မန္တလေးတိုင်း၊ ပြင်ဦးလွင်ခရိုင် မတ္တရာမြို့နယ်တွင် စစ်ကြောင်းထိုးလာသည့် စစ်ကောင်စီတပ်အား မိုင်းဆွဲတိုက်ခိုက်ရာ လေးဦးနေရာတွင်သေဆုံးကြောင်း ဒုဌဝတီတော်လှန်ရေးအင်အားစု၏ သတင်းနှင့် ပြန်ကြားရေးတာဝန်ခံက ပြောသည်။
ယမန်နေ့ (ဖေဖော်ဝါရီ ၂၇ ရက်) နံနက် ၈နာရီခန့်က မတ္တရာမြို့နယ်၊ ကြာပင်အုပ်စု၊ ကျွန်းပင်ကျေးရွာတွင် စစ်ကြောင်းထိုးရန်လာသော စစ်ကောင်စီတပ်ဖွဲ့ဝင်များကို ဒေသတွင်းတော်လှန်ရေးအင်အားစုများက ပဒေသာမိုင်း သုံးလုံးဖြင့် ဖောက်ခွဲတိုက်ခိုက်ခဲ့ခြင်းဖြစ်သည်။
ထိုသို့ တိုက်ခိုက်မှုကြောင့် စစ်ကောင်စီတပ်သား လေးဦးနေရာတွင်သေဆုံးပြီး နှစ်ဦး ပြင်းထန်ဒဏ်ရာရရှိကြောင်း ဒုဌဝတီတော်လှန်ရေး အင်အားစု၏ သတင်းနှင့် ပြန်ကြားရေးတာဝန်ခံက ပြောသည်။
“ကျွန်းပင်ရွာကနေပြီးတော့ တောင်ခြေဘက်ကို စစ်ကြောင်းထိုးဖို့လာတာ။ အင်အားက ၃၈ယောက်ပါတယ်။ မိုင်းထိပြီးတော့ သူတို့ဘက်က ပစ်ခတ်တာတွေတော့ရှိတယ်။ ကာကွယ်ရေးအင်အားစုတွေအနေနဲ့ ထိခိုက်မှု မရှိပါဘူး။”ဟု အထက်ပါတာဝန်ခံက ဆိုသည်။
အဆိုပါ စစ်ဆင်ရေးကို ဇာမဏီပြည်သူ့ကာကွယ်ရေးတပ်ဖွဲ့ ၊ဒုဌဝတီတော်လှန်ရေး အင်အားစု၊ကောင်းကင်တော်လှန်ရေး အင်အားစုတပ်ခွဲ (၁)၊ဒေါင်းစစ်သည်ပြည်သူ့ကာကွယ်ရေးတပ်ဖွဲ့တို့ ပူးပေါင်းတိုက်ခိုက်ခဲ့ကြောင်း အသိပေးထားသည်။
ဖေဖော်ဝါရီ ၂၁ ရက်နှင့် ၂၂ ရက်များကလည်း စဉ့်ကူးနှင့် မတ္တရာမြို့နယ်တို့တွင် နွယ်ရုံရဲစခန်းနှင့် စစ်အုပ်စုတပ်စွဲရာ ပိုဝတောင်ရွာစခန်းတို့ကို တိုက်ခိုက်ခဲ့ရာ စစ်ကောင်စီအုပ်စုဝင် ၆ ဦးသေဆုံးကြောင်း ဒေသတွင်း PDF အဖွဲ့များက သတင်းထုတ်ပြန်ထားသည်။
