အမေရိကန်က မွေးမြူရေးခြံ တစ်ခုမှာ ပေါက်ကွဲမှုဖြစ်ပြီး နွား ၁၈၀၀၀ လောက်သေဆုံး

အမေရိကန်နိုင်ငံ၊ တက္ကဆက်စ် ပြည်နယ်က မွေးမြူရေးခြံ တစ်ခုမှာ ပေါက်ကွဲမှု ဖြစ်ပွားရာက နွားကောင်ရေ ၁၈၀၀၀ ဝန်းကျင်လောက် သေဆုံးခဲ့ကြောင်း သိရပါတယ်။

ဒင်းမစ်တ် မြို့နားက South Fork နို့နဲ့ နို့ထွက်ပစ္စည်း မွေးမြူရေး လုပ်ငန်းပိုင် ခြံထဲမှာ အခုသီတင်းပတ် အစောပိုင်းက ပေါက်ကွဲမှုကြီး ဖြစ်ခဲ့တာပါ။ အဲဒီ ဖြစ်စဉ်ကြောင့် နွားကောင်ရေ ၁၈၀၀၀ နီးပါး သေဆုံးသွားပြီး လူ ၁ ဦးလည်း အပြင်းအထန် ဒဏ်ရာရခဲ့တယ်လို့ ဆိုပါတယ်။

ပေါက်ကွဲမှုရဲ့ အကြောင်းရင်းကို စုံစမ်းနေဆဲ ဖြစ်ပြီး တာဝန်ရှိသူတွေကတော့ မွေးမြူရေး လုပ်ငန်းသုံး စက်ကိရိယာ တစ်ခုခုမှာ ချွတ်ယွင်းချက် ဖြစ်ပေါ်ရာက မီသိန်းဓာတ်တွေ့ကို မီးကူးစက် လောင်ကျွမ်း ပေါက်ကွဲခဲ့တယ်လို့ ယုံကြည်နေပါတယ်။

၂၀၁၈ ကနေ ၂၀၂၁ ခုနှစ် အတောအတွင်း အမေရိကန် နိုင်ငံအနှံ့မှာ မီးလောင်ကျွမ်းမှုတွေကြောင့် မွေးမြူရေး တိရစ္ဆာန် ၃ သန်း နီးပါးလောက် သေဆုံးခဲ့တယ်လို့လည်း သိရပါတယ်။

အခု မွေးမြူရေးခြံ မီးလောင်ပေါက်ကွဲမှု ဖြစ်တဲ့ နေရာကို မီးသတ်နဲ့ ရဲတပ်ဖွဲ့ဝင်တွေ ရောက်ရှိလာတဲ့အခါ အပျက်အစီးပုံတွေအောက် ပိတ်မိနေသူ တစ်ဦးကို ရှာတွေ့ခဲ့ပါတယ်။ သူ့ကို အရေးပေါ် ကယ်ထုတ်ပြီး ဆေးရုံကို ရဟတ်ယာဉ်နဲ့ တင်ပို့ပေးခဲ့ပါတယ်။

မီးက နွားတွေကို အုံလိုက်ကျင်းလိုက် စုဝေးထားတဲ့ နေရာဆီ ခပ်မြန်မြန် ကူးစက် ရောက်ရှိသွားတာကြောင့်လည်း အခုလိုမျိုး နွားတွေ အသေအပျောက် အရမ်းများသွားခဲ့တာလို့ သိရပါတယ်။ တချို့ ဒဏ်ရာပြင်းပြင်းထန်ထန် ရထားပြီး ဝေဒနာ ခံစားနေရတဲ့ နွားတွေကိုတော့ အညင်သာဆုံး နည်းလမ်းနဲ့ ဇီဝိန်ချွေ ဖျက်ဆီးပေးသွားမယ်လို့ အာဏာပိုင်တွေက ပြောပါတယ်။

မီးလောင်ပေါက်ကွဲမှု တစ်ခုကြောင့် နွားကောင်ရေ ၁၈၀၀၀ လောက် သေဆုံးတယ် ဆိုတာက ၂၀၁၃ ခုနှစ်မှာ စနစ်တကျ စာရင်းကောက်ယူမှုတွေ စတင်ခဲ့တဲ့ ကာလတလျှောက် အမေရိကန်မှာ စံချိန်တင် အရေအတွက် အများဆုံး ဖြစ်လာမယ်လို့လည်း သိရပါတယ်။