ပဲခူးတိုင်း ပေါင်းတည်မြို့နယ်၌နွေဦးပိတောက်စစ်ဆင်ရေး အနေဖြင့် စစ်ကောင်စီ၏ သင်္ကြန်မဏ္ဍပ်တစ်ခုကိုခြောက်လှန့်ဖောက်ခွဲခဲ့ပြီး စစ်ကောင်စီအုပ်ချုပ်ရေးမှုးတစ်ဦးကို ရှင်းလင်းခဲ့ကြောင်း ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့မှတာဝန်ရှိသူတစ်ဦးကပြောသည်။
“မဏ္ဍပ်ကတော့လူစည်အောင်ရွာသားတွေကိုအတင်းခေါ်ထားတာဗျ။ကြောက်တော့လဲလိုက်ရတာပေါ့ဗျာ။ဒီကောင်တွေက မဏ္ဍပ်ရှေ့မှာမူးရူးပြီးကကြတယ်လေ။ပြည်သူကိုကာဗာလုပ်ထားတော့မစ်ရှင်ဆောင်ရွက်တဲ့အခါ အခက်ခဲရှိတယ်ဗျ။ပြည်သူထိခိုက်မှာမို့သတိပေးတဲ့အနေနဲ့ပဲ လူရှင်းတဲ့အချိန်မှ ခွဲခဲ့တာပါ” ဟု ဧပြီ ၁၄ ရက်ညကပြုလုပ်ခဲ့သော စစ်ဆင်ရေးနှင့်ပတ်သက်၍ အထက်ပါတာဝန်ရှိသူကပြောသည်။
ပေါင်းတည်မြို့ ၊သစ်ပုတ်အုပ်စု၊ သိမ်ကုန်းရွာတွင်ပြည်သူများထံမှ ခြိမ်းခြောက်ငွေတောင်းခံကာဆောက်လုပ်ထားခြင်းဖြစ်ပြီး ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ PPDF၊ ပြည်ခရိုင် PDF တပ်ရင်း ၃၆၀၁၊ တပ်ခွဲ ၂ က အဝေးထိန်းဗုံးဖြင့် ဖောက်ခွဲတိုက်ခိုက်ခဲ့ခြင်းဖြစ်သည်ဟုသိရသည်။
ဗုံးခွဲတိုက်ခိုက်မှုကြောင့် အဆိုပါမဏ္ဍပ်ကို ဧပြီ ၁၅ ရက်တွင် ဖျက်သိမ်းသွားကြောင်း ၎င်းကဆက်ပြောသည်။
ထို့အပြင်ဧပြီ ၁၅ ရက်နံနက်တွင်လည်း နွေဦးပိတောက်စစ်ဆင်ရေးအနေဖြင့် ပေါင်းတည်မြို့နယ်၊ အဂ္ဂရာပြည့်အုပ်စု၊ သခွတ်စောက်ရွာ အုပ်ချုပ်ရေးမှူးလည်းဖြစ်၊ ပျူစောထီးခေါင်းဆောင် ထွန်းထွန်းဦးကို ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ PPDF၊ ပြည်ခရိုင် PDF တပ်ရင်း ၃၆၀၁၊ တပ်ခွဲ၅ (တောဘုရင်အဖွဲ့)နှင့်တပ်ခွဲ၄ တို့က ပစ်ခတ်ရှင်းလင်းခဲ့ကြောင်း အထက်ပါတာဝန်ရှိသူကပြောသည်။
“နေအိမ်မှာရှင်းလင်းခဲ့တာပါ။ခန္ဓာကိုယ်မှာတစ်ချက်ခေါင်းမှာတစ်ချက်ပါ” ဟု ၎င်းကပြောသည်။
အဆိုပါအုပ်ချုပ်ရေးမှုးသည် လူငယ်များကို ပျူစောထီးသင်တန်းတတ်ရောက်ရန် စည်းရုံးမှုများပြုလုပ်ခဲ့သလို စစ်ကောင်စီကို သတင်းပေးခြင်း ဆတ်ကြေးကောက်ခြင်း စသည်တို့ကိုပြုလုပ်နေသူဖြစ်ကြောင်း ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့မှတာဝန်ရှိသူတစ်ဦးကပြောသည်။
