ဒဏ်ရာရသည့် သားငယ်ဖြစ်သူ ခြေထောက်ဖြတ်လိုက်ရ
ကရင်အမျိုးသားအစည်းအရုံး (KNU) တပ်မဟာ (၃)နယ်မြေ ညောင်လေးပင်ခရိုင်(ခလယ်လွီထူခရိုင်) အတွင်း၌ အာဏာသိမ်းအကြမ်းဖက်စစ်ကောင်စီတပ်များမှ ကျေးရွာများအတွင်းသို့ ရည်ရွယ်ချက်ရှိရှိ လက်နက်ကြီးများဖြင့်ပစ်ခတ်ခဲ့ရာ အမျိုးသမီးတစ်ဦး သေဆုံးပြီး ၎င်း၏ ကလေး နှစ်ဦး ဒဏ်ရာရခဲ့ကြောင်း KNU ဗဟိုက သတင်းထုတ်ပြန်သည်။
ဖေဖော်ဝါရီ ၁၈ရက်ညပိုင်းက တပ်မဟာ(၃)၊ မူးမြို့နယ်၊ တုံးတောကျေးရွာတွင် အခြေချတပ်စွဲထားသော စစ်ကောင်စီတပ်က ကျွန်းတောကျေးရွာတွင်းသို့ လက်နက်ကြီးပစ်ခတ်ခဲ့ရာ နေအိမ် တစ်လုံးသို့ ကျရောက်ပေါက်ကွဲခဲ့သည်။
ယင်းသို့ ပေါက်ကွဲမှုကြောင့် ထမင်းစားနေသည့် အသက် (၃၈)နှစ်အရွယ် မမြင့်မြင့်ဆန်းနှင့် အသက် (၁၂)နှစ်အရွယ် သမီး၊ အသက် (၅) နှစ်အရွယ် သားငယ်တို့ ထိခိုက်ပြီး မိခင် မမြင့်မြင့်ဆန်းမှာ ပွဲချင်းပြီး အသက်ဆုံးရှုံးခဲ့ရသည်ဟု ထုတ်ပြန်သည်။
အသက်(၁၂)နှစ်အရွယ် သမီးမနှင်းမြတ်မွန်မှာ ညာဘက်ခြေထောက် ထိမှန်ကာ အသက်(၅)နှစ် အရွယ် သားဖြစ်သူ မောင်ရန်လင်းထက်မှာ ဘယ်ဘက်ခြေထောက်ကို ဖြတ်ရပြီး ညာဘက်ခြေထောက်မှာလည်း ပြင်းထန်စွာ ဒဏ်ရာရရှိခဲ့ကြောင်း ဖော်ပြထားသည်။
ထိခိုက်ဒဏ်ရာရရှိသည့် ကလေးသူငယ်နှစ်ဦးကို ဖြူးဆေးရုံသို့ ပို့ဆောင်ကုသပေးခဲ့လျက်ရှိပြီး ဆေးကုသရန်နှင့် ၎င်းတို့ ရှေ့ရေးအတွက်အခက်အခဲများစွာ ရှိနေသည်ဟု ဆိုသည် ။
ယင်းနေ့ ညပိုင်း၌ပင် စစ်ကောင်စီတပ် ခမရ-၃၅၁ သည် သစ်ချဆိပ်ကျေးရွာတွင်းသို့ ရည်ရွယ်ချက်ရှိရှိ လက်နက်ကြီး ပစ်ခတ်ခဲ့၍ နေအိမ် တစ်လုံးထိခိုက်ပျက်စီးခဲ့ကြောင်း ထုတ်ပြန် သည်။
စစ်ကောင်စီတပ်သည် နိုတောတာရွာမှ ညီအကိုနှစ်ဦးကိုလည်း ဖေဖော်ဝါရီ ၁၆ရက်က နတ်သံကွင်း- ကျောက်ကြီး ကားလမ်းရှိဆိတ်ကြီးဂိတ်တွင် ဖမ်းဆီးခဲ့ကြောင်း၊ ဖမ်းဆီးခံရသူ ၂ဦးမှာ ညီအစ်ကို ဖြစ်ပြီး မြို့ပေါ်သို့ ဖုန်းဝယ်ရန် အသွား၌ ဖမ်းဆီးခံရခြင်းဖြစ်ကြောင်း ဖော်ပြသည်။
ဆိတ်ကြီးဂိတ်၌ စစ်ဆေးစဉ် ဖုန်းအတွင်း၌ ကျေးရွာတွင်းသို့ ကျရောက်ပေါက်ကွဲသည့် လက်နက်ကြီးအပိုင်းအစများကို ရိုက်ထားသည့် ပုံကိုတွေ့ရှိသောကြောင့် ဖမ်းဆီးရိုက်နှက်စစ်ဆေးခံရခြင်းဖြစ်ပြီး ၎င်းတို့ နှစ်ဦးလုံး ပြန်မလွတ်သေးဟု KNUက ထုတ်ပြန်သည်။
