မန္တလေးမြို့ရှိ စစ်ကောင်စီ၏ မြဝတီဘဏ်ကင်းစောင့်နေသည့် စစ်သားနှစ်ဦးကို လက်ပစ်ဗုံးပစ်၍ တိုက်ခိုက်ခဲ့ကြောင်း People Defence Force Mandalay (PDF-MDY) ပြန်ကြားရေးအဖွဲ့မှ တာဝန်ရှိသူတစ်ဦးက ပြောသည်။
“အခြား Mission အပြန် ကင်းတဲမှာ သူတို့ကဆေးလိပ်သောက်နေတာမြင်လို့ လုပ်ခဲ့တာပါ။ ရဲဘော်တွေ ပြောကြားချက်အရကတော့ ဆေးလိပ် သောက်နေတဲ့ နှစ်ကောင်နားကပ်ကျတယ်ပြောတယ်” ဟု အထက်ပါတာဝန်ရှိသူက ပြောသည်။
ယင်းတိုက်ခိုက်မှုကို ဇန်နဝါရီ ၂၄ ရက် ည ၇နာရီခန့်တွင် လုပ်ဆောင်ခဲ့ခြင်းဖြစ်ပြီး သတင်းအတိအကျဖော်ပြနိုင်ရန် စုံစမ်းနေသောကြောင့် သုံးရက်ကြာချိန်မှ ထုတ်ပြန်နိုင်ခြင်းဖြစ်သည်ဟု ၎င်းက ဆိုသည်။
“အခုက ပြည်သူတွေကနေသားကျသွားပြီဗျ ။ကွဲသံကြားရင်တောင် သူတို့အတွက်က ရိုးသွားကြပြီ။တွေးမိတိုင်းဝမ်းနည်းမိပင်မဲ့ ကျွန်တော်တို့တော်လှန်ရေးကိုဘဲ မျက်နှာမှုထားပါတယ်။ ဘယ်တော့မှမသွေဖယ်သွားပါဘူး”ဟု ၎င်းက သတင်းစုံစမ်းချိန်၌ ကြုံရသည့် အခက်အခဲကို ပြောသည်။
ထို့အပြင် အကြမ်းဖက်စစ်ကောင်စီက ကျင်းပရန် စီစဉ်နေသည့် တရားမဝင်ရွေးကောက်ပွဲနှင့် ပတ်သက်၍ “အဲ့ပွဲလားဘောင်မဝင်ပါဘူးလို့ဘဲ ပြောချင်ပါတယ်။ကျွန်တော်တို့ပြည်သူတွေလဲ ဒီလိုဘဲလို့ ယုံကြည်ပါတယ်။ပြည်သူတွေကိုသတိပေးချင်တာကတော့ စကစ အသိုင်းအဝိုင်းနဲ့အဝေးဆုံးမှာနေပေးကြဖို့ပါဘဲ”ဟု အထက်ပါတာဝန်ရှိသူက ပြောသည်။
