)ကျော် အဘိုးအိုတစ်ဦးပါ မီးရှို့သတ်ဖြတ်ခံခဲ့ရကြောင်း ဒေသတွင်း သတင်းရင်းမြစ်များက ပြောသည်။
စစ်ကောင်စီတပ်သည် ဇန်နဝါရီ ၃ ရက်မှ ယနေ့အထိ ဒီပဲယင်းမြို့နယ်အတွင်းရှိ ကျေးရွာ ၁၁ ရွာမှ နေအိမ်ပေါင်းရာနှင့်ချီ မီးရှို့ဖျက်ဆီးခဲ့ခြင်းဖြစ်သည်။
ဇန်နဝါရီ ၃ရက်ကလည်း ယင်းတွေရွာမှ နေအိမ်နှစ်လုံး ၊ ဇန်နဝါရီ ၅ရက်က စိုင်ပြင်မြို့ရှိ နေအိမ် ၁၀ လုံးခန့်၊ ၆ရက်တွင် ကြည်ရွာနှင့် ဘုရားထွက်ရွာ၊ မန်ကျည်းစောက်ရွာမှ နေအိမ် ၆၉လုံး၊ ၇ရက်တွင် ဆပ်ပြာကျင်းကျေးရွာမှ နေအိမ် ၇၀ ကျော်၊ ဘုတ်ရွာမှာ နေအိမ် ၂၀၀ ကျော်ရှိသည့်အနက် နေအိမ် ၄၀ခန့်သာကျန်ရှိကြောင်း၊ ၈ရက်တွင် ကုန်းရိုးကျေးရွာ၊ ယနေ့ (ဇန်နဝါရီ ၉ရက်)တွင် အင်တိုင်းလေးကျေးရွာ၊ ချောင်းနားကျေးရွာနှင့် ကြောင်ပန်းတောကျေးရွာတို့ကို မီးရှို့ဖျက်ဆီးခဲ့ကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
ထို့အပြင် ဆပ်ပြာကျင်းကျေးရွာမှ အသက် (၈၄)နှစ်အရွယ် အဘိုးတစ်ဦး မီးရှို့ခံရသည့်အထဲပါသွားခဲ့ကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
“တချို့ရွာသားတွေ ရွာကိုပြန်လာကြည့်ကြတယ်။မီးလောင်ပြင်ဖြစ်နေတဲ့ အနိဌာရုံတွေမြင်ပြီးမခံစားနိုင်လို့ မျက်ရည်နဲ့မျက်ခွက် ရွာထဲမဝင်ကြဘူး။ဆောက်တည်ရာမဲ့ဖြစ်နေတယ်။”ဟု ဆပ်ပြာကျင်းရွာ နယ်ခံတစ်ဦးက ပြောသည်။
ထို့အပြင် စစ်ကောင်စီတပ်သည် ယနေ့ညနေပိုင်းတွင် ကြောင်ပန်းတောကျေးရွာအား မီးရှို့ဖျက်ဆီးနေကြောင်း ဒေသခံများက ပြောသည်။
ဒီပဲယင်းမြို့နယ်တွင် ပြီးခဲ့သည့် ၂၀၂၂ ဒီဇင်ဘာအတွင်းကလည်း ကျေးရွာ(၂၂)ရွာမှ အိမ်ခြေ ၂,၉၀၀ကျော် မီးရှို့ဖျက်ဆီးခံခဲ့ရသည်။ အာဏာသိမ်းကာလတစ်လျှောက် ဒီပဲယင်းမြို့နယ်အတွင်း နေအိမ်ပေါင်း ၄,၂၀၀ကျော်ခန့် မီးရှို့ဖျက်ဆီးခံရပြီး မီးလောင်ဆုံးရှုံးခဲ့ရကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
