အစိုးရအနေဖြင့် ရရှိပြီးသား ထိန်းချုပ်နယ်မြေများကို ပိုမိုခိုင်မာတောင့်တင်းအောင် ကြိုးစားရင်း တိုင်းဒေသကြီးများကို ပိုမိုအလေးအနက် ထားအားစိုက်ကာ အဖွဲ့အစည်းအားလုံးနှင့်အတူ ပူးပေါင်းဆောင်ရွက်စေလိုသည်ဟု အမျိုးသားညီညွတ်ရေးအစိုးရ(NUG) ပြည်ထောင်စုကြောင်း ပြည်ထောင်စုဝန်ကြီးချုပ် မန်းဝင်းခိုင်သန်းက ပြောကြားခဲ့ပါတယ်။
ဇန်နဝါရီ ၂၆ရက်က ကျင်းပသည့် ကြားကာလဒေသန္တရ ပြည်သူ့အုပ်ချုပ်ရေးဖော်ဆောင်မှုဗဟိုကော်မတီအစည်းအဝေး၌ ပြည်ထောင်စုဝန်ကြီးချုပ်က ထိုသို့ ပြောဆိုခဲ့ခြင်းဖြစ်သည်။
မကြာခင်ရက်ပိုင်းအတွင်း စစ်အာဏာရှင် တော်လှန်ရေး (၂)နှစ် ပြည့်တော့မည်ဖြစ်ပြီး စစ်ကောင်စီ၏ ရက်စက်ဖိနှိပ်မှု ခံနေရသည့် ပြည်သူများအတွက် ယင်းကာလမှာ အလွန်ကြာရှင်ကြောင်း ပြည်ထောင်စု ဝန်ကြီးချုပ်က ပြောသည်။
“တော်လှန်ရေးကာလအတွင်း အုပ်ချုပ်ရေးယန္တရားတည်ဆောက်ရတာက မလွယ်ကူပေမဲ့လည်း ယခုပုံစံတစ်မျိုး နောက်ပုံစံတစ်မျိုး ပြည်သူများ စိတ်ရှုတ်ထွေးမှုများ မရှိစေရေး အတွက် အစိုးရအဖွဲ့ဝင် တာဝန်ရှိသူများ စနစ်တကျ စီမံနိုင်ဖို့လိုအပ်တယ်”ဟု ပြည်ထောင်စုဝန်ကြီးချုပ်က ပြောသည်။
အကြမ်းဖက်စစ်အုပ်စုက တော်လှန်ရေးအင်အားစုများအကြား သွေးခွဲ သပ်လျှိုပြီး နည်းမျိုးစုံဖြင့် ကြိုးစားနေ၍ တော်လှန်ရေးအင်အားစုများ အချင်းချင်း လုံခြုံရေးကို အထူး အတိပြုကြရန်လည်း ဝန်ကြီးချုပ် မန်းဝင်းခိုင်သန်းက ပြောသည်။
အစိုးရအဖွဲ့ဝင်များနှင့် တော်လှန်ရေးအင်အားစုများကို အသက်အန္တရာယ်မရှိစေရေး ပိုမို ဂရုစိုက်ကြရန်လည်း ၎င်းက ထပ်မံ ပြောကြားသည်။
ယခု အစည်းအဝေးသို့ ကြားကာလဒေသန္တရ ပြည်သူ့အုပ်ချုပ်ရေး ဗဟိုဖော်ဆောင်မှု ကော်မတီ ဥက္ကဌ ပြည်ထောင်စုဝန်ကြီးချုပ် နှင့် ပြည်ထောင်စုဝန်ကြီးများ၊ ဒုဝန်ကြီး များ၊ အမြဲတမ်းအတွင်းဝန်များ၊ ဌာနဆိုင်ရာများမှ တာဝန်ရှိသူများ တက်ရောက်ခဲ့သည်။
