ပင်လောင်းနယ် ဆောင်းပြောင်းဒေသသို့ လေယာဉ်၊ ရဟတ်ယာဉ်များဖြင့်ဗုံးကြဲ၍ အရပ်သားထိခိုက်သေဆုံးမှုရှိ

စစ်ကောင်စီက ပအိုဝ်းအချင်းချင်းကြား၊ ကရင်နီနှင့်ပအိုဝ်းကြား ပဋိပက္ခဖြစ်စေရန် ရန်တိုက်ပေးနေဟု ပအိုဝ်းတပ် PNDF-KK သတိပေး

ရှမ်းပြည်နယ် ပင်လောင်းမြို့နယ် ဆောင်းပြောင်းဒေသ နမ်းနိမ်းကျေးရွာသို့ စစ်ကောင်စီတပ်က လက်နက်ကြီးများဖြင့် ပစ်ခတ်ခြင်းအပြင် မီးကျည်များဖြင့် လူနေအိမ်များကို မီးရှို့ဖျက်ဆီးခြင်း၊ တိုက်လေယာဉ် ၅စီးအပါအဝင် ရဟတ်ယာဉ်များဖြင့် ဗုံးကြဲခဲ့ကြောင်း ပအိုဝ်းအမျိုးသားကာကွယ် ရေးတပ်ဖွဲ့-ခမ်းကောင်(PNDF-KK)က ထုတ်ပြန်သည်။

မတ်လ ၁၁ရက် နံနက် ၅နာရီခန့်တွင် စစ်ကောင်စီတပ်က တိုက်ခိုက်လာခြင်းဖြစ်ပြီး ညနေပိုင်း၌ လေယာဉ် ရဟတ်ယာဉ်များဖြင့် ဗုံးကြဲခဲ့၍ နမ်းနိန်းရွာဘုန်းကြီးကျောင်းရှိ ရဟန်းရှင်လူပြည်သူ များ သေကြေဒဏ်ရာရခဲ့သည်ဟု ဖော်ပြသည်။

နမ်းနိန်းရွာ အရှေ့ဘက် ဘုရားတောင်မှ ကျေးရွာအတွင်းသို့ လက်နက်ကြီးများ၊ မီးကျည်များဖြင့် ရွာလုံးကျွတ် မီးရှို့ဖျက်ဆီးပစ်ခတ်ခဲ့သည့် စစ်ကောင်စီတပ်သည် ဘုရားတောင်၌ တပ်စွဲနေကြောင်း အသိပေးထားသည်။

စစ်ကောင်စီတပ်သည် ပအိုဝ်းအချင်းချင်းအကြားပဋိပက္ခဖြစ်စေရန် ၊ ကရင်နီနှင့် ပအိုဝ်း အကြား လူမျိုးရေး ပဋိပက္ခဖြစ်စေရန် သတင်းမှားများ ဖြန့်ဝေပြီး ရန်တိုက်ပေးနေကြောင်းလည်း PNDF-KKက ထုတ်ပြန်ခဲ့သည်။

ပြည်သူတစ်ရပ်လုံးအနေဖြင့် သတင်းမှန်သိရှိနိုင်ရေးအတွက် ဒရုန်းမှ ရိုက်ကူးထားသည့် မြေပြင် သက်သေ ဓာတ်ပုံမှတ်တမ်းများနှင့်အတူ တိုက်ပွဲအခြေအနေကို ထုတ်ပြန်ခဲ့ကြောင်းလည်း ဓာတ်ပုံများနှင့်အတူ ဖော်ပြသည်။

သို့သော် ထိခိုက်သေဆုံးမှုနှင့် အရေအတွက်မည်မျှရှိသည်ကို ဖော်ပြမထားပေ။

ကရင်နီအမျိုးသားများကာကွယ်ရေးတပ်(KNDF) ကလည်း နမ်းနိန်းရွာ၌ စစ်ကောင်စီတပ်က ကျူးလွန်ခဲ့သည့် အကြမ်းဖက်လုပ်ရပ်များကို ယမန်နေ့က ထုတ်ပြန်ခဲ့ရာ စစ်ကောင်စီတပ်သည် မတ်လ ၁၁ရက် နံနက် ၁၁နာရီခန့်တွင် ပအိုဝ်းစစ်ရှောင်ပြည်သူများ ခိုလှုံနေသည့် ဘုန်းကြီးကျောင်းနှင့် နေအိမ်များကို မီးရှို့ခဲ့ကြောင်းဖော်ပြသည်။

စစ်ကောင်စီ၏ လုပ်ရပ်သည် သာသနာအား ဖျက်ဆီးခြင်းအပြင် လူမျိုးရေးခုတုံးလုပ်ကာ ပြည်သူ့ကာကွယ်ရေးတပ်ဖွဲ့များနှင့် ပအိုဝ်းလူမျိုးများအကြား အထင်အမြင်လွဲမှားအောင် လုပ်ဆောင်နေခြင်းဖြစ်သည်ဟု KNDFက ထုတ်ပြန်ခဲ့သည်။

စစ်ကောင်စီက ပအိုဝ်းပြည်သူ့စစ်(PNO/PNA) တပ်များကို ရှမ်း- ကယား ဒေသစစ်ဆင်ရေးများ၌ အသုံးပြုဆောင်ရွက်လျက်ရှိသည်။

စစ်ကောင်စီတပ်က ပအိုဝ်းလူမျိုးများအား လူသားဒိုင်းအဖြစ်အသုံးပြုခြင်း၊ လက်ကိုင်တုတ်အဖြစ်အသုံးချခြင်းများ လုပ်ဆောင်နေ၍ ပအိုဝ်းပြည်သူများအနေဖြင့် စစ်ကောင်စီ၏ လုပ်ရပ် ကိုလက်မခံရန် ပအိုဝ်းအမျိုးသားဖက်ဒရယ်ကောင်စီ(PNFC) ဥက္ကဋ္ဌ ခွန်မြင့်ထွန်းက ပန်ကြားထားသည်။