စစ်ကိုင်းတိုင်း၊ မုံရွာမြို့နယ်၊ တောပုကျေးရွာရှိ ပျူစောထီးအဖွဲ့အား နှစ်ရက်ဆက်တိုက်ခိုက်ခဲ့ရာ လေးဦးသေဆုံးခဲ့ကြောင်း Special Force-11 (PDF)အဖွဲ့က ပြောသည်။
ယမန်နေ့ (ဖေဖော်ဝါရီ ၂၆ရက်) နံနက် ၁၀နာရီခွဲခန့်က တောပုကျေးရွာ လယ်ကွင်းများအတွင်း၌ မဟာမိတ်ရဲဘော်များနှင့် အင်အား ၃၀ဝန်းကျင်ရှိသော တောပုရွာမှ ပျူစောထီးများ နှစ်ဖက်ထိပ်တိုက် ထိတွေ့တိုက်ပွဲဖြစ်ပွားခဲ့ကြောင်း၊ ထိုတိုက်ပွဲတွင် ပျူ သုံးဦးသေဆုံးပြီး ကျန်ပျူအချို့ ပြင်းထန်ထိခိုက်ဒဏ်ရာများ ရရှိသွားကြောင်း Special Force-11(PDF)အဖွဲ့က ပြောသည်။
ပျူအုပ်စုဘက်က လက်နက်ကြီးပစ်ကူများဖြင့်အင်အားထပ်ဖြည့်လာသောကြောင့် လက်နက်ရယူနိုင်ခြင်းမရှိကြောင်း Special Force-11 (PDF) အဖွဲ့က ဆိုသည်။
“ကြာချိန်ကတော့ ကျွန်တော်တို့ မနက် ၁၀နာရီလောက်မှာ ပွဲဖြစ်မဲ့နေရာကို စပြီးကပ်တာဗျ။ ၁၀နာရီခွဲမှာ ရင်ဆိုင်စဖြစ်တာ။ ၁၁နာရီကျော် ၁၂နီးပါးမှာ ပြန်ဆုတ်ခဲ့တာဆိုတော့ နာရီဝက် ကျော် ၄၅မိနစ်လောက်တော့ရှိမယ်ဗျ။ သူတို့ဘက်က သုံးယောက်ကျပြီး ပြန်ပြေးတဲ့အချိန် သေနတ်ကောက်ဖို့ သွားမယ်လုပ်တော့ လက်နက်ကြီးတွေ ပစ်လာတာနဲ့ လက်နက်မကောက်ခဲ့ရဘဲ ပြန်ဆုတ်လာခဲ့ရတာ။”ဟု Special Force-11 (PDF)အဖွဲ့၏ ပြန်ကြားရေးတာဝန်ခံက ပြောသည်။
အဆိုပါ တိုက်ပွဲတွင် ကျည်အမျိုးအစား အစုံအတောင့် ၂၀၀ကျော် အသုံးပြုခဲ့ရပြီး စစ်ဆင်ရေးများဆက်တိုက်ဖော်ဆောင်နေ၍ ကျည်ဖိုးအပါအဝင် ထောက်ပံ့မှု လိုအပ်နေကြောင်း ၎င်းကပြောသည်။
စစ်ဆင်ရေးတွင် Special Force-11(PDF)၊Brave Heart Army(BHA)၊ Monywa Special ဒိတ်ဒိတ်ကြဲ၊ Monywa Dynamite-STF(Special Force-11)၊Monywa ဗန္ဓုလနှင့်အဖွဲ့သားများ ပူးပေါင်းဆောင်ရွက်ခဲ့ကြောင်း အသိပေးထားသည်။
ဖေဖော်ဝါရီ၂၅ ရက်ကလည်း ပြည်သူ့ပဲခင်းများကို ခိုးယူရိတ်သိမ်းနေသော တောပုရွာမှ ပျူများအား မိုင်း ၅လုံးခွဲတိုက်ခိုက်ခဲ့ကြောင်း၊ မိုင်းခွဲတိုက်ခိုက်မှုကြောင့် ပျူတစ်ဦးသေဆုံးပြီး ဒဏ်ရာရထိခိုက်သူများကြောင်း Special Forces-11PDF ၏ ပြန်ကြားရေးတာဝန်ခံက ပြောသည်။
“ပြည်သူတွေရဲ့ ကောက်ပဲသီးနှံအခင်းတွေကို လာခိုးယူချိန် မိုင်းဆွဲတိုက်ခိုက်ခဲ့ပါတယ်။”ဟု အထက်ပါတာဝန်ခံက ပြောသည်။
အဆိုပါ စစ်ဆင်ရေးကို Special Forces-11PDF၊ Brave Heart Army-BHA၊ ဗန္ဓုလနှင့်အဖွဲ့သားများ၊ Monywa -Special ဒိတ်ဒိတ်ကြဲ တို့ ပူးပေါင်းဆောင်ရွက်ခဲ့ကြောင်း အသိပေးထားသည်။
ဖေဖော်ဝါရီ ၂၃ရက် ညပိုင်းကလည်း စစ်ကောင်စီတပ်နှင့်ပျူများ အထိုင်ချရာ တောပုရွာသို့ ဒေသတွင်း PDFအဖွဲ့များက တာဝေးပစ် (၈၀) မမ လက်နက်ကြီးများဖြင့် (၁၇)ချက် ပစ်ခတ်တိုက်ခိုက်ခဲ့ရာ စစ်အုပ်စုဝင်အများအပြား ထိခိုက်ဒဏ် ရာရရှိခဲ့ကြောင်း SpecialForce-11(PDF) အဖွဲ့က ထုတ်ပြန်ထားသည်။
