မြို့ပြစစ်ဆင်ရေးများကို (၄)လခန့် ရပ်နား၍ မြိတ်မြို့အား ကြောခိုင်းခဲ့သော မြိတ်မြို့နယ် ပြည်သူ့ကာကွယ် ရေးတပ်ဖွဲ့(ပကဖ)အနေဖြင့် မြို့တွင်း UGလုပ်ငန်းများ ဆက်လက်လုပ်ဆောင် တော့မည်ဟု People’s Spring သို့ ပြောသည်။
၎င်းတို့အနေဖြင့် တပ်ဖွဲ့ပြန်လည်စုစည်းမှု၊ လက်နက်စုစောင်းမှုနှင့် ကြိုတင်ပြင်ဆင်မှုများပြီးမြောက်တော့မည်ဖြစ်၍ မြို့တွင်းစစ်ဆင်ရေးများ ပြန်လည်လုပ်ဆောင်နိုင်တော့မည်ဟု ဆိုသည်။
“ပြန်လည်ပြင်ဆင်မှု၊ လက်နက်စုဆောင်းမှုတွေ၊ တပ်ရင်းတပ်ဖွဲ့အနေနဲ့ ပြန်လည်စုစည်းတည်ဆောက်မှုတွေ လုပ် ဆောင်နေရတော့ မြို့တွင်းအပိုင်းကို မလုပ်ဆောင်ဖြစ်ခဲ့ဘူး။ အခုတော့ ပြင်ဆင်မှုတစ်ချို့တဝက်ပြီးမြောက်ပြီဆိုတော့ မြို့ပြင်မှာတိုက်ပွဲတွေလည်းဖော်ဆောင်နိုင်နေပြီဖြစ်သလို မြို့တွင်း UG လုပ်ဆောင်မှုအတွက် ပြင်ဆင်နေပါပြီ”ဟု မြိတ်(ပ.က.ဖ)မှ တာဝန်ရှိသူတစ်ဦးက ပြော သည်။
ထို့ကြောင့် မြို့တွင်းစစ်ဆင်ရေးများ၏ ရှေ့ပြေးအဖြစ် မြိတ်မြို့ရှိ စစ်ကောင်စီလက်အောက်ခံ ခရိုင်၊ မြို့နယ်၊ ရပ်ကျေးအဆင့်ဆင့်မှ အုပ်ချုပ်ရေးမှူးများ၊ သတင်းပေးဒလန်များနှင့် ပျူစောထီးအပါအဝင် စစ်ကောင်စီလက် ပါးစေများ ရာထူးတာဝန်က တစ်ပတ်အတွင်းနှုတ်ထွက်ကြရန် ဇန်နဝါရီ ၅ ရက် ရက်စွဲဖြင့် သတိပေးချက်ထုတ်ပြန်ခဲ့သည်။
“စာထုတ်ပြီးနောက်ပိုင်းမှာတော့ စကစအဖွဲ့ကတော့ အရင်ကငြိမ်သက်နေရာကနေ လှုပ်လှုပ်ရွရွတော့ဖြစ်လာတယ်။ သူတို့လည်း သတိထားလာတယ်လို့ ဆိုရမှာပဲ”ဟု မြိတ်(ပ.က.ဖ)မှတာဝန်ရှိသူတစ်ဦးက မှတ်ချက်ပေး သည်။
အထက်ပါ မြိတ်(ပ.က.ဖ) ၏သတိပေးချက်ထုတ်ပြန်ပြီးနောက် စစ်ကောင်စီက မြိတ်မြို့ပေါ်တွင် စစ်ကောင်စီတပ်သားများအား လုံခြုံရေးတိုးမြှင့်ချထားလိုက်ကြောင်း ဒေသခံများထံမှ စုံစမ်းသိရသည်။
