၂ နှစ်ကျော်ကာလအတွင်း စစ်ကောင်စီဟာ ဒီမိုကရေစီအရေးလှုပ်ရှားသူတွေနဲ့ အရပ်သားပြည်သူ ၆၃၆ ဦးရဲ့ ပိုင်ဆိုင်မှုတွေကိုချိတ်ပိတ်ခဲ့တယ်လို့ နိုင်ငံရေးအကျဉ်းသားကူညီစောင့်ရှောက်ရေးအသင်း(AAPP) က ဒီနေ့ညနေပိုင်းမှာ ထုတ်ပြန်ပါတယ်။
ဒီလို ချိတ်ပိတ်ခံရသူ ၆၃၆ ဦးမှာ လူ ၃၀၀ ဟာလွှတ်တော်အမတ်တွေ ၊ NLD ပါတီဝင်တွေ၊ NLD ကိုထောက်ခံကြသူတွေဖြစ်တယ်လို့ AAPP က ဆိုပါတယ်။
AAPP ရဲ့ စာရင်းအရ ချိတ်ပိတ်ခံရတဲ့ ပိုင်ဆိုင်မှု ပစ္စည်းတွေထဲမှာ နေအိမ် တိုက်ခန်းတွေ ၊ ခြံမြေ ၊ ဆိုင်ခန်း၊ ဆေးရုံ ဆေးခန်းတွေ ၊ စာသင်ကျောင်း ၊စားသောက်ဆိုင် ၊တည်းခိုခန်း ၊ဟိုတယ်တွေအပြင် ဘာသာရေးဆိုင်ရာအဆောက်အဦးတွေပါဝင်တာတွေ့ရပါတယ်။
ဒီလို စစ်ကောင်စီ ချိတ်ပိတ်တဲ့ ရွှေ့ပြောင်းလို့ မရတဲ့ ပိုင်ဆိုင်မှုအရေအတွက်ဟာ ၇၅၀ ကျော် ရှိတယ်လို့ သိရပါတယ်။
စစ်ကောင်စီဟာ ချိတ်ပိတ်တာတွေကိုစစ်ကိုင်တိုင်းမှာ အများဆုံးပြုလုပ်ပြီး အဲဒီနောက်မှာရန်ကုန်တိုင်းနဲ့ မန္တလေးတိုင်းက ဒုတိယနဲ့ တတိယ အများဆုံးဒေသတွေအဖြစ် ရှိနေပါတယ်။
