နယ်စပ်ကျောက်တိုင်လာကြည့်သည့်ဟူသောအကြောင်းပြချက်ဖြင့်အိန္ဒိယအာသံရိုင်ဖယ်တပ်ကချင်းပြည်နယ်၊ ပလက်ဝမြို့နယ်အတွင်းသို့ မတ်လ ၁၃ ရက်တွင်ဝင်ရောက်ပြီးသေနတ်၁၀ချက်ပစ်ဖောက်ခဲ့ကြောင်းCDF-ပလက်ဝတာဝန်ရှိသူကပြောသည်။
အာသံရိုင်ဖယ်တပ်ဝင်ရောက်ခဲ့သည့်နေရာမှာCDF-ပလက်ဝ၊ တပ်ရင်း-၂ အခြေစိုက်ရာ ရွှေလိုက်ဝကျေးရွာ အတွင်းဖြစ်ပြီး ကျောက်တိုက်ကြည့်ရှုပြီး အပြန်တွင် သေနတ် ၁၀ ချက်ပစ်ဖောက်ခဲ့ခြင်းဖြစ်သည်ဟု ၎င်း၏ လူမှုကွန်ယက်တွင်မတ်လ ၁၃ ရက်ကရေးသားခဲ့သည်။
“ India အာဆမ်တပ်တွေ ကျွန်တော်တို့မြေပေါ် ခြေနင်းချင်တိုင်း နင်းနေတာကြာပါပြီ ၊ ယခု ဖြစ်စဉ်ဟာ ချင်းပြည်နယ် ပလက်ဝမြို့နယ် နှင့် India အစိုးရကြားရှိ နယ်စပ် ကျောက်တိုင် လာ ကြည့်ရှုတယ်ဆိုတဲ့ အကြောင်းပြချက်နဲ့ လက်နက်အပြည့်အစုံ နဲ့ မြန်မာပြည် ပြည်တွင်း ရှိ CDF -Paletwa အခြေချရာ တပ်ရင်း-၂ ၊ ရွှေလိုက်ဝ ကျေးရွှာ နယ်မြေထဲ ကို ဝင်ရောက်လာခြင်းဖြစ်ပါတယ်။”ဟု အထက်ပါတာဝန်ရှိသူကရေးသားထားသည်။
အာသန်ရိုင်ဖယ်တပ်သား ၁၀ ဦးကျော်ပါဝင်သောအဖွဲ့က မတ် ၁၃ ရက် နံနက်ကဝင်ရောက်လာပြီး စာသင်ကျောင်းနှင့်အိမ်များကိုဓါတ်ပုံရိုက်ကူးသွားကြောင်းဒေသခံအချို့ကပြောသည်။
ရွှေလိုက်ဝကျေးရွာသည် အိမ်ခြေ ၁၀၀ ကျော်နှင့် လူဦးရေ ၆၀၀ ကျော်နေထိုင်ကြောင်းသိရသည်။
ထိုဖြစ်စဉ်နှင့်ပတ်သတ်ပြီး NUGအနေဖြင့် အိန္ဒိယနိုင်ငံဖြင့် ပိုကောင်းသည့် ဆက်ဆံရေးကို တည်ဆောက်ရန် ကြိုးပမ်းသင့်ကြောင်း CDF ပလက်ဝမှတာဝန်ရှိသူကဆက်ပြောသည်။
အာသံရိုင်ဖယ်တပ်သည် မြန်မာနိုင်ငံနယ်နမြိတ်အတွင်းကို အကြိမ်ကြိမ်ဝင်ရောက်ခဲ့ကြောင်း ဒေသခံများကပြောသည်။
အာသံရိုင်ဖယ်တပ်သည် အိန္ဒိယ ဗဟိုအစိုးရ၊ပြည်ထဲရေးဝန်ကြီးဌာန၏ လက်အောက်ခံဖြစ်ပြီး စစ်ရေးကွပ်ကဲမှုကို အိန္ဒိယကာကွယ်ရေးဝန်ကြီးဌာနက တာဝန်ယူထားခြင်းဖြစ်သည်။
