စစ်ကိုင်းတိုင်း၊ ရွှေဘိုခရိုင်၊ ဒီပဲယင်းနှင့်ရေဦးနယ်စပ် ကျေးရွာများသို့ စစ်ကောင်စီတပ်က စစ်ကြောင်းထိုးမီးရှို့နေသဖြင့် ဒေသခံထောင်ချီ ထွက်ပြေးတိမ်းရှောင်နေရသည်။
စစ်သားအင်အား ၈၀ ခန့်ပါသောစစ်ကြောင်းကမေလ ၁ ရက်နေ့ နံနက်ပိုင်းမှစတင်ကာ ရေဦးနယ် မုတ်ဆီကျေးရွာမှတဆင့် ရေဦး၊ ဒီပဲယင်းနယ်စပ် ဆည်ကြီး၊ ပေါက်သာ၊ ဇိန့်ဇွန်းကျေးရွာများတဝိုက်သို့ စစ်ကြောင်းထိုးလာခဲ့ကြောင်းဒေသတွင်းသတင်းရင်းမြစ်များကပြောသည်။
ထိုကြောင့် ရေဦး ဒီပဲယင်းနယ်စပ် ဆည်ကြီး၊ ကုက္ကိုစု၊ ဇိန့်ဇွန်း၊ ရွာသာလေး၊ မူးသာကုန်း၊ ပေါက်သာ၊ ညောင်လှ ၊ သရက်တော၊ လက်ယက်ကုန်း၊ မူးခံတွင်း စသော ကျေးရွာများအပါအဝင် ကျေးရွာပေါင်း ၂၀ နီးပါးမှ စစ်ရှောင်ပြည်သူပေါင်း ၅၀၀၀ ကျော်ဘေးလွတ်ရာ ထွက်ပြေးတိမ်းရှောင်နေရကြောင်း ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။
![(ရေဦးနှင့် ဒီပဲယင်းအရှေ့ခြမ်း ၂မြို့နယ်စပ်ရှိ ကျေးရွာများမှ ပြည်သူများ ထွက်ပြေးတိမ်းရှောင်နေရစဥ်။ ဓာတ်ပုံ-ရေဦးမြို့နယ် စစ်ရှောင်ပြည်သူထောက်ပံ့ရေး)](https://i0.wp.com/www.ludunwayoo.com/wp-content/uploads/2023/05/344556003_128704633529073_4889289158129506834_n.jpg?resize=720%2C398&ssl=1)
![(ရေဦးနှင့် ဒီပဲယင်းအရှေ့ခြမ်း ၂မြို့နယ်စပ်ရှိ ကျေးရွာများမှ ပြည်သူများ ထွက်ပြေးတိမ်းရှောင်နေရစဥ်။ ဓာတ်ပုံ-ရေဦးမြို့နယ် စစ်ရှောင်ပြည်သူထောက်ပံ့ရေး)](https://i0.wp.com/www.ludunwayoo.com/wp-content/uploads/2023/05/344734006_778883793803453_4895586500806986068_n.jpg?resize=720%2C443&ssl=1)
ထိုစစ်ကြောင်းသည် ရေဦးနယ် ပေါက်သာရွာနှင့် ဆည်ကြီးရွာအား မီးရှို့ဖျက်ဆီးခဲ့ပြီး ပျက်စီးဆုံးရှုံးမှု မသိရသေးကြောင်း ဒေသခံများက ပြောသည်။
“ပေါက်သာနဲ့ ဆည်ကြီးဘက်ကိုလက်နက်ကြီးလက်နက်ငယ်တွေပစ်ခတ်ဝင်ရောက်ပြီးကျေးရွာ၂ရွာလုံးကို မီးရှို့ဖျက်ဆီးထားပြီးဖြစ်ပါတယ်။ လက်ရှိ အဲဒီစစ်ကြောင်းကပိဋကတ်ကျရွာရှေ့ ဘုန်းကြီးကျောင်းမှာ ဝင်ရောက်တပ်စွဲထားတယ်။”ဟု ဒေသတွင်းသတင်းရင်းမြစ်က ပြောသည်။
နီးစပ်ရာကျေးရွာများအနေဖြင့် စစ်ဘေးရှောင်ပြည်သူများအား ဝိုင်းဝန်းကူညီပေးကြပါရန်နှင့် ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့အနေဖြင့် အရေးပေါ်စစ်ဘေးရှောင်များအတွက် ရိက္ခာများကူညီထောက်ပံ့နိုင်ရန် ဆောင်ရွက်နေကြောင်း ထိုအဖွဲ့က အသိပေးသည်။
![(ရေဦးနှင့် ဒီပဲယင်းအရှေ့ခြမ်း ၂မြို့နယ်စပ်ရှိ ကျေးရွာများမှ ပြည်သူများ ထွက်ပြေးတိမ်းရှောင်နေရစဥ်။ ဓာတ်ပုံ-ရေဦးမြို့နယ် စစ်ရှောင်ပြည်သူထောက်ပံ့ရေး)](https://i0.wp.com/www.ludunwayoo.com/wp-content/uploads/2023/05/344430978_1312076349520871_916612408362903347_n.jpg?resize=720%2C398&ssl=1)
အလားတူ ရွှေဘိုနယ်အနောက်ခြမ်းတွင်လည်း စစ်ကောင်စီတပ်စစ်ကြောင်းတစ်ကြောင်းထိုးနေ၍ ဒီပဲယင်းနယ်အတွင်း ထွက်ပြေးတိမ်းရှောင်နေရကြောင်း၊ စစ်ဘေးရှောင်ပြည်သူများ လက်ခံချက်ပြုတ်ကျေးမွေးရာ ဌာနများမှာ စားနပ်ရိက္ခာများ အရေးပေါ်အကူအညီ လိုအပ်လျက်ရှိနေကြောင်း ဒီပဲယင်းမြို့နယ်ညီနောင်များအဖွဲ့က ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)