စစ်ကိုင်းတိုင်း ကသာမြို့မှဆင်းလာသော ကျောက်စိမ်းများသယ်ဆောင်လာသည့် စစ်ကောင်စီယာဉ်တန်းသည် ထီးချိုင့်မြို့အဝင် ရင်ကွဲတောင်၌ ယမန်နေ့က မိုင်းဆွဲတိုက်ခိုက်ခံလိုက်ရပြီး ယာဉ်နှစ်စီးလမ်းဘေးထိုးကျသွားကာ စစ်ကောင်စီတပ်ဖွဲ့ဝင်များလည်း သေဆုံးမှုရှိကြောင်း သတင်းရရှိသည်။
“ မိုင်းဆွဲတိုက်ခိုက်တာ နှစ်စီး တောင်စောင်းကိုထိုးကျသွားတယ်။ ဘက်ဟိုးတွေနဲ့ ပြန်လာသယ် သွားတယ်။ လူတွေလည်း သင်္ဂြုလ်သွားတယ်လို့ သတင်းရတယ်” ဟု ထီးချိုင့်မြို့နယ်ပြည်သူ့ကာကွယ်ရေးတပ်ဖွဲ့၏ ထောက်ပို့ရဲဘော်တစ်ဦးကပြောသည်။
စစ်ကောင်စီယာဉ်တန်းတွင် ယာဉ်အစီးရေ ၄၀ ထက်မနည်းပါဝင်ပြီး ယမန်နေ့(မတ်လ ၂၅ရက်)နံနက်တွင် ကသာ-ထီးချိုင့်လမ်းအတိုင်း ထွက်ခွာလာခြင်း ဖြစ်သည်။ ယာဉ်ငါးစီးတွင် ကျောက်စိမ်းများသယ်ယူလာသည်ဟု သတင်းအတိအကျရရှိထားကြောင်း ပြည်သူ့ကာကွယ်ရေးရဲဘော်များက ပြောသည်။
စစ်ကောင်စီတပ်သည် ကသာ-ထီးချိုင့်လမ်းပိုင်းကို ကင်းပုန်းများချထားပြီး ပြည်သူ့ကာကွယ် ရေးတပ်ဖွဲ့က ထီးချိုင့်မြို့အဝင် ရင်ကွဲတောင်မှစောင့်၍ မတ်၂၅ နေခင်းပိုင်းတွင်မိုင်းခွဲတိုက်ခိုက်ခဲ့ခြင်းဖြစ်သည်။
စစ်ကောင်စီယာဉ်တန်းသည် ထီးချိုင့်မြို့ဘောလုံးကွင်းတွင် ရပ်နားထားပြီး သပိတ်ကျင်းမြို့သို့ ဆက်လက်ဆင်းနိုင်ကြောင်း ပြည်သူ့ကာကွယ်ရေးရဲဘော်များက ပြောသည်။
အထက်ပါ ယာဉ်တန်းသည် အင်းတော်နှင့် ကသာမြို့ကြားရှိနေစဉ် မတ်လ ၂၀ရက်နှင့် ၂၁ရက်က KIA၊PDF ပူးပေါင်းတပ်ဖွဲ့က တိုက်ခိုက်ခဲ့သေးသည်။
နှစ်ရက်ဆက် တိုက်ခိုက်မှုအတွင်း စစ်ကောင်စီဘက်မှ ၁၀ဦးထက်မနည်းသေဆုံးကြောင်း Indaw Revolution – IR က သတင်းထုတ်ပြန်ထားသည်။
ယခုပြန်ဆင်းလာသော ယာဉ်တန်းသည် ပြီးခဲ့သည့် မတ်လ ပထမလလယ်က သပိတ်ကျင်းမြို့နယ်မှ စတင်ထွက်ခွာလာကာ တကောင်း၊ ထီးချိုင့်၊ ကသာနှင့် အင်းတော်မြို့များကိုဖြတ်ပြီး ကချင်ပြည်နယ်နှင့် စစ်ကိုင်းတိုင်းအထက်ပိုင်းသို့ အင်အားတိုးခဲ့သည့် ယာဉ်တန်းဖြစ်သည်။
အဆိုပါယာဉ်တန်းကို သပိတ်ကျင်းနှင့် ထီးချိုင့်မြို့ကြား တကောင်းနယ်၊ထီးချိုင့်နှင့်ကသာကြား စသည့်နေရာတို့တွင် မိုင်းဆွဲတိုက်ခိုက်ခဲ့ရာ စစ်ကောင်စီအလွန်အထိနာခဲ့သည်။
